Ezekiel 6:1-14
6 Kinuna manen kaniak ni Jehova:
2 “Anak ti tao, sumangoka kadagiti bantay ti Israel ket agipadtoka maibusor kadagita.
3 Ibagam, ‘O dakayo a bantay ti Israel, denggenyo ti sao ti Kangatuan* nga Apo Jehova: Daytoy ti kinuna ti Kangatuan nga Apo Jehova kadagiti bantay, turod, waig, ken tanap: “Mangyegakto iti espada maibusor kadakayo, ket dadaelekto dagiti nangato a dissoyo.
4 Maikkatto dagiti altaryo, madadaelto dagiti altar ti insiensoyo,+ ken ibellengkonto ti bangkay dagiti napapatay iti sanguanan dagiti makarimon nga idoloyo.*+
5 Ibellengkonto ti bangkay dagiti umili ti Israel iti sanguanan dagiti makarimon nga idoloda, ken iwarawarakto dagiti tulangyo iti aglikmut dagiti altaryo.+
6 Iti amin a lugar a pagnaedanyo, madadaelto dagiti siudad+ ken nangato a disso ket mabaybay-anto dagita.+ Marugpo ken madadaelto dagiti altaryo, maawanto dagiti makarimon nga idoloyo, madadaelto dagiti altar ti insiensoyo, ken mapukawto amin nga inaramidyo.
7 Matuangto iti nagtetengngaanyo ti bangkay dagiti napapatay,+ ket maammuanyonto a siak ni Jehova.+
8 “‘“Ngem addanto iteddak, ta makalasatto ti sumagmamano kadakayo iti espada dagiti nasion inton maiwarawarakayo iti intero a daga.+
9 Malagipdakto dagidiay nakalasat kadagiti nasion a nakaipananda.+ Maamirisdanto a nasaktan ti pusok gapu iti di matalek* a pusoda a timmallikud kaniak+ ken dagiti matada nga aggartem* kadagiti makarimon nga idoloda.+ Mabaindanto ken kagurada ti amin a dakes ken makarimon nga inaramidda.+
10 Maammuandanto a siak ni Jehova ken saan a pamutbuteng daytoy a didigra nga iyegko kadakuada.”’+
11 “Daytoy ti kuna ti Kangatuan nga Apo Jehova: ‘Agpalakpakka ken ipaddakmo ta sakam ken sangitam ti amin a dakes ken makarimon a banag nga inaramid ti sangakabbalayan ti Israel, ta mataydanto iti espada, nakaro a bisin, ken makapapatay a sakit.+
12 Matayto iti makapapatay a sakit daydiay adda iti adayo, matayto iti espada daydiay adda iti asideg, ken matayto iti nakaro a bisin ti asinoman a matedda ken makalasat kadagita; ket naan-anayto nga ibulosko ti pungtotko kadakuada.+
13 Maammuanyonto a siak ni Jehova,+ inton maibelleng ti bangkay dagiti napapatay iti ayan dagiti makarimon nga idoloda, iti aglikmut dagiti altarda,+ iti tunggal nangato a turod, iti amin a tuktok ti bantay, iti sirok ti tunggal narukbos a kayo, ken iti sirok dagiti sanga ti dadakkel a kayo a nangikabilanda kadagiti nabanglo a daton* tapno maay-ayo ti amin a makarimon nga idoloda.+
14 Usarekto ti pannakabalinko maibusor kadakuada ken mabaybay-anto ti dagada, ken ad-addanto a mabaybay-an dagiti disso a pagnanaedanda ngem iti let-ang nga asideg ti Dibla. Ket maammuandanto a siak ni Jehova.’”
Footnotes
^ Wenno “Soberano.”
^ Ti naaramat a Hebreo a sao ket mabalin a mainaig iti sao a naipatarus a “takki” ken nausar kas pangumsi.
^ Wenno “immoral.”
^ Wenno “siiimmoral a sumursurot.”
^ Wenno “nangidatonanda kadagiti makaay-ayo a sayamusom.”
