Ezekiel 43:1-27

  • Mapno ti templo iti dayag ni Jehova (1-12)

  • Ti altar (13-27)

43  Kalpasanna, inturongnak iti ruangan a sumango iti daya.+  Nakitak sadiay ti dayag ti Dios ti Israel a sumungsungad iti daya,+ nga umasping ti timekna iti uni ti agay-ayus a danum,+ ket nasilnagan ti daga babaen ti dayagna.+  Ti nakitak ket kas iti sirmata a nakitak* idi indanonko ti pannakadadael ti siudad, a kalanglangana ti nakitak iti igid ti karayan a Kebar,+ isu a nagrukobak iti daga.  Simrek ti dayag ni Jehova iti templo* a limmasat iti ruangan a sumango iti daya.+  Adda espiritu a nangingato ken nangipan kaniak iti makin-uneg a paraangan, ket nakitak a napno ti templo iti dayag ni Jehova.+  Maysa a lalaki ti nangngegko nga agsasao kaniak manipud iti templo, ket immasideg ken nagtakder iti abayko.+  Kinunana kaniak: “Anak ti tao, daytoy ti ayan ti tronok+ ken pagbatayan ti sakak,+ a pagtaengakto iti tengnga dagiti umili ti Israel iti agnanayon.+ Saanton a rugitan ti sangakabbalayan ti Israel ti nasantuan a naganko,+ isuda ken dagiti arida, babaen ti saanda a panagmatalek kaniak* ken babaen ti bangkay dagiti arida iti ipapatayda.  Gapu iti panangyabayda iti pagserkanda iti pagserkak ken ti hamba ti ridawda iti hamba ti ridawko, a diding laeng ti nagbaetanmi,+ rinugitanda ti nasantuan a naganko babaen ti dakes nga inaramidda, isu nga inibusko ida gapu iti pungtotko.+  Ita, isardengda koma ti panagdayawda iti sabali a dios* ken iyadayoda kaniak ti bangkay dagiti arida, ket agtaengakto iti tengngada iti agnanayon.+ 10  “No maipapan kenka, anak ti tao, iladawam ti templo iti sangakabbalayan ti Israel,+ tapno agbainda kadagiti basolda,+ ket adalenda* koma ti planona. 11  No agbainda iti amin nga inaramidda, ipakaammom kadakuada ti disenio, urnos, dagiti pagruaran, ken pagserkan ti templo.+ Ipakitam ti intero a disenio ken dagiti paglinteganna, ti disenio ken ti lintegna, ket isuratmo iti imatangda, tapno makitada ti intero a disenio ken matungpalda dagiti paglinteganna.+ 12  Daytoy ti linteg maipapan iti templo. Ti intero a paset ti tuktok ti bantay ket kasasantuan.+ Daytoy ti linteg maipapan iti templo. 13  “Dagitoy ti rukod ti altar iti kasiko+ (ti tunggal kasiko ket nanayonan iti sangadakulap).* Ti lansadna ket maysa a kasiko, ken maysa a kasiko ti kaakabana. Sangadangan* ti kaakaba ti pannakasarapa iti intero nga aglikmutna. Daytoy ti lansad ti altar. 14  Dua a kasiko ti rukod ti kangato ti lansad agingga iti umuna a tukad, ket maysa a kasiko ti kaakabana. At-atiddog daytoy a tukad iti maysa a kasiko ngem iti tukad iti ngatuenna. Uppat a kasiko ti kangato ti maikatlo a tukad. At-atiddog met daytoy a tukad iti maysa a kasiko ngem iti tukad iti ngatuenna. 15  Ti pagpuoran ti altar ket uppat a kasiko ti kangatona, ken adda uppat a sara iti uppat a sulina.+ 16  Kuadrado ti pagpuoran ti altar, 12 a kasiko ti kaatiddogna ken 12 a kasiko ti kaakabana.+ 17  Ti uppat a sikigan ti maikatlo a tukad ket 14 a kasiko ti kaatiddogna ken 14 a kasiko ti kaakabana. Ti maikadua a tukad ket kagudua a kasiko, ken maysa a kasiko ti lansadna iti amin a sikigan. “Ken sumango iti daya ti agdanna.” 18  Kalpasanna, imbagana kaniak, “Anak ti tao, daytoy ti kinuna ti Kangatuan* nga Apo Jehova: ‘Dagitoy ti bilin a masurot inton maaramid ti altar, tapno maidatag iti dayta dagiti sibubukel a daton a mapuoran ken maiwarsi ti dara iti rabawna.’+ 19  “‘Ikkam dagiti papadi a Levita a kaputotan ni Zadok+ iti maysa nga urbon a kalakian a baka manipud iti arban kas daton gapu iti basol,+ dagiti umasideg nga agserbi kaniak,’ kuna ti Kangatuan nga Apo Jehova. 20  ‘Alaem ti dadduma a darana sa ikabilmo iti uppat a sara ti altar, iti uppat a suli ti maikatlo a tukad, ken iti pannakasarapa iti intero nga aglikmut, tapno madalusan dayta ken maabbongan ti basol.+ 21  Alaem ti urbon a kalakian a baka, ti daton gapu iti basol, ket puoram iti naituding a disso iti templo, iti ruar ti santuario.+ 22  Iti maikadua nga aldaw, mangidatonka iti nasalun-at a kalakian a kalding kas daton gapu iti basol; ket dalusanda ti altar manipud iti basol kas iti panangdalusda iti dayta manipud iti basol babaen ti urbon a kalakian a baka.’ 23  “‘Inton madalusamon dayta manipud iti basol, mangidatonka iti maysa a nasalun-at nga urbon a kalakian a baka ken maysa a nasalun-at a kalakian a karnero manipud iti arban. 24  Ipaaymo dagita ken Jehova, ket warakiwakan dagita dagiti papadi iti asin+ sa idatonda kas sibubukel a daton a mapuoran para ken Jehova. 25  Iti pito nga aldaw, mangipaayka iti kalakian a kalding kas inaldaw a daton gapu iti basol,+ ken iti maysa nga urbon a kalakian a baka ken maysa a kalakian a karnero manipud iti arban; mangidatonka kadagiti nasalun-at* nga animal. 26  Iti pito nga aldaw, mangaramidda iti panangabbong para iti altar, ket masapul a dalusanda dayta ken isaganada tapno mausar. 27  Inton makompleton dagiti aldaw, iti maikawalo nga aldaw+ ken kalpasanna, idatag dagiti papadi dagiti sibubukel a datonyo* a mapuoran ken dagiti datonyo a pakikappia; ket maragsakanakto kadakayo,’+ kuna ti Kangatuan nga Apo Jehova.”

Footnotes

Wenno mabalin a, “nakitana.”
Lit., “balay.”
Wenno “naespirituan a panagbalangkantisda.”
Wenno “naespirituan a panagbalangkantisda.”
Lit., “rukodenda.”
Tumukoy daytoy iti atiddog a kasiko. Kitaem ti App. B14.
Agarup 22.2 cm. Kitaem ti App. B14.
Wenno “Soberano.”
Wenno “perpekto.”
Kayatna a sawen, ti daton dagiti umili.