Ezekiel 25:1-17

  • Padto maibusor iti Ammon (1-7)

  • Padto maibusor iti Moab (8-11)

  • Padto maibusor iti Edom (12-14)

  • Padto maibusor iti Filistia (15-17)

25  Kinuna manen kaniak ni Jehova:  “Anak ti tao, sumangoka kadagiti Ammonita,+ ket agipadtoka maibusor kadakuada.+  Ibagam maipapan kadagiti Ammonita, ‘Denggenyo ti sao ti Kangatuan* nga Apo Jehova. Daytoy ti kinuna ti Kangatuan nga Apo Jehova: “Gapu ta kinunam ‘Gunggonam!’ iti santuariok idi narugitan, ken iti Israel idi napanawan, ken iti sangakabbalayan ti Juda idi naipanawda,  itedkanto kas sanikua dagiti taga-Daya. Agkampodanto* iti dagam ken agtoldada iti tengngam. Kanendanto ti bunga ti dagam, ken inumendanto ti gatasmo.  Pagbalinekto ti Rabba+ a pagpastoran kadagiti kamelio ken ti daga dagiti Ammonita kas paginanaan ti arban; ket maammuanyonto a siak ni Jehova.”’”  “Ta daytoy ti kinuna ti Kangatuan nga Apo Jehova: ‘Gapu ta impalakpakmo dagiti imam+ ken impaddakmo dagiti sakam ket nagragsakka ken napalalo ti pananglaismo iti Israel,+  dusaenkanto ken iyawatka kadagiti nasion tapno alaenda dagiti sanikuam. Dadaelenkanto ket saankanton a nasion.+ Ibusenkanto, ket maammuamto a siak ni Jehova.’  “Daytoy ti kinuna ti Kangatuan nga Apo Jehova: ‘Gapu ta imbaga ti Moab+ ken ti Seir,+ “Ti sangakabbalayan ti Juda ket kas iti amin a dadduma pay a nasion,”  ipaluboskonto a maraut dagiti siudad iti pagpatinggaan* ti Moab, agraman ti pintas* ti dagana, ti Bet-jesimot, Baal-meon, ken uray ti Kiriataim.+ 10  Itedkonto dagita agraman dagiti Ammonita kas sanikua dagiti taga-Daya,+ tapno saanton a malagip dagiti Ammonita iti tengnga dagiti nasion.+ 11  Dusaekto ti Moab,+ ket maammuandanto a siak ni Jehova.’ 12  “Daytoy ti kinuna ti Kangatuan nga Apo Jehova: ‘Nagibales ti Edom iti sangakabbalayan ti Juda ken nakaaramid iti nakaro a basol iti panagibalesna kadakuada.+ 13  Gapuna, daytoy ti kinuna ti Kangatuan nga Apo Jehova: “Dusaekto met ti Edom ken papatayek ti tao ken animal sadiay, ket awanto ti agnaed iti dayta.+ Mapapataydanto iti espada manipud Teman agingga iti Dedan.+ 14  ‘Balsekto ti Edom babaen ti ilik nga Israel.+ Ipalak-amdanto ti unget ken pungtotko iti Edom tapno sagabaenda ti panagibalesko,’+ kuna ti Kangatuan nga Apo Jehova.”’ 15  “Daytoy ti kinuna ti Kangatuan nga Apo Jehova: ‘Gapu iti agtultuloy a gura dagiti Filisteo, siraranggas* nga inkagumaanda ti agibales ken mangdadael.+ 16  Gapuna, daytoy ti kinuna ti Kangatuan nga Apo Jehova: “Dusaekto dagiti Filisteo,+ ken papatayekto dagiti Kereteo+ ken dadaelekto dagiti nabati nga agnanaed iti igid ti baybay.+ 17  Balsek ken dusaekto ida iti nakaro, ket maammuandanto a siak ni Jehova inton balsek ida.”’”

Footnotes

Wenno “Soberano.”
Wenno “Ibangondanto dagiti napaderan a kampoda.”
Wenno “bakras.”
Wenno “dekorasion.”
Wenno “addaan pananglais iti kararua.”