Ezekiel 26:1-21

  • Padto maibusor iti Tiro (1-21)

    • “Pagpamagaan iti iket” (5, 14)

    • Naipuruak iti danum dagiti bato ken daga (12)

26  Iti maika-11 a tawen, iti umuna nga aldaw ti bulan, kinuna kaniak ni Jehova:  “Anak ti tao, gapu ta imbaga ti Tiro iti Jerusalem,+ ‘Gunggonam! Nadadaelen ti ruangan dagiti ili!+ Agballigiakon, bumaknangak itan ta nadadaelen’;  daytoy ti kinuna ti Kangatuan* nga Apo Jehova: ‘Busorenka, O Tiro, ket tignayekto ti adu a nasion a bumusor kenka, kas iti baybay a mangpataud kadagiti dalluyon.  Dadaelendanto dagiti pader ti Tiro ken rebbaenda dagiti torrena,+ ket karusekto ti dagana ken pagbalinek a nasileng a dakkel a bato.  Agbalinto a pagpamagaan iti iket iti tengnga ti baybay.’+ “‘Ta siak a mismo ti nagsao,’ kuna ti Kangatuan nga Apo Jehova, ‘ket alaento dagiti nasion ti sanikuana.  Matayto iti espada dagiti purokna* iti away, ket maammuanto dagiti tattao a siak ni Jehova.’  “Ta daytoy ti kinuna ti Kangatuan nga Apo Jehova: ‘Iyegko ni Ari Nabucodonosor* ti Babilonia a bumusor iti Tiro manipud iti amianan;+ isu ti ari dagiti ari,+ nga addaan kadagiti kabalio,+ karuahe a pakigubat,+ kumakabalio, ken armada ti adu a soldado.*  Dadaelennanto iti espada dagiti purokmo iti away, mangibangonto iti pader iti aglawlawmo, mangaramidto iti bunton a pagdalanan, ken mangingato iti dakkel a kalasag maibusor kenka.  Rugpuennanto dagiti padermo babaen ti pagtebbagna,* ken rebbaennanto dagiti torrem babaen kadagiti wasayna.* 10  Maabbongankanto iti tapok gapu iti nakaad-adu a kabaliona, ken magunggonto dagiti padermo gapu iti uni dagiti kumakabalio, pilid, ken karuahe inton sumrek kadagiti ruanganmo, kas kadagiti lallaki a dumardarup iti siudad a nadadael dagiti paderna. 11  Payatpayatento dagiti kabaliona ti amin a kalsadam;+ patayennanto dagiti umilim iti espada, ken marpuogto dagiti natibker nga adigim. 12  Takawendanto dagiti sanikuam, alaenda dagiti tagilakom,+ rebbaenda dagiti padermo, ken rakrakenda dagiti napintas a balaymo; sa ipuruakda iti danum dagiti bato, kayo, ken dagam.’ 13  “‘Pasardengekto ti ariwawa dagiti kantam, ken saanton a mangngeg ti tokar dagiti arpam.+ 14  Aramidenkanto a nasileng a dakkel a bato, ken agbalinkanto a pagpamagaan iti iket.+ Pulos a saankanton a maibangon, ta siak a mismo, ni Jehova, ti nagsao,’ kuna ti Kangatuan nga Apo Jehova. 15  “Daytoy ti kinuna ti Kangatuan nga Apo Jehova iti Tiro: ‘Iti uni ti pannakatnagmo, inton agasug dagiti matmatay,* inton mapasamak ti panangpapatay iti tengngam, saanto kadi a magunggon dagiti isla?+ 16  Bumabanto iti trono ti amin a prinsipe* iti baybay ken ikkatenda dagiti kagayda,* uksobenda dagiti nabordaan a badoda, ket agpigergerdanto.* Agdalupisakdanto ken dida agsardeng nga agpigerger ket agsidsiddaawda a kumita kenka.+ 17  Mangikantadanto kenka iti dung-aw*+ ket ibagada: “Anian ti pannakadadaelmo,+ sika a pagnanaedan ti tattao manipud iti baybay, ti madaydayaw a siudad;Nabilegka iti baybay agraman dagiti agnanaed kenka,+A binutbutengmo ti amin nga umili iti daga! 18  Agpigergerto dagiti isla iti aldaw ti pannakadadaelmo,Mariribukanto dagiti isla iti baybay inton awankan.”’+ 19  “Ta daytoy ti kinuna ti Kangatuan nga Apo Jehova: ‘Inton dadaelenka a kas kadagiti siudad a saan a mapagnanaedan, inton lapunosenka iti dadakkel a dalluyon ken napegges a danum,+ 20  ipababakanto iti abut* agraman ti kakaduam, iti ayan ti tattao a nabayagen a natay; pagnaedenkanto iti kababaan a lugar, kas kadagiti nabayagen a nadadael a lugar, agraman dagidiay bumaba iti abut,+ tapno saankanton a mapagnaedan. Iti kasta, ipadayagkonto* ti daga dagiti sibibiag. 21  “‘Kellaatto a dadaelenka, ket maawankanton.+ Birokendakanto, ngem saandakanto a masarakan,’ kuna ti Kangatuan nga Apo Jehova.”

Footnotes

Wenno “Soberano.”
Lit., “annakna a babbai.”
Lit., “Nabucodorosor,” sabali pay nga ispelingna.
Lit., “tattao.”
Wenno “makina a pagdarupna.”
Wenno “espadana.”
Lit., “napapatay.”
Wenno “panguluen.”
Wenno “awan manggasna a kagayda.”
Lit., “makawesandanto iti panagpigerger.”
Wenno “kanta ti panagladingit.”
Wenno “tanem.”
Wenno “dekorasionakto.”