Ed si Hebreo 7:1-28
7 Ta sayan Melquisedec, ya ari na Salem tan saserdote na Sankatagyan a Dios, et inabet toy Abraham sanen pinmawil manlapud impanalo to ed saray arari, tan benendisyonan to,+
2 tan sikatoy inikdan* nen Abraham na kakaplo na amin a bengatla. Unona, say ngaran to et mankabaliksan na “Ari na Inkatunong,” tan sikato met so ari na Salem, salanti, “Ari na Kareenan.”
3 Lapud sikatoy andian na ama, ina, tan kapolian, tan ag-amta no kapigan so inkiyanak to odino impatey to,* noagta ginawan kaparpara na Anak na Dios, say inkasaserdote to et mansiansia diad amin a panaon.*+
4 Nengneng yo no panon kaimportante iyan too ya angiteran na patriarka* a si Abraham na kakaplo manlapud saray sankaabigan a samsam to.+
5 Tua, unong ed Ganggan, saramay manlapud anak a lalaki nen Levi+ a naturo bilang saserdote et nepeg a mankolekta na kakaplo manlapud totoo,+ salanti, manlapud saray agagi ra, anggano saraya et kailalakan* nen Abraham.
6 Balet sayan too ya agnanlapud kapolian nen Levi et angawat na kakaplo manlapud si Abraham tan benendisyonan toy Abraham ya angawat ed saray sipan.+
7 Natan et agnapanduaruwaan a samay mas abeba et bebendisyonan na samay mas atagey.
8 Tan diad sakey a kipapasen, say mangaawat na kakaplo et saramay totoon ompapatey, balet diad arum a kipapasen, say mangaawat et samay papaneknekan na Kasulatan a sikatoy mabilay.+
9 Tan nayarin ibaga ya anggan si Levi, a mangaawat na kakaplo, et angiter na kakaplo diad panamegley nen Abraham,
10 ta sikatoy magmaliw ni labat ya ilalak* na inmunan ateng ton si Abraham sanen inabet nen Melquisedec.+
11 Sirin, no say inkaperpekto et nagamoran diad panamegley na inkasaserdote na saray Levita+ (ta sakey itan ya importantin kabiangan na Ganggan a niiter ed totoo), akin et nakaukolan ni sananey a saserdote a mipadpara ed si Melquisedec+ imbes a mipadpara ed si Aaron?
12 Ta no nasasalatan so inkasaserdote, kaukolan met a nasalatan so Ganggan.+
13 Ta samay toon tutukoyen na saraya et nanlapud sananey a tribu, a diad saya et anggapoy akapanlingkor ed altar.+
14 Ta malinlinew a say Katawan tayo et nanlapud kailalakan nen Juda,+ ingen ta anggapoy binitla nen Moises a saserdoten manlapud sayan tribu.
15 Tan mas lalon linminew iya sanen walay sinmabin sananey a saserdote+ a singa si Melquisedec,+
16 a nagmaliw a saserdote, aliwan lapud nanlapuan ton kapolian unong ed kakaukolanen na Ganggan, noagta lapud pakayari a mangiiter ed sikato na bilay ya agnaderal.+
17 Ta bilang paneknek et oniay imbagad sikato: “Sakey kan saserdote ed andi-anggaan a mipadpara ed si Melquisedec.”+
18 Kanian sirin, say akaunan ganggan et pinaandi lapud makapuy itan tan andian na pakayari.+
19 Ta anggapoy nagmaliw a perpekto diad panamegley na Ganggan,+ noagta diad panamegley na mas maabig ya ilalo+ ya inter na Dios, a lapud satan et onaapit itayo ed sikato.+
20 Tan no panon ya ag-itan nagagawa no anggapoy sinambaan a sipan
21 (ta wala ray lalakin nagmaliw a saserdote ya anggapoy sinambaan dan sipan, balet samay sakey et nagmaliw ya ontan diad panamegley na sipan a sinambaan nipaakar ed sikato na samay Sakey ya angibaga: “Si Jehova* et nansamba, tan agmanguman so nonot to,* ‘Sakey kan saserdote ed andi-anggaan’”),+
22 si Jesus et nagmaliw met a garantiya ed mas maabig a sipanan.+
23 Niarum ni, dakel so kaukolan ya onsalat a saserdote+ ta ag-ira makapantultuloy a saserdote lapud ipapatey,
24 balet lapud sikatoy manbilay ya anggad angga,+ anggapoy kaukolan ya onsalat ed sikato bilang saserdote.
25 Kanian niliktar to met diad sigpot a paraan iramay onaasingger ed Dios diad panamegley to, ta sikatoy lawas mabilay pian mikasi parad sikara.+
26 Ta manepeg a walaan itayoy ontan ya atagey a saserdote a matoor, andiay kasalanan, ag-arutakan,+ biig ed saray makasalanan, tan mas atagey nen say katawenan.+
27 Aliwan singa saramay atagey a saserdote, agto kaukolan so mangiyapay na saray bagat ya inagew-agew,+ unona parad saray dilin kasalanan to insan parad saray kasalanan na totoo,+ lapud ginawa to iya a pinsanan sanen inyapay toy inkasikato.+
28 Ta unong ed Ganggan, saray tuturoen bilang atagey a saserdote et saray lalakin walaan na kakapuyan,+ balet unong ed salita nipaakar ed sinambaan a sipan+ a tinmumbok ed Ganggan, say tinuro et say Anak, a ginawan perpekto+ ya anggad angga.
