Ezekiel 10:1-22
10 Bayat a kumitkitaak, adda nakitak iti rabaw ti suelo iti ngato dagiti ulo dagiti kerubin a kasla safiro a bato a kalanglanga ti maysa a trono.+
2 Kinuna ti Dios iti lalaki a nakabado iti lienso:+ “Sumrekka iti nagbabaetan dagiti pilid,+ iti baba dagiti kerubin. Mangalaka kadagiti beggang+ iti nagbabaetan dagiti kerubin ket ipuruakmo dagita iti siudad.”+ Isu a simrek bayat a kumitkitaak.
3 Nakatakder dagiti kerubin iti kannawan ti balay idi simrek ti lalaki, ket napno iti ulep ti makin-uneg a paraangan.
4 Nagpangato ti dayag ni Jehova+ manipud kadagiti kerubin sa napan iti pagserkan ti balay, ket in-inut a napno iti ulep ti balay,+ ken napno ti paraangan iti kinaraniag ti dayag ni Jehova.
5 Mangngeg ti uni dagiti payak dagiti kerubin iti makinruar a paraangan, kas iti timek ti Dios a Mannakabalin-amin no agsao.+
6 Kalpasanna, imbilinna iti lalaki a nakabado iti lienso: “Mangalaka iti apuy iti nagbabaetan dagiti pilid, iti nagbabaetan dagiti kerubin,” ket simrek ken nagtakder iti abay ti pilid.
7 Inyunnat ti maysa kadagiti kerubin ti imana iti apuy nga adda iti nagbabaetan dagiti kerubin.+ Nangala iti bassit nga apuy sa inkabilna iti ima ti nakabado iti lienso.+ Inawatna dayta sa rimmuar.
8 Addaan dagiti kerubin iti kasla ima ti tao iti sirok dagiti payakda.+
9 Bayat a kumitkitaak, adda nakitak nga uppat a pilid iti abay dagiti kerubin, maysa a pilid iti abay ti tunggal kerubin, ken narangrang a kas iti krisolito a bato ti langa dagiti pilid.+
10 Agpapada ti langada nga uppat, a kasla adda pilid iti uneg ti sabali a pilid.
11 No umakarda, makapanda iti uppat a direksion a saanda nga agsikko, ta makapanda iti lugar a sumanguan ti rupa uray saanda nga agsikko.
12 Napno iti mata ti intero a bagi, likud, ima, ken payak dagiti kerubin. Adda pilid a napno iti mata iti abay ti tunggal maysa kadakuada.+
13 Nakangngegak iti timek a nangibaga kadagiti pilid, “Pilid, umabantekayo!”
14 Uppat ti rupa ti tunggal maysa.* Rupa ti kerubin ti umuna, rupa ti tao ti maikadua, rupa ti leon ti maikatlo, ken rupa ti agila ti maikapat.+
15 Agpangato dagiti kerubin—isuda met laeng dagiti sibibiag a parsua* a nakitak iti karayan a Kebar+—
16 ket no umakar dagiti kerubin, umakar met dagiti pilid nga adda iti abayda; no ingato dagiti kerubin dagiti payakda tapno ngumatoda manipud iti daga, saan nga agsikko wenno umakar dagiti pilid nga adda iti abayda.+
17 No agsardengda, agsardeng met dagitoy; ket no ngumatoda, ngumato met dagitoy, ta adda met kadagita ti espiritu a mangtigtignay kadagiti sibibiag a parsua.*
18 Kalpasanna, pimmanaw ti dayag ni Jehova+ iti ngato ti pagserkan ti balay ket nagtalinaed iti ngato dagiti kerubin.+
19 Inngato dagiti kerubin dagiti payakda ket ngimmatoda manipud iti daga bayat a kumitkitaak. Adda met iti abayda dagiti pilid idi immakarda. Nagsardengda iti pagserkan iti makindaya a ruangan ti balay ni Jehova, ket adda iti ngatoda ti dayag ti Dios ti Israel.+
20 Dagitoy ti sibibiag a parsua* a nakitak iti baba ti Dios ti Israel iti karayan a Kebar,+ isu a naammuak a kerubinda.
21 Adda uppat a rupa ken uppat a payak ti tunggal maysa, ken adda dagiti kasla ima ti tao iti sirok dagiti payakda.+
22 Ken dagiti rupada ket kasla kadagiti rupa a nakitak iti abay ti karayan a Kebar.+ Diretso ti panagabante ti tunggal maysa.+
