Psalm 45:1-17
Gi a fesiman fu den pokuman: A musu prei na a srefi fasi leki „Den leilibromki”.* Wan psalm fu den bakapkin fu Korak. Wan Maskil.* Wan singi fu lobi.
45 Wan moi tori naki mi ati.
A singi di mi o singi now* abi fu du nanga wan kownu.
Meki mi tongo de leki a skrifitiki fu wan sekretarsi di sabi du en wroko bun.
2 Yu moi moro ala tra sma na grontapu.
Den sani di yu e taki e meki sma prisiri.
Dati meki Gado blesi yu fu ala ten.
3 Yu di abi makti, tai yu fet’owru na yu seibere.Weri grani nanga glori leki krosi na yu skin.
4 Go wini den feanti fu yu nanga a glori fu yu.Rèi yu asi èn feti gi sani di tru.Feti gi den sma di abi sakafasi èn gi retidu.
Nanga yu ret’anu yu o du* bigi sani.
5 Mi Kownu, den srapu peiri fu yu e meki sma fadon dede na yu futusei.Den e boro go na ini na ati fu den feanti fu yu.
6 Gado na yu kownusturu fu ala ten, iya, fu têgo.Nanga a kownutiki fu yu kownukondre yu e tiri na wan reti fasi.
7 Yu lobi retidu. Yu no lobi ogridu kwetkweti.
Dati meki Gado, iya, a Gado fu yu, salfu yu nanga oli, so taki yu kan prisiri moro leki den tra kownu.
8 Ala den krosi fu yu e smeri leki mirre-oli, aluwe-udu nanga kasia.Sma e prei poku na ini a bigi kownu-oso di den meki kon moi nanga ivoor. Te yu e yere a poku disi, yu e prisiri.
9 Den umapkin fu den kownu de na mindri den lespeki uma fu yu.
Mi Kownu, a moro prenspari uma fu yu* e tnapu na yu ret’anusei èn a e weri a gowtu fu Ofir.
10 Mi umapkin, poti prakseri èn arki bun.Fergiti den sma fu yu nanga a famiri fu yu p’pa.
11 Dan Kownu o lobi yu fu di yu moi,bika en na yu masra.Sobun, boigi gi en.
12 Na umapkin fu Tirus o kon nanga wan kado.Den moro gudu man o kon na yu fu di den wani taki yu feni den bun.
13 Na umapkin fu Kownu de na ini kownu-oso* èn a moi srefsrefi.Den moi en krosi* nanga gowtu titei.
14 Te den o tyari en go na fesi Kownu, a o weri moi krosi.
Sma e tyari den yongu uma* di e waka na en baka, kon na fesi Kownu.
15 Ala sma o breiti èn den o de nanga bigi prisiri te den e tyari den yongu uma kon drape.Dan den o go na ini na oso fu Kownu.
16 Den manpkin fu yu o teki a presi fu den afo fu yu.
Yu o poti den leki tiriman fu heri grontapu.
17 Fu ala ten mi o ferteri sma fu yu nen èn fu den sani di yu du.
Dati meki furu sma o prèise yu fu ala ten, iya, fu têgo.
Futuwortu
^ Sma no sabi san disi wani taki trutru. Kande disi na wan instrument noso wan melodie. Noso a kan abi fu du nanga wan fasi fa sma ben e meki poku.
^ Hebrewtongo: „Den wroko fu mi”.
^ Hebrewtongo: „Yu ret’anu o leri yu”.
^ Noso: „Na uma fu Kownu”.
^ Hebrewtongo: „de na insei”.
^ Hebrewtongo: „Den nai moimoi sani na tapu en krosi”.
^ Wan uma di no sribi nanga wan man ete.
