Ezekiel 7:1-27

  • Dimtengen ti panungpalan (1-27)

    • Naidumduma a didigra (5)

    • Maipuruakto ti kuarta iti kalsada (19)

    • Marugitanto ti templo (22)

7  Imbaga manen kaniak ni Jehova:  “Anak ti tao, daytoy ti kinuna ti Kangatuan* nga Apo Jehova iti Israel: ‘Panungpalan! Dimtengen ti panungpalan iti uppat a suli ti daga.  Itan ti panungpalam, ibuloskonto ti ungetko kenka, ket ukomenkanto sigun kadagiti aramidmo ken makikuentaakto kenka gapu iti amin a dakes nga aramidmo.  Saanakto a maasian kenka; saanakto met a mangngaasi,+ ta ipalak-amkonto kenka ti resulta dagiti aramidmo, ket sagabaemto ti epekto dagiti dakes nga aramidmo.+ Maammuanyonto a siak ni Jehova.’+  “Daytoy ti kinuna ti Kangatuan nga Apo Jehova, ‘Um-umayen ti didigra, naidumduma a didigra!+  Um-umayen ti panungpalan; umayto ti panungpalan; tumakderto* maibusor kenka. Um-umayen!  Dimtengen ti batangmo,* sika nga agnanaed iti daga. Um-umayen ti tiempo, asidegen ti aldaw.+ Adda riribuk imbes a naragsak a panagpukkaw kadagiti bantay.  “‘Asidegen nga ibukbokko ti pungtotko kenka,+ naan-anayto nga ibulosko ti ungetko kenka,+ ket ukomenkanto sigun kadagiti aramidmo ken makikuentaakto kenka gapu iti amin a dakes nga aramidmo.  Saanakto a maasian kenka; saanakto met a mangngaasi,+ ta ipalak-amkonto kenka ti resulta dagiti aramidmo, ket sagabaemto ti epekto dagiti dakes nga aramidmo. Maammuanyonto a siak, ni Jehova, ti mangdusdusa kadakayo.+ 10  “‘Adtoyen ti aldaw! Um-umayen!+ Dimtengen ti batangmo;* nagsabongen ti sarukod ken nagtubon ti kinatangsit. 11  Nagbalinen ti kinaranggas kas sarukod ti kinadakes.+ Saandanto a makalasat, uray ti kinabaknangda, ti adu a tattao, wenno ti kinalatakda. 12  Umayto ti tiempo, dumtengto ti aldaw. Bay-anyo a saan nga agragsak ti gumatgatang, ken saan nga agladingit ti aglaklako, ta adda pungtot maibusor iti amin a tattao.*+ 13  Ta saanto a sublian ti aglako ti nailako, uray no makalasat, ta ti sirmata ket maibusor iti amin a tattao. Awanto ti agsubli, ket awanto ti makaisalakan iti biagna gapu iti biddutna.* 14  “‘Pinuyotda ti trumpeta,+ ket nagsagana ti amin, ngem awan ti napan iti gubat, ta kapungtotko ti amin a tattao.+ 15  Adda iti ruar ti espada,+ ket adda iti uneg ti makapapatay a sakit ken nakaro a bisin. Matayto iti espada ti asinoman nga adda iti tanap, ket nakaro a bisin ken makapapatay a sakit ti mangibusto iti asinoman nga adda iti siudad.+ 16  Agturongto kadagiti bantay dagiti makalasat, ket kas kadagiti kalapati iti tanap, agsangitto ti tunggal maysa gapu iti biddutna.+ 17  Agkapuyto ti amin nga imada, ket agaruyotto ti danum iti amin a tumengda.*+ 18  Nakabadoda iti nakersang a lupot,+ ken napalalo ti panagpigergerda. Maibabaindanto amin, ken makalbonto ti uloda.*+ 19  “‘Ipuruakdanto ti pirakda iti kalsada, ket karuroddanto ti balitokda. Saanto a maisalakan ida ti pirak wenno balitokda iti aldaw ti pungtot ni Jehova.+ Saandanto a mapnek, ken awanto ti ipaunegda iti tianda, ta nagbalin dagita* a pakaitibkolan a namagbiddut kadakuada. 20  Impannakkelda dagiti napintas nga arkosda, ken dagita* ti inaramidda a makarimon nga imahen, dagiti makapasuron nga idoloda.+ Isu a pagbalinekto dagita a makaparurod a banag kadakuada. 21  Itedkonto dagita* kas samsam kadagiti ganggannaet ken managdakdakes iti daga, ket rugitandanto dagita. 22  “‘Saankonto nga italiaw ti rupak.+ Rugitandanto ti nakalemmeng a lugarko,* ket serken ken rugitanto dayta dagiti mannanakaw.+ 23  “‘Aramidem ti kawar,*+ ta napno ti daga iti panangukom a namansaan iti dara,+ ken napno ti siudad iti kinaranggas.+ 24  Iyegkonto ti kadadaksan kadagiti nasion,+ ket tagikuaendanto dagiti balayda,+ ken pagpatinggaekto ti panagpannakkel dagidiay napigsa ket marugitanto dagiti santuarioda.+ 25  Agsapuldanto iti talna inton agrigatda, ngem awanto.+ 26  Agsasarunonto ti didigra, ken agsasarunonto ti damag, ket agsapulto dagiti tattao iti sirmata manipud iti propeta,+ ngem agpukawto ti linteg* manipud iti padi ken ti balakad manipud kadagiti panglakayen.+ 27  Agladingitto ti ari,+ ken agbadonto ti panguluen iti pannakapaay,* ket agpigergerto ti ima dagiti umili iti daga gapu iti butengda. Tratuekto ida sigun iti aramidda, ket ukomekto ida sigun iti panangukomda. Maammuandanto a siak ni Jehova.’”+

Footnotes

Wenno “Soberano.”
Lit., “agriingto.”
Wenno mabalin a, “ti balangatmo.”
Wenno mabalin a, “ti balangatmo.”
Kayatna a sawen, saanto a magunggonaan uray dagidiay gumatang iti sanikua wenno dagidiay aglako, ta dumtengto amin kadakuada ti pannakadadael.
Wenno mabalin a, “babaen ti biddutna.”
Kayatna a sawen, makaisboda gapu iti buteng.
Kayatna a sawen, makiskisanto ti uloda gapu iti ladingit.
Kayatna a sawen, ti pirak ken balitokda.
Kayatna a sawen, dagiti alikamenda a balitok ken pirak.
Kayatna a sawen, ti pirak ken balitokda nga inusarda a mangaramid kadagiti idolo.
Nalabit tumukoy iti kaunegan a paset ti santuario ni Jehova.
Kayatna a sawen, dagiti kawar ti pannakaadipen.
Wenno “instruksion.”
Wenno “pannakalangalang.”