Psalm 64:1-10
-
Kibri mi gi ogr’ati sma
-
„Gado o sutu na den tapu” (7)
-
Gi a fesiman fu den pokuman. Wan singi fu David.
64 Mi Gado, arki mi te mi e taki fu den brok’ede fu mi.
Yepi mi fu no frede mi feanti di wani kiri mi.
2 Kibri mi gi den ogrisma di e sdon prakseri fa den kan du ogri nanga mi.Kibri mi gi a bigi ipi sma di e kon na mi tapu fu du mi ogri.
3 Den srapu den tongo neleki wan fet’owru.Den ogr’ati sani di den e taki de leki peiri di den e sutu.
4 Kmoto fu den kibripresi den e sutu na tapu sma di no du nowan ogri.Sondro fu den sma ferwakti dati den e sutu na den tapu. Den no e frede noti.
5 Na soso ogri den e prakseri fu du.*Den e taki fa den o seti val gi trawan.
Den e taki: „Nowan sma no o si den.”
6 Den e prakseri sortu tra ogri den kan du.Den no e ferteri nowan sma fa den o du den ogri fu den.Nowan sma kan sabi san de na ini den ati.
7 Ma Gado o sutu na den tapu.Fosi yu denki wan peiri o gi den mankeri.
8 Den eigi mofo* o meki den fadon.Ala sma di e si den o seki den ede.
9 Dan ala libisma o kon frede.Den o ferteri san Gado du.Iya, den o kon ferstan den sani di Gado du.
10 Den ret’ati sma o breiti nanga den sani di Yehovah du gi den èn den o suku kibri na en.Den sma di ati krin o prèise en.
