Psalm 140:1-13
Gi a fesiman fu den pokuman. Wan singi fu David.
140 Yehovah, ferlusu mi fu den ogrisma.Kibri mi gi den sma di e du ogr’ati sani,
2 iya, gi den sma di e luku fa den kan du mi ogri.Heri dei den e suku fu feti nanga sma.
3 Den srapu den tongo leki di fu wan sneki.A vergif fu wan takru sneki de na ini den mofo.* (Sela)
4 Yehovah, kibri mi, so taki den ogrisma no man du mi noti.Kibri mi tu gi den sma di e du ogr’ati sani,iya, gi den sma di e luku san den kan du fu meki mi fadon.
5 Den heimemre sma seti wan val gi mi.Nanga t’tei den span wan nèt na tapu mi pasi.
Den seti sani fu kisi mi. (Sela)
6 Mi taigi Yehovah: „Yu na mi Gado.
Yehovah, arki mi te mi e begi yu fu yepi mi.”
7 Tye Yehovah di de a Moro Hei Masra, yu na mi Ferlusuman.Di feti ben de yu sorgu taki ogri no miti mi.*
8 Yehovah, mi e begi yu, no gi den ogrisma san den wani.
No meki den kisi okasi fu du den ogri fu den, so taki den no kisi bigifasi. (Sela)
9 Meki den ogri di den sma na mi lontu taki nanga den mofo,saka kon na tapu den eigi ede.
10 Meki krofaya di e bron, fadon na den tapu leki alen.
Meki sma fringi den go na ini wan faya.Meki sma trowe den na ini dipi olo* pe den no man kmoto moro.
11 No meki a sma di e taki ogr’ati lei fu trawan tan libi na grontapu.*
Meki ogri miti den ogr’ati sma èn meki den dede.
12 Mi sabi taki Yehovah o feti gi den reti fu den mofinawan.Na wan reti fasi a o krutu a tori fu den pôtiwan.
13 Den ret’ati sma o prèise yu nen.Ala ten den krin-ati sma o de krosbei fu yu.
