Psalm 77:1-20
Gi a fesiman fu den pokuman: A musu prei leki wan Yedutun-poku.* Wan singi fu Asaf.
77 Mi o opo mi sten fu kari Gado.Mi o opo mi sten fu kari Gado èn a o arki mi.
2 Te mi de na nowtu mi e suku yepi na Yehovah.
Heri neti mi e begi en.*
Nowan sma man trowstu mi.
3 Te mi e prakseri Gado, dan mi e geme.Mi bruya èn mi kon swaki. (Sela)
4 Yu meki taki mi no man sribi.Mi no sabi san mi musu du èn mi no man taki.
5 Mi e prakseri fosten.Mi e prakseri den sani di psa langa ten kba.
6 Te neti mi e prakseri a singi fu mi.Mi e denki dipi fu sani.Mi e ondrosuku sani finfini.
7 Yehovah o gwe libi wi fu ala ten?
A no o prisiri nanga wi noiti moro?
8 A no o sori wi bun-ati* noiti moro?
A de so taki nowan fu den bakapkin fu wi o si fa den pramisi fu en o kon tru?
9 Na fergiti Gado fergiti fu du bun gi wi?Na fu di en ati e bron nanga wi meki a no wani sori wi sar’ati moro? (Sela)
10 O langa mi o tan taki: „A e hati mi
taki a Moro Heiwan no e langa en ret’anu moro fu yepi wi leki fa a ben gwenti?”
11 Mi o memre den sani di Yah du.Iya, mi o memre den bigi sani di yu du langa ten psa.
12 Mi o denki dipi fu ala den sani di yu du.Na soso den sani di yu du, mi o prakseri.
13 Mi Gado, den pasi fu yu santa.
Sortu gado bigi leki a Gado fu wi?
14 Yu na a tru Gado di e du bigi wondru.
Na ala sei yu meki sma kon sabi a krakti fu yu.
15 Nanga yu krakti* yu ferlusu a pipel fu yu,den bakapkin fu Yakob nanga Yosef. (Sela)
16 Den watra si yu, mi Gado.Den watra si yu. Ne den bigin beifi srefsrefi.
Srefi a dipi watra bigin seki.
17 Den wolku lusu a watra fu den kon na gron.
Dungru wolku ben de na loktu èn dondru ben e bari.Na ala sei a faya fu yu ben e koti na loktu, neleki peiri di sma e sutu.
18 A b’bari fu a dondru fu yu ben de leki a b’bari fu asiwagi.Faya di e koti na loktu ben e meki leti skèin na grontapu.Grontapu ben e beifi èn a ben e seki.
19 Yu opo wan pasi na ini a se.Iya, a pasi fu yu ben e psa na ini furu watra.Ma sma no ben man si den futumarki fu yu.
20 Neleki fa wan skapuman e tyari den skapu fu en, na so yu tyari a pipel fu yu.Yu meki Moses nanga Aron tiri den.
