Ezekiel 39:1-29

  • Pannakadadael ni Gog ken ti armadana (1-10)

  • Pagitabonan iti Tanap ti Hamon-Gog (11-20)

  • Pannakaisubli ti Israel (21-29)

    • Naibukbok ti espiritu ti Dios iti Israel (29)

39  “Anak ti tao, agipadtoka maibusor ken Gog,+ ket ibagam, ‘Daytoy ti kinuna ti Kangatuan* nga Apo Jehova: “Busorenka, Gog, a kangrunaan a panguluen* ti Mesek ken Tubal.+  Iyadayokanto ken iturongka ken pasang-atenka manipud kadagiti kaadaywan a paset ti amianan+ ket ipanka kadagiti bantay ti Israel.  Tippayekto ti baim iti kannigid nga imam ken dagiti panam iti kannawan nga imam.  Matuangkanto kadagiti bantay ti Israel,+ sika ken ti amin a soldadom ken ti tattao a kaduamto. Ipakankanto iti amin a kita ti tumatayab nga agsippayot ken atap nga animal iti tanap.”’+  “‘Matuangkanto iti tanap,+ ta siak a mismo ti nagsao,’ kuna ti Kangatuan nga Apo Jehova.  “‘Mangibaonakto iti apuy maibusor iti Magog ken kadagiti agnanaed a sitatalged kadagiti isla,+ ket maammuandanto a siak ni Jehova.  Ipakaammokto ti nasantuan a naganko iti ilik nga Israel, ket saankonton nga ipalubos a maibabain ti nasantuan a naganko; ket maammuanto dagiti nasion a siak ni Jehova,+ Daydiay Nasantuan ti Israel.’+  “‘Wen, umay daytoy, ket mapasamakto,’ kuna ti Kangatuan nga Apo Jehova. ‘Daytoy ti aldaw nga imbagak.  Rummuarto dagiti agnanaed kadagiti siudad ti Israel ket mangpataudda iti apuy babaen ti armas—dagiti sarapa* ken kalasag, bai ken pana, pang-or* ken gayang. Usarendanto dagita a mangpasged iti apuy+ iti pito a tawen. 10  Saanto a kasapulan nga agalada iti kayo iti tanap, wenno agurnong iti sungrod iti kabakiran ta usarendanto dagiti armas a mangpasged iti apuy.’ “‘Alaendanto ti samsam kadagidiay nagsamsam kadakuada ken agawenda ti sanikua dagidiay nangagaw iti sanikuada,’ kuna ti Kangatuan nga Apo Jehova. 11  “‘Iti dayta nga aldaw, ikkakto ni Gog+ iti disso a pagitabonan iti Israel, iti tanap dagidiay lumaslasat iti daya ti baybay, ket daytanto ti mangserra iti dalan dagidiay lumablabas. Itabondanto sadiay ni Gog ken ti armadana, ket awagandanto dayta iti Tanap ti Hamon-Gog.*+ 12  Pito a bulan nga itabonto ida ti sangakabbalayan ti Israel tapno madalusan ti daga.+ 13  Itabonto ida ti amin nga umili ti daga, ket agdinamagdanto iti aldaw a padayagek ti bagik,’+ kuna ti Kangatuan nga Apo Jehova. 14  “‘Addanto lallaki a madutokan a kanayon a lumabas iti daga ket itabonda dagiti bangkay a nabati iti daga tapno madalusan dayta. Pito a bulan nga itultuloydanto ti agbirok. 15  No adda makita dagidiay lumabas iti daga a tulang ti tao, mangikabildanto iti marka iti abay dayta. Dagidiay nadutokan nga agitabon ti mangitabonto iti dayta idiay Tanap ti Hamon-Gog.+ 16  Addanto met siudad sadiay a maawagan iti Hamona.* Dalusandanto ti daga.’+ 17  “No maipapan kenka, O anak ti tao, daytoy ti kinuna ti Kangatuan nga Apo Jehova: ‘Ibagam iti tunggal kita ti tumatayab ken iti amin nga atap nga animal iti tanap, “Aguummongkayo ket umaykayo. Aguummongkayo iti aglawlaw ti datonko nga insaganak kadakayo, dakkel a daton iti bambantay ti Israel.+ Kanenyonto ti lasag ken inumenyo ti dara.+ 18  Kanenyonto ti lasag dagiti nabileg a tattao ken inumenyo ti dara dagiti panguluen ti daga—dagiti kalakian a karnero, urbon a karnero, kalding, ken kalakian a baka—amin a nalukmeg nga animal ti Basan. 19  Agumakayto iti taba ken uminumkayo iti dara agingga a mabartekkayo manipud iti daton nga insaganak kadakayo.”’ 20  “‘Mabsogkayto iti lamisaanko kadagiti kabalio ken kumakaruahe, nabileg a tattao ken amin a kita ti mannakigubat,’+ kuna ti Kangatuan nga Apo Jehova. 21  “‘Ipakitakto ti dayagko iti tengnga dagiti nasion, ket makitanto ti amin a nasion ti pannakaipakat ti panangukomko ken ti pannakabalinko* maibusor kadakuada.+ 22  Manipud iti dayta nga aldaw, maammuanto ti sangakabbalayan ti Israel a siak ni Jehova a Diosda. 23  Maammuanto dagiti nasion a naipanaw ti sangakabbalayan ti Israel gapu iti biddutda, gapu ta saanda a nagmatalek kaniak.+ Isu a tinallikudak ida*+ ken inyawatko ida kadagiti kabusorda,+ ket napapatayda amin iti espada. 24  Impalak-amko kadakuada ti maitutop iti kinarugit ken basolda, ket inlingedko ti rupak kadakuada.’ 25  “Gapuna, daytoy ti kinuna ti Kangatuan nga Apo Jehova: ‘Isublikto dagidiay naipanaw ken Jacob+ ket kaasiakto ti intero a sangakabbalayan ti Israel.+ Sireregtanto nga idepensak ti* nasantuan a naganko.+ 26  Kalpasan a naibabainda gapu iti saanda a panagmatalek kaniak,+ agnaeddanto a sitatalged iti dagada, nga awan ti pagbutnganda.+ 27  Inton isublik ida manipud kadagiti ili ken ummongek ida manipud kadagiti daga dagiti kabusorda,+ ipakitakto met a nasantuanak iti tengngada iti imatang ti adu a nasion.’+ 28  “‘Maammuandanto a siak ni Jehova a Diosda inton ipalubosko a maipanda kadagiti nasion sa isublik ida iti dagada, nga awan ti mabati kadakuada.+ 29  Saankonton nga ilinged ti rupak kadakuada,+ ta ibukbokkonto ti espirituk iti sangakabbalayan ti Israel,’+ kuna ti Kangatuan nga Apo Jehova.”

Footnotes

Wenno “Soberano.”
Wenno “panguluen a prinsipe.”
Bassit a kalasag a masansan nga awiten dagiti pumapana.
Wenno mabalin a, “sarukod,” maysa nga armas a natirad ti ungtona.
Wenno “Tanap ti Nakaad-adu a Tattao ni Gog.”
Kaipapananna, “Nakaad-adu a Tattao.”
Lit., “imak.”
Lit., “nga inlingedko ti rupak kadakuada.”
Lit., “Ipakitakto ti naipamaysa a debosion iti.”