Psalm 60:1-12
Gi a fesiman fu den pokuman: A musu prei leki a poku di nen „A leilibromki di de wan kotoigi”.* Wan Miktam.* Wan psalm fu David fu gi sma leri. David skrifi en di a ben e feti nanga den sma fu Aram-Naharayim èn nanga den sma fu Aram-Soba. Na a srefi ten dati, Yoab ben drai kon baka fu feti nanga den Edomsma èn a kiri 12.000 srudati na ini Sowtu-lagipresi.
60 Mi Gado, yu no ben wani wi moro. Yu panya wi go na ala sei.
Yu ati ben bron nanga wi. Ma grantangi, teki wi baka.
2 Yu meki grontapu seki. Yu priti en opo.
Grantangi, meki en baka fu di a e broko fadon.
3 Yu meki yu pipel nyan pina.
Yu gi wi win fu dringi di e meki wi slingerslinger.
4 Opo* wan fraga go na loktu fu sori den sma di e lespeki yutaki den musu lowe gi den peiri fu den feanti. (Sela)
5 Ferlusu wi nanga yu ret’anu. Piki wi.Na so den sma di yu lobi o kisi kibri.
6 Gado santa.* Dati meki a taki:
„Mi o prisiri srefsrefi. Mi o meki mi pipel kisi Sikem leki gudu.Mi o marki Sukot-lagipresi fu prati en gi a pipel fu mi.
7 Gilead na fu mi èn Manase na fu mi tu.Efrayim na mi helm.*Yuda na a tiriman-tiki fu mi.
8 Moab na mi beki fu wasi sani na ini.
Mi o trowe mi susu na tapu Edom.
Mi o bari fu prisiri taki mi wini Filistea.”
9 Gado, suma o tyari mi go na a foto di feanti lontu?*
Suma o tyari mi go te na Edom?
10 A no yu di gwe libi wi?Yu no e hari go feti makandra nanga a legre fu wi moro.
11 Mi e begi yu, yepi wi te wi de na nowtu,bika wi sabi taki libisma no man ferlusu wi.
12 Na Gado o gi wi krakti.Na en o masi den feanti fu wi nanga en futu.
