Ezekiel 13:1-23
13 Kinuna manen kaniak ni Jehova:
2 “Anak ti tao, agipadtoka maibusor kadagiti propeta ti Israel,+ ket ibagam kadagidiay agar-aramid kadagiti bukodda a padto,*+ ‘Denggenyo ti sao ni Jehova.
3 Daytoy ti kinuna ti Kangatuan* nga Apo Jehova: “Kaasi pay dagiti maag a propeta, a mangsursurot iti bukodda a kapanunotan,* uray awan ti nakitada!+
4 O Israel, nagbalin dagiti propetayo a kas kadagiti sora iti tengnga dagiti rebba.
5 Saankayto a mapan kadagiti nadadael a paset dagiti pader a bato tapno tarimaanenyo para iti sangakabbalayan ti Israel,+ tapno makalasat ti Israel iti gubat iti aldaw ni Jehova.”+
6 “Nakakitada kadagiti di umiso a sirmata ken nagipadtoda iti ulbod, dagidiay mangibagbaga, ‘Ti sao ni Jehova ket,’ nupay saan nga imbaon ida ni Jehova, ken nagurayda a pumudno ti imbagada.+
7 Saan aya a di umiso a sirmata ti nakitayo ken ulbod ti impadtoyo idi imbagayo, ‘Ti kuna ni Jehova ket,’ nupay awan imbagak?”’
8 “‘Gapuna, daytoy ti kinuna ti Kangatuan nga Apo Jehova: “‘Busorenkayo ta di umiso ti imbagayo ken ulbod dagiti sirmatayo,’ kuna ti Kangatuan nga Apo Jehova.”+
9 Usarekto ti nabileg nga imak maibusor kadagiti propeta a di umiso ti sirmatada ken ulbod ti padtoda.+ Saandanto a karaman kadagidiay nasinged kaniak; saandanto met a maisurat iti pagparehistruan ti sangakabbalayan ti Israel; ket maammuanyonto a siak ti Kangatuan nga Apo Jehova.+
10 Mapasamak amin dagitoy ta inyaw-awanda ti ilik nga ibagbagada, “Adda talna!” nupay awan ti talna.+ Inton maibangon ti narukop a pader, pinturaanda dayta iti puraw.’*+
11 “Ibagam kadagiti agpimpintura a marbanto ti pader. Umayto ti napigsa a tudo, agtinnagto ti uraro,* ken rakrakento dayta ti napigsa nga angin.+
12 Maisaludsodto kadakayo inton marba ti pader, ‘Ayan ti impinturayo?’+
13 “Gapuna, daytoy ti kinuna ti Kangatuan nga Apo Jehova: ‘Mangibaonakto iti napigsa nga angin gapu iti pungtotko, napigsa a tudo gapu iti ungetko, ken pagtinnagekto ti uraro gapu iti pungtotko.
14 Dadaelen ken rebbaekto ti pader a pininturaanyo, ket makitanto ti pundasionna. Madadaelkayto met inton marba ti siudad, ket maammuanyonto a siak ni Jehova.’
15 “‘Inton naan-anay nga ibulosko ti pungtotko iti pader ken kadagidiay nangpintura iti dayta, ibagakto kadakayo: “Awanen ti pader, ken awanen dagidiay nangpintura iti dayta.+
16 Awanen dagiti propeta ti Israel, dagidiay agipadpadto iti Jerusalem ken makakitkita kadagiti sirmata ti talna para iti dayta, nupay awan ti talna,”’+ kuna ti Kangatuan nga Apo Jehova.
17 “Ngem sika, anak ti tao, kumitaka iti annak a babbai dagiti kailiam nga agar-aramid iti bukodda a padto, ket agipadtoka maibusor kadakuada.
18 Ibagam kadakuada, ‘Daytoy ti kinuna ti Kangatuan nga Apo Jehova: “Kaasi pay dagiti babbai nga agdadait iti bedbed para iti amin nga ima* ken agar-aramid iti abungot para iti ulo ti tunggal tao a nagduduma ti katayagna tapno anupenda ti biag* ti tattao! An-anupenyo kadi ti biag* dagiti tattaok ket padpadasenyo nga isalakan ti biagyo?*
19 Ibabaindak kadi iti tengnga dagiti tattaok para iti sumagmamano a rakem a sebada ken sumagmamano a pirsay ti tinapay,+ a papatayenyo dagidiay saan a rumbeng a matay ken taginayonenyo a sibibiag dagidiay saan a rumbeng nga agbiag, babaen ti panagulbodyo iti ilik, a dimngeg kadagiti ulbod nga imbagayo?”’+
20 “Gapuna, daytoy ti kinuna ti Kangatuan nga Apo Jehova: ‘Busorek dagiti bedbedyo, O babbai, a pinanganupyo kadagiti tattao* a kas iti billit. Agawekto ida iti imayo ket ibulosko dagidiay an-anupenyo a kas iti billit.
21 Pisangekto ti abungotyo ken isalakanko ti ilik iti imayo, isu a saanyonton a maanup ida; ket maammuanyonto a siak ni Jehova.+
22 Ta inupayyo daydiay nalinteg gapu iti kinaulbodyo+ nupay diak kayat a parigaten,* ken pinapigsayo ti ima daydiay dakes,+ isu a saanna a tinallikudan ti dakes nga aramidna tapno agbiag koma.+
23 Gapuna, dakayo a babbai, saankayton a makakita iti di umiso a sirmata ken dikayton agbuyon.+ Isalakankonto ti ilik iti imayo, ket maammuanyonto a siak ni Jehova.’”
Footnotes
^ Wenno “agipadpadto iti bukodda a puso.”
^ Wenno “Soberano.”
^ Lit., “bukodda nga espiritu.”
^ Kayatna a sawen, panagbangon iti nakapuy a diding ken napapuraw tapno aglanglanga a natibker.
^ Lit., “ken agtinnagkayto, dakayo nga uraro.”
^ Kayatna a sawen, bedbed ti salamangkero a maiputipot iti siko wenno pungupunguan.
^ Wenno “kararua.”
^ Wenno “kararua.”
^ Wenno “kararuayo.”
^ Wenno “kararua.”
^ Wenno “saktan.”
