Ezekiel 14:1-23
14 Immay ti dadduma a panglakayen ti Israel ket nagtugawda iti sanguanak.+
2 Kinuna kaniak ni Jehova:
3 “Anak ti tao, determinado dagitoy a lallaki nga agserbi kadagiti makarimon nga idoloda,* ken nangikabilda iti pakaitibkolan a namagbasol kadagiti tattao. Ipalubosko kadi nga agsaludsodda kaniak?+
4 Agsaoka ket ibagam kadakuada, ‘Kastoy ti kuna ti Kangatuan* nga Apo Jehova: “No determinado ti maysa nga Israelita nga agserbi kadagiti makarimon nga idolona ken mangikabil iti pakaitibkolan a mamagbasol kadagiti tattao sa umay agsaludsod iti propeta, siak, ni Jehova, sungbatakto maitunos iti kaadu ti makarimon nga idolona.
5 Ta ikabilkonto ti panagbuteng iti puso ti sangakabbalayan ti Israel* gapu ta immadayoda amin kaniak ket nagserbida kadagiti makarimon nga idoloda.”’+
6 “Isu nga ibagam iti sangakabbalayan ti Israel, ‘Daytoy ti kuna ti Kangatuan nga Apo Jehova: “Agsublikayo ket panawanyo dagiti makarimon nga idoloyo ken tallikudanyo ti amin a dakes nga aramidyo.+
7 Ta no umadayo kaniak ti asinoman nga Israelita wenno ganggannaet a residente iti Israel ket determinado nga agserbi kadagiti makarimon nga idolona ken mangikabil iti pakaitibkolan a mamagbasol kadagiti tattao sa umay agsaludsod iti propetak,+ siak, ni Jehova, sumungbatakto kenkuana.
8 Busorekto dayta a tao ket pagbalinek a maysa a pakdaar ken pagarigan, ken ikkatekto iti ilik;+ ket maammuanyonto a siak ni Jehova.”’
9 “‘Ngem no maallilaw ti propeta ket sumungbat, siak, ni Jehova, ti nangallilaw iti dayta a propeta.+ Usarekto ti pannakabalinko maibusor kenkuana ket papatayek manipud iti ilik nga Israel.
10 Awitendanto ti basolda; agpadanto ti basol ti nagsaludsod ken ti propeta,
11 tapno agsardengen nga umadayo kaniak ti sangakabbalayan ti Israel ken saandan a rugitan ti bagida babaen ti amin a basolda. Ket agbalindanto nga ilik, ken siakto ti Diosda,’+ kuna ti Kangatuan nga Apo Jehova.”
12 Kinuna manen kaniak ni Jehova:
13 “Anak ti tao, no agbasol kaniak ti daga babaen ti dina panagmatalek, usarekto ti pannakabalinko maibusor iti dayta ket dadaelek ti suplayna a taraon,*+ ken mangibaonakto iti nakaro a bisin+ ken papatayek ti tao ken animal nga aggigian iti dayta.”+
14 “‘Uray no adda sadiay dagitoy a tallo a lallaki—da Noe,+ Daniel,+ ken Job+—ti laeng bagida* ti maisalakanda gapu ta nalintegda,’+ kuna ti Kangatuan nga Apo Jehova.”
15 “‘Wenno, no palasatek iti daga dagiti narungsot nga animal ket papatayenda dagiti agnanaed iti dayta* sa pagbalinenda dayta a langalang nga awan ti lumabas gapu kadagiti atap nga animal,+
16 ikarik,’ kuna ti sibibiag a Kangatuan nga Apo Jehova, ‘uray no adda sadiay dagitoy tallo a lallaki, saandanto a maisalakan ti annakda a lallaki wenno babbai; ti laeng bagida ti maisalakanda, ket mapanawanto ti daga.’”
17 “‘Wenno, no mangyegak iti espada maibusor iti dayta a daga+ ket ibagak: “Lumasat koma ti espada iti daga,” ket agpada a papatayek ti tao ken animal,+
18 uray no adda sadiay dagitoy a tallo a lallaki, ikarik,’ kuna ti sibibiag a Kangatuan nga Apo Jehova, ‘saanda a maisalakan ti annakda a lallaki wenno babbai; ti laeng bagida ti maisalakanda.’”
19 “‘Wenno, no mangibaonak iti makapapatay a sakit iti dayta a daga+ ken ibukbokkonto ti pungtotko tapno mapapatay ti adu a tao ken animal,
20 uray no adda sadiay da Noe,+ Daniel,+ ken Job,+ ikarik,’ kuna ti sibibiag a Kangatuan nga Apo Jehova, ‘saandanto a maisalakan ti annakda a lallaki wenno babbai; ti laeng bagida* ti maisalakanda gapu ta nalintegda.’”+
21 “Ta daytoy ti kuna ti Kangatuan nga Apo Jehova: ‘Kastanto ti mapasamak inton ibaonko ti uppat a pannusak*+—espada, nakaro a bisin, narungsot nga atap nga animal, ken makapapatay a sakit+—maibusor iti Jerusalem tapno mapapatay sadiay ti tao ken animal.+
22 Ngem makalasat ken mairuarto ti sumagmamano a nabati iti dayta,+ annak a babbai ken lallaki. Umayda kenka, ket no makitam dagiti dakes a kababalin ken aramidda, sigurado a maliwliwakanto iti kalamidad nga inyegko iti Jerusalem, iti amin nga inaramidko iti dayta.’”
23 “‘Maliwliwakayto no makitayo dagiti dakes a kababalin ken aramidda, ket maammuanyonto nga adda rason nga inaramidko dayta,’+ kuna ti Kangatuan nga Apo Jehova.”
Footnotes
^ Ti naaramat a Hebreo a sao ket mabalin a mainaig iti sao a naipatarus a “takki” ken nausar kas pangumsi.
^ Wenno “Soberano.”
^ Lit., “tiliwekto ti sangakabbalayan ti Israel iti pusoda.”
^ Lit., “tukkolekto dagiti pagibitinan iti tinapay.” Mabalin a tumukoy kadagiti pagibitinan a pagpempenan iti tinapay.
^ Wenno “kararuada.”
^ Wenno “dagiti annakyo.”
^ Wenno “kararuada.”
^ Wenno “ti uppat a makadangran a panangukomko.”
