Ezekiel 21:1-32
21 Kinuna manen kaniak ni Jehova:
2 “Anak ti tao, sumangoka iti Jerusalem, ket agsaoka maibusor kadagiti nasantuan a disso, ken agipadtoka maibusor iti Israel.
3 Ibagam iti Israel, ‘Daytoy ti kinuna ni Jehova: “Bumusorak kenka. Asutekto ti espadak iti kalubanna+ ket papatayek dagiti nalinteg ken dakes nga umilim.
4 Ta papatayekto dagiti nalinteg ken dakes nga umilim, asutekto ti espadak iti kalubanna maibusor iti amin a tao,* manipud abagatan agingga iti amianan.
5 Maammuanto ti amin a tao a siak, ni Jehova, ti nangasut iti espadak. Saanton a maisubli dayta iti kalubanna.”’+
6 “Anak ti tao, agsennaayka bayat nga agpigergerka,* wen, agsennaayka iti sanguananda.+
7 No ibagada kenka, ‘Apay nga agsensennaayka?’ isungbatmo, ‘Gapu iti maysa a damag.’ Ta sigurado nga umayto, ket marunawto ti amin a puso gapu iti buteng ken agkapuy ti amin nga ima ken maladingitanto ti amin ken agaruyotto ti danum iti amin a tumeng.*+ ‘Sigurado nga umay ken mapasamakto dayta,’ kuna ti Kangatuan* nga Apo Jehova.”
8 Kinuna manen kaniak ni Jehova:
9 “Anak ti tao, agipadtoka ket ibagam, ‘Daytoy ti kinuna ni Jehova: “Ibagam, ‘Adda espada! Adda espada+ a naasa ken napasileng.
10 Naasa tapno mangpapatay iti adu; napasileng tapno sumilap a kas kimat.’”’”
“Saan kadi a rumbeng nga agragsaktayo?”
“‘Laksidento kadi daytoy* ti setro ti anakko,+ kas iti aramidenna iti tunggal kayo?
11 “‘Maited daytoy nga espada tapno mapasileng ken awiten ti ima. Naasa ken napasileng, tapno maited iti ima ti manangpapatay.+
12 “‘Agpukkaw ken agdung-awka,+ anak ti tao, ta immay dayta maibusor iti ilik; maibusor iti amin a panguluen ti Israel.+ Isudanto dagiti papatayen ti espada a kadua ti ilik. Isu a sipatem ti luppom gapu iti ladingit.
13 Ta nasukimaten ti ilik,+ ket anianto ti mapasamak no laksidenna ti setro? Maawanto dayta,’*+ kuna ti Kangatuan nga Apo Jehova.
14 “Agipadto ken agpalakpakka, anak ti tao, ket mamitlo nga ulitem nga ibaga, ‘Adda espada!’ Ti espada dagiti napapatay, ti espada a nangpapatay iti adu, a nangpalawlaw kadakuada.+
15 Kumapuyto ti pakinakemda* gapu iti buteng+ ket adunto ti mapapatay iti ruangan dagiti siudadda; mangpapatayakto babaen ti espada. Wen, sumilap a kasla kimat ken napasileng para iti panangpapatay!
16 Tumagbatka iti kannawan! Tumagbatka iti kannigid! Mapanka iti aniaman a pakaiturongan ti tademmo!
17 Agpalakpakakto met ken ipapasko ti pungtotko.+ Siak, ni Jehova, ti nagsao.”
18 Kinuna manen kaniak ni Jehova:
19 “Anak ti tao, markaam ti dua a dalan a pagserkan ti espada ti ari ti Babilonia. Maymaysanto a daga ti paggapuanda, ket masapul nga adda maikabil a pagilasinan a poste* iti pagsangaan ti dalan nga agturong iti dua a siudad.
20 Markaam ti maysa a dalan a pagserkan ti espada maibusor iti Rabba+ a siudad dagiti Ammonita, ken ti sabali a dalan maibusor iti napaderan a Jerusalem+ iti Juda.
21 Ta agsardeng ti ari ti Babilonia tapno agbuyon iti nagsangaan ti dalan, iti pagsinaan ti dua a dalan. Ginunggonna dagiti pana. Nagkonsulta kadagiti idolona* ken sinukimatna ti dalem.
22 Ti panagbuyon iti kannawan nga imana ipakitana a mapanda idiay Jerusalem, tapno iplastarda dagiti pagtebbag, ipakaammoda ti panangpapatay, ipukkawda ti gubat, iplastarda dagiti pagtebbag iti ruangan, mangaramidda iti bunton a pagdalanan, ken mangibangonda iti pader iti aglawlawna.+
23 Ngem dayta ket kaslanto iti ulbod a panagbuyon kadagidiay* nagsapata kadakuada.+ Ngem lagipennanto ti basolda ken tiliwenna ida.+
24 “Gapuna, daytoy ti kinuna ti Kangatuan nga Apo Jehova: ‘Impalagipyo ti basolyo babaen ti panangiparangyo iti biddutyo ken panangipakitayo iti basolyo iti amin nga aramidyo. Gapu ta nalagipkayo, mapuersakayto a maipanaw.’*
25 “Ngem dimtengen ti aldawmo, ti tiempo ti maudi a pannakadusam, sika a dakes a panguluen ti Israel,+ a nakaro ti pannakasugatna.
26 Daytoy ti kinuna ti Kangatuan nga Apo Jehova: ‘Ikkatem ti turbante ken ti korona.+ Saanton a kastoy daytoy.+ Ipangatom ti nababa,+ ket ipababam ti nangato.+
27 Dadaelek, dadaelek, wen, dadaelekto dayta. Awanto ti makinkukua iti dayta agingga nga umay daydiay addaan iti kalintegan,+ ket itedkonto dayta kenkuana.’+
28 “Agipadtoka, anak ti tao, ket ibagam, ‘Daytoy ti kinuna ti Kangatuan nga Apo Jehova maipapan kadagiti Ammonita ken iti pananginsultoda.’ Ibagam, ‘Adda espada! Adda naasut nga espada tapno mangpapatay; napasileng tapno mangibus ken sumilap a kasla kimat.
29 Malaksid kadagiti ulbod a sirmata ken panagbuyon maipapan kenka, maituonkanto kadagiti napapatay,* dagiti dakes a tattao a dimtengen ti aldawda, ti tiempo ti maudi a pannakadusada.
30 Isublim dayta iti kalubanna. Ukomenkanto iti lugar a nakaaramidam, iti daga a nagtaudam.
31 Ibukbokkonto ti pungtotko kenka. Ipuyotkonto kenka ti apuy ti ungetko, ket iyawatkanto kadagiti naranggas a lallaki, dagiti nalaing a mangdadael.+
32 Agbalinkanto a sungrod iti apuy;+ maibukbokto ti daram iti daga, ket saankanton a malagip, ta siak, ni Jehova, ti nagsao.’”
Footnotes
^ Lit., “lasag.”
^ Lit., “agpigerger ti patongmo.”
^ Kayatna a sawen, makaisbo gapu iti buteng.
^ Wenno “Soberano.”
^ Kayatna a sawen, ti espada ni Jehova.
^ Wenno “ti setro.”
^ Wenno “Malunagto ti pusoda.”
^ Lit., “nga ima.”
^ Lit., “terafimna.”
^ Kayatna a sawen, dagiti agnanaed iti Jerusalem.
^ Lit., “maipanawkayto babaen ti ima.”
^ Lit., “tengnged dagiti napapatay.”
