Ed si Hebreo 11:1-40
11 Say pananisia et say mabiskeg a panagmatalek a seguradon nagawa imay iilaloan,+ say malinew ya ebidensya* na saray bengatlan tua anggano agnanengneng.
2 Ta diad panamegley na satan, saray totoo nensaman* et akaawat na maabig a pantasi manlapud Dios.
3 Lapud pananisia, natatalosan tayo a saray sistema na bengabengatla* et niletneg ed panamegley na salitay Dios, kanian saray bengatlan nanengneng et niwala manlapud saray bengatlan agnanengneng.
4 Lapud pananisia, si Abel et angiyapay ed Dios na bagat a mas maabig nen say bagat nen Cain,+ tan diad panamegley na satan a pananisia et sikatoy tinasian a matunong, ta inabobonan na Dios iray* regalo to,+ tan anggaman inatey la et sikatoy mansasalita ni+ diad panamegley na pananisia to.
5 Lapud pananisia, si Enoc+ et inyalis pian agto nanengneng so ipapatey, tan aglan balot aromog lapud sikatoy inyalis na Dios;+ ta antis a niyalis et sikatoy akaawat na pantasi ya apaliket ton maong so Dios.
6 Sakey ni, no anggapoy pananisia et imposiblin napaliket so Dios, ta siopaman ya onaasingger ed Dios et nepeg a manisia a sikatoy wala tan tumangan to iramay masimoon a manaanap ed sikato.+
7 Lapud pananisia, si Noe,+ sanen akaawat na pasakbay na Dios nipaakar ed saray bengatlan agni anengneng,+ et impatnag toy takot ed Dios tan angipaalagey na biong+ pian niliktar so sankaabungan to; tan diad panamegley na sayan pananisia et kinondena to so mundo,+ tan sikatoy nagmaliw a tomatawir na inkatunong a resulta na pananisia.
8 Lapud pananisia, si Abraham,+ sanen tinawag na Dios, et tinmulok diad inyakar tod sakey a pasen ya iter ed sikato bilang tawir; sikatoy linma, anggano agto amta no iner so laen to.+
9 Lapud pananisia, sikatoy nanayam bilang dayo ed insipan a dalin, diad sananey a dalin,+ a nanayam ed saray tolda+ a kaiba toy Isaac tan si Jacob, saray kaiba ton tomatawir ed satan lanlamang a sipan.+
10 Ta aalagaren toy syudad a walaan na saray tuan pundasyon, a say nandesinyo* tan nampaalagey et say Dios.+
11 Ontan met, lapud pananisia, si Sara et akaawat na pakayarin manlukon,* anggano akulaw la,*+ ta impasen ton matoor* imay Sakey ya angisipan.
12 Lapud saya, samay sakey a laki, ya impasen ya agla makailalak,*+ so nanlapuan na saray ananak+ a singa karakel na saray bitewen ed tawen tan singa agnabilang a buer diad gilig na dayat.+
13 Amin iraya et inaatey a walaan na pananisia, anggano agda naawat so kasumpalan na saray sipan;+ balet anengneng da iratan manlapud arawi+ tan nampirpirawatan da tan inyabawag da a sikaray dayo tan temporaryon miaayam ed dalin a kawalaan da.
14 Ta saramay mangibabaga ed satan et ipapatnag da a maseet iran manaanap na pasen a magmaliw a kayarian da.
15 Ingen, no naynay dan nonoten imay pasen a tinaynan da,+ wala komon so pankanawnawa ran ompawil.
16 Balet natan et pampipirawatan da so mas maabig a pasen, salanti, samay pasen a mitukoyan ed tawen. Kanian, ag-imbaing na Dios a sikatoy tawagen dan Dios da,+ ta walay imparaan ton sakey a syudad parad sikara.+
17 Lapud pananisia, si Abraham, sanen asubok,+ et singa to la inyapay si Isaac—samay laki a maliket ya angawat ed saray sipan et akaparaan a mangiyapay ed bogbogtong ya anak to+—
18 anggano imbaga lad sikaton: “Say tawagen ya ilalak mo* et manlapud si Isaac.”+
19 Balet inisip to a nayarian na Dios a paolien so anak to manlapud inaatey, tan inawat to so anak to manlapud patey tan saya et kinmanan ilustrasyon.+
20 Ontan met, lapud pananisia, si Isaac et benendisyonan toy Jacob+ tan si Esau+ nipaakar ed saray bengatlan onsabi.
21 Lapud pananisia, si Jacob, sanen magano lan ompatey,+ et benendisyonan to ray anak a lalaki nen Jose+ tan nandayew ed Dios legan a sikatoy akabemben ed baston to.+
22 Lapud pananisia, si Jose, sanen magano lan ompatey, et binitla toy nipaakar ed ipaway na saray ananak na Israel manlapud Ehipto, tan nambilin* nipaakar ed saray pukel to.*+
23 Lapud pananisia, si Moises et taloy bulan ya inyamot na saray ateng to kayari na inkiyanak to,+ lapud anengneng dan sikatoy masansanting ya ugaw+ tan ag-ira tinmakot ed ganggan na ari.+
24 Lapud pananisia, si Moises, sanen binmaleg la,+ et agto nilabay so patawag ya anak na samay biin anak na Faraon,+
25 a mas pinili toy napairap a kaiba na totoo na Dios nen say temporaryon panliket ed kasalanan,
26 lapud say napabanday bilang Sakey a Nilanaan* et impasen ton kayamanan a mas baleg ni nen saray kayamanan na Ehipto, ta inteen toy imano to ed pakaawat na tumang.
27 Lapud pananisia, tinaynan to so Ehipto,+ ya agto tinakotan so sanok na ari,+ ta sikatoy nansiansian mabiskeg ed pananisia a singa sankanengneng to imay Sakey ya agnanengneng.+
28 Lapud pananisia, sinelebraan toy Paskua tan angiwalsik na dala, pian samay imbakin maneral et agto pateyen iray panguloan ya anak da.+
29 Lapud pananisia, dinmalan ira ed Ambalangan Dayat a singa ed amagan dalin,+ balet sanen sinali na saray Ehipsio so ondalan ditan, nalner ira.+
30 Lapud pananisia, nagba iray padir na Jerico kayarin niliber iratan na totoo ed loob na pitoy agew.+
31 Lapud pananisia, si Rahab a paabang a bii et ag-aderal a kaiba na saramay aliwan matulok, ta maabig so impangawat to ed saray espiya.+
32 Tan anto ni ibagak? Kulang so panaon no ituloy ko nin isalaysay so nipaakar ed si Gideon,+ Barak,+ Samson,+ Jefte,+ David,+ ontan met ed si Samuel+ tan arum ni ran propeta.
33 Diad panamegley na pananisia+ et tinalo da ray panarian, inletneg day inkatunong, agamoran da ray sipan,+ pinepet day sangi na saray leon,+
34 anggapoy epekto ed sikara na pakayari apoy,+ aliktaran day tarem na espada,+ pinabiskeg ira sanen kinmapuy ira,+ nagmaliw iran makapanyari ed pilalaban,+ tinalo da ray onlulusob ya armada.+
35 Wala ray bibii a saray inatey ya ananak da et pinaoli,+ balet wala ray lalaki a pinairap lapud agda nilabay so nibulos diad panamegley na pikompromiso,* pian nagamoran day mas maabig a kioli.
36 On, saray arum et asubok diad panamegley na panagludlurey tan panaglewet, ya aliwan satan labat noagta diad impakabalor+ tan impakapriso met.+
37 Tinupak ira,+ sinubok ira, nilagari ira, pinatey ira ed panamegley na espada,+ nansulong ira na saray katat na karnero tan katat na kanding,+ tan mankakkaukolan ira, nanirap ira,+ tan minaltrato ira;+
38 tan say mundo et agmakanepegan ed sikara. Nanamot-amot ira diad desierto tan kapalandeyan tan saray ungib+ tan saray abot ed dalin.
39 Ingen ta amin da, anggaman akaawat ira na maabig a pantasi lapud pananisia ra, agda naawat so kasumpalan na sipan,
40 pian ag-ira magmaliw a perpekto no anggapo itayo,+ lapud ninonot la na Dios ya ikdan itayo na mas maabig a bengatla.
Paimanod leksab
^ Odino “makakombinsin ebidensya.”
^ Odino “saray inmunan atateng tayo.”
^ Odino “angiter na pantasi so Dios diad impangawat tod saray.”
^ Odino “nanggaway plano.”
^ Odino “napanmatalkan.”
^ Literal, “mangilukon na bini.”
^ Salanti, agla makaanak.
^ Odino “a singano inatey la.”
^ Literal, “binim.”
^ Odino “pangiponpon ed sikato.”
^ Odino “angiter na ganggan.”
^ Literal, “say Kristo.”
^ Odino “nibulos diad panamegley na sakey a dondon.”
