Ezekiel 41:1-26

  • Ti santuario ti templo (1-4)

  • Ti pader ken dagiti siled iti sikigan (5-11)

  • Ti patakder iti laud (12)

  • Narukod dagiti patakder (13-15a)

  • Ti uneg ti santuario (15b-26)

41  Kalpasanna, impannak iti makinruar a santuario,* ket rinukodna dagiti adigi iti sikigan; agpada nga innem a kasiko* ti kaakaba ti agsumbangir a sikigan.  Ti kaakaba ti pagserkan ket 10 a kasiko, ken agpada a lima a kasiko ti rukod ti agsumbangir a pader iti sikigan ti pagserkan. Rinukodna dayta, ket 40 a kasiko ti kaatiddogna ken 20 a kasiko ti kaakabana.  Simrek iti uneg* ket rinukodna ti adigi iti sikigan ti pagserkan, dua a kasiko ti kapuskol dayta, ken innem a kasiko ti kaakaba ti pagserkan. Dagiti pader iti sikigan ti pagserkan* ket pito a kasiko.  Kalpasanna, rinukodna ti siled a sumango iti makinruar a santuario, ket 20 a kasiko ti kaatiddogna ken 20 a kasiko ti kaakabana.+ Kinunana kaniak: “Daytoy ti Kasasantuan.”+  Rinukodna ti diding ti templo, ket innem a kasiko ti kapuskolna. Uppat a kasiko ti kaakaba dagiti siled iti sikigan a naipalawlaw iti templo.+  Tallo a kadsaaran dagiti siled iti sikigan, nagtutuon dagita. Adda 30 a siled iti tunggal kadsaaran. Adda pagiparabawan iti aglawlaw ti pader ti templo a pakaikapetan dagiti siled iti sikigan, isu a saan a kimpet dagita iti mismo a pader ti templo.+  Iti agsumbangir a sikigan ti templo, adda agrikus a pagnaan* a lumawlawa bayat nga agturong kadagiti makinngato a siled.+ Lumawlawa dagiti siled manipud umuna a kadsaaran agingga iti maikatlo a kadsaaran a dumalan iti maikadua a kadsaaran.  Nakitak nga adda nangato a plataporma iti aglikmut ti templo, ket innem a kasiko ti kangato dagiti pundasion dagiti siled iti sikigan agingga iti suli.  Lima a kasiko ti kaakaba ti makinruar a pader dagiti siled iti sikigan. Adda espasio* iti abay dagiti siled iti sikigan a paset ti templo. 10  Iti nagbaetan ti templo ken dagiti siled a panganan,*+ adda espasio a 20 a kasiko ti kalawana iti agsumbangir a sikigan. 11  Adda pagserkan iti nagbaetan dagiti siled iti sikigan ken ti espasio iti makin-amianan a sikigan ken adda sabali a pagserkan iti makin-abagatan a sikigan. Lima a kasiko ti kaakaba ti espasio iti intero nga aglikmut. 12  Ti patakder nga adda iti laud a sumango iti espasio ket 70 a kasiko ti kaakabana ken 90 a kasiko ti kaatiddogna; lima a kasiko ti kapuskol ti pader ti patakder iti intero nga aglikmut. 13  Rinukodna ti templo, ket 100 a kasiko ti kaatiddogna. Ti kaatiddog ti espasio, patakder,* ken dagiti paderna ket 100 a kasiko met laeng. 14  Ti kaakaba ti sango ti templo a sumango iti daya ken ti espasio ket 100 a kasiko. 15  Rinukodna ti kaatiddog ti patakder a sumango iti espasio iti likudan, agraman dagiti balkon iti agsumbangir a sikigan, ket 100 a kasiko. Rinukodna met ti makinruar a santuario, ti makin-uneg a santuario,+ ken dagiti beranda iti paraangan, 16  kasta met dagiti pagserkan, dagiti tawa nga umak-akikid ti hambana,+ ken dagiti balkon nga adda kadagita a tallo a paset. Iti asideg ti pagserkan, adda kayo a diding+ manipud iti suelo agingga kadagiti tawa; ket naabbongan dagiti tawa. 17  Narukod ti ngato ti pagserkan, ti uneg ken ruar ti templo, ken ti intero a pader iti aglikmut. 18  Adda dagiti naikitikit a ladawan ti kerubin+ ken kayo a palma.+ Adda kayo a palma iti nagbaetan ti dua a kerubin ken dua ti rupa ti tunggal kerubin. 19  Nakasango ti rupa ti tao iti kayo a palma iti maysa a sikigan, ken nakasango ti rupa ti leon* iti kayo a palma iti sabali a sikigan.+ Kastoy ti pannakaikitikitda iti intero a templo. 20  Manipud iti suelo agingga iti ngato ti pagserkan, adda dagiti naikitikit a ladawan ti kerubin ken kayo a palma iti pader ti santuario. 21  Kuadrado dagiti hamba ti ridaw* ti santuario.+ Iti sango ti nasantuan a disso,* adda kasla 22  kayo nga altar+ a tallo a kasiko ti kangatona ken dua a kasiko ti kaatiddogna. Addaan dayta kadagiti poste iti suli, ken kayo ti babana* ken dagiti sikiganna. Kinunana kaniak: “Daytoy ti lamisaan iti sanguanan ni Jehova.”+ 23  Sagdudua ti ridaw ti makinruar a santuario ken ti nasantuan a disso.+ 24  Adda dua a makupin a rikep dagiti ridaw, dua ti rikep ti tunggal ridaw. 25  Adda dagiti naikitikit a ladawan ti kerubin ken kayo a palma kadagiti ridaw ti santuario, a kas kadagiti naikitikit kadagiti pader.+ Adda met kayo nga atep* iti sango ti beranda iti ruar. 26  Adda met dagiti tawa nga umak-akikid dagiti hambana+ ken ladawan ti kayo a palma iti agsumbangir a sikigan ti beranda, kasta met kadagiti siled iti sikigan ti templo ken kadagiti atep.

Footnotes

Lit., “ti templo.” Iti kapitulo 41 ken 42, tumukoy daytoy a termino iti makinruar a santuario (Nasantuan) wenno iti intero a santuario (ti templo agraman ti Nasantuan ken ti Kasasantuan).
Tumukoy daytoy iti atiddog a kasiko. Kitaem ti App. B14.
Kayatna a sawen, iti makin-uneg a santuario, wenno Kasasantuan.
Lit., “Ti kaakaba ti pagserkan.”
Nalabit tumukoy iti agrikrikus nga agdan.
Nalabit akikid a pagnaan iti aglikmut ti templo.
Wenno “siled.”
Kayatna a sawen, ti patakder iti laud ti santuario.
Wenno “burboran a bumaro a leon.”
Lit., “ti hamba ti ridaw.” Nalabit tumukoy daytoy iti pagserkan ti Nasantuan.
Nalabit tumukoy iti Kasasantuan.
Lit., “kaatiddogna.”
Wenno “pataguab.”