Ezekiel 11:1-25

  • Nakondenar dagiti dakes a prinsipe (1-13)

    • Nayarig ti siudad iti kaldero (3-12)

  • Kari a pannakaisubli (14-21)

    • Naited ti “baro nga espiritu” (19)

  • Pumanaw ti dayag ti Dios iti Jerusalem (22, 23)

  • Agsubli ni Ezekiel idiay Caldea babaen ti sirmata (24, 25)

11  Adda espiritu a nangipangato kaniak ket impannak iti makindaya a ruangan ti balay ni Jehova, ti ruangan a sumango iti daya.+ Nakakitaak iti 25 a lallaki iti pagserkan ti ruangan, a karaman kadakuada dagiti prinsipe dagiti umili, da Jaazanias nga anak ni Azur ken ni Pelatias nga anak ni Benaias.+  Kinuna kaniak ti Dios: “Anak ti tao, dagitoy ti lallaki nga agplamplano iti dakes ken mangmangted iti dakes a balakad* iti daytoy a siudad.  Ibagbagada, ‘Saan aya a tiempo ti panagbangon iti balay?+ Ti siudad* isu ti kaldero,*+ ket datayo ti karne.’  “Agipadtoka ngarud maibusor kadakuada. Agipadtoka, anak ti tao.”+  Nagtignay kaniak ti espiritu ni Jehova,+ ket kinunana: “Ibagam, ‘Daytoy ti kinuna ni Jehova: “Umiso ti imbagayo, O sangakabbalayan ti Israel, ket ammok ti pampanunotenyo.*  Dakayo ti makagapu nga adu ti natay iti daytoy a siudad, ket pinunnoyo iti bangkay dagiti kalsadana.”’”+  “Gapuna, daytoy ti kinuna ti Kangatuan* nga Apo Jehova, ‘Dagiti bangkay nga inwarawarayo iti siudad isu ti karne, ket ti siudad isu ti kaldero.+ Ngem mairuarkayto iti dayta.’”  “‘Nagbutengkayo iti espada,+ ngem mangyegakto kadakayo iti espada,’ kuna ti Kangatuan nga Apo Jehova.  ‘Iruarkayto iti dayta ket iyawatkayo kadagiti ganggannaet ken ukomenkayto.+ 10  Mataykayto iti espada.+ Ukomenkayto iti pagpatinggaan ti Israel,+ ket maammuanyonto a siak ni Jehova.+ 11  Saanto nga agserbi ti siudad kas kaldero, ket saanto a dakayo ti karne iti dayta; ukomenkayto iti pagpatinggaan ti Israel, 12  ket maammuanyonto a siak ni Jehova. Ta saanyo a tinungpal dagiti regulasionko ken saanyo nga impakat dagiti pangngeddengko,+ no di ket nagtignaykayo maitunos kadagiti pangngeddeng dagiti nasion iti aglawlawyo.’”+ 13  Apaman a nalpasak a nagipadto, natay ni Pelatias nga anak ni Benaias, ket nagdumogak sa impukkawko: “O Kangatuan nga Apo Jehova! Ibusem kadi dagiti nabati iti Israel?”+ 14  Kinuna manen kaniak ni Jehova: 15  “Anak ti tao, imbaga dagiti agnanaed iti Jerusalem kadagiti kakabsatmo, kadagiti kabagiam nga addaan iti kalintegan a mangsaka, ken iti intero a sangakabbalayan ti Israel, ‘Adaywanyo ni Jehova. Kukuami ti daga; naited kas sanikuami.’ 16  Isungbatmo, ‘Daytoy ti kinuna ti Kangatuan nga Apo Jehova: “Nupay impanko ida kadagiti nasion ken inwarawarak ida iti nadumaduma a daga,+ asidegen nga agbalinak a santuario kadakuada kadagiti daga a nakaipananda.”’+ 17  “Gapuna, ibagam, ‘Daytoy ti kinuna ti Kangatuan nga Apo Jehova: “Ummongenkayto met manipud kadagiti ili ken urnongenkayo manipud kadagiti daga a nakaiwarawaraanyo, ket itedkonto kadakayo ti Israel.+ 18  Agsublidanto sadiay ket ikkatenda ti amin a makarimon a banag ken dakes nga aramid.+ 19  Ikkakto ida iti nagkaykaysa a puso,*+ ket mangikabilakto iti baro nga espiritu iti unegda.+ Ikkatekto iti bagida ti puso a bato+ ket ikkak ida iti puso a lasag,*+ 20  tapno surotenda dagiti paglintegak ken tungpalenda dagiti pangngeddengko. Iti kasta, agbalinda nga ilik, ket siakto ti Diosda.”’ 21  “‘“Ngem dagidiay agtalinaed iti makarimon a bambanagda ken iti dakes nga aramidda, iparabawkonto iti uloda ti resulta ti aramidda,” kuna ti Kangatuan nga Apo Jehova.’” 22  Inngato dagiti kerubin dagiti payakda, ket adda iti abayda dagiti pilid.+ Adda iti ngatuenda ti dayag ti Dios ti Israel.+ 23  Nagpangato ti dayag ni Jehova+ manipud iti siudad ket nagtalinaed iti ngatuen ti bantay iti daya ti siudad.+ 24  Adda espiritu a nangipangato kaniak—iti sirmata babaen ti espiritu ti Dios—ket impannak idiay Caldea kadagiti naipanaw a tattao. Kalpasanna, nagpukaw ti sirmata. 25  Ket imbagak kadagiti naipanaw a tattao ti amin a banag nga impakita kaniak ni Jehova.

Footnotes

Wenno “balakad maibusor.”
Ti siudad ti Jerusalem, nga impagarup dagiti Judio a mangprotektar kadakuada.
Wenno “nalawa ti ngarabna a kaldero.”
Wenno “ti bambanag a tumaud iti espirituyo.”
Wenno “Soberano.”
Lit., “maymaysa a puso.”
Kayatna a sawen, puso a nalaka nga agpaiwanwan iti Dios.