Ezekiel 33:1-33
33 Kinuna kaniak ni Jehova:
2 “Anak ti tao, agsaoka iti annak dagiti kailiam,+ ket ibagam,“‘Kas pagarigan, mangyegak iti espada iti maysa a daga,+ ket mangala dagiti umili iti dayta a daga iti maysa a tao sa pagbalinenda a parabantay,
3 ket makitana ti espada nga um-umay iti daga, puyotenna ti tangguyob sa pakdaaranna dagiti umili.+
4 No adda makangngeg iti uni ti tangguyob ngem saanna nga ipangag ti pakdaar+ ket umay ti espada a mangala iti biagna,* basolna ti ipapatayna.+
5 Nangngegna ti uni ti tangguyob, ngem saanna nga impangag ti pakdaar. Basolna ti ipapatayna. No koma dimngeg iti pakdaar, naisalakan koma ti biagna.*
6 “‘Ngem no nakita ti parabantay nga um-umay ti espada ket saanna a pinuyotan ti tangguyob+ ken saan a napakdaaran dagiti umili sa immay ti espada a nangala iti biag* ti maysa kadakuada, matayto dayta a tao gapu iti basolna, ngem singirekto ti darana iti parabantay.’*+
7 “Ngem sika, anak ti tao, pinagbalinka a parabantay iti sangakabbalayan ti Israel. No adda mangngegmo nga ibagak, masapul nga ipakdaarmo kadakuada.+
8 No ibagak iti dakes a tao, ‘Dakes a tao, sigurado a matayka!’+ ngem saanmo a pinakdaaran tapno baliwanna ti dalanna, matayto kas dakes a tao gapu iti basolna,+ ngem singirekto kenka ti darana.
9 Ngem no pakdaaram ti dakes a tao a tallikudanna ti aramidna ket saanna a baliwan ti dalanna, matayto gapu iti basolna,+ ngem sigurado a maisalakanmonto ti biagmo.*+
10 “Anak ti tao, ibagam iti sangakabbalayan ti Israel, ‘Kinunayo: “Madagdagsenankami gapu kadagiti panagrebelde ken basolmi, ket in-inutkamin a matay;+ kasano ngarud nga agtultuloykami nga agbiag?”’+
11 Ibagam kadakuada, ‘“Ikarik,” kuna ti sibibiag a Kangatuan* nga Apo Jehova, “saanak a maragsakan iti ipapatay ti dakes a tao,+ no di ket kayatko nga agbalbaliw+ tapno agtultuloy nga agbiag.+ Tallikudanyo, tallikudanyo dagiti dakes nga aramidyo,+ ta apay koma a mataykayo, O sangakabbalayan ti Israel?”’+
12 “Anak ti tao, ibagam iti annak dagiti kailiam, ‘Saanto a ti kinalinteg ti nalinteg a tao ti mangisalakan kenkuana no agrebelde;+ saanto a ti kinadakes ti dakes a tao ti mangitibkol kenkuana no panawanna ti kinadakesna;+ ken saanto nga agtultuloy nga agbiag ti asinoman a nalinteg gapu iti kinalintegna iti aldaw ti panagbasolna.+
13 No ibagak iti nalinteg a tao: “Sigurado nga agtultuloykanto nga agbiag,” ket agtalek iti kinalintegna ken agaramid iti di umiso,*+ saanto a malagip dagiti nalinteg nga aramidna, no di ket matay gapu iti di umiso nga inaramidna.+
14 “‘No ibagak iti dakes a tao: “Sigurado a mataykanto,” ket tallikudanna ti basolna ken agaramid iti umiso ken nalinteg,+
15 ken isubli ti dakes a tao ti innalana a pammatalged+ ken bayadanna ti tinakawna,+ ket surotenna dagiti paglintegan a mangiturong iti biag babaen ti saanna a panangaramid iti di umiso, sigurado nga agtultuloyto nga agbiag.+ Saanto a matay.
16 Awanto kadagiti basol nga inaramidna ti maisingir* kenkuana.+ Gapu ta inaramidna ti umiso ken nalinteg, sigurado nga agtultuloyto nga agbiag.’+
17 “Ngem imbaga dagiti kailiam, ‘Saan a nainkalintegan ti dalan ni Jehova,’ idinto ta ti dalanda ti saan a nainkalintegan.
18 “No panawan ti nalinteg a tao ti kinalintegna ket agaramid iti di umiso, matayto gapu iti dayta.+
19 Ngem no tallikudan ti dakes a tao ti kinadakesna ket agaramid iti umiso ken nalinteg, agtultuloyto nga agbiag gapu iti dayta.+
20 “Ngem imbagayo, ‘Saan a nainkalintegan ti dalan ni Jehova.’+ Ukomekto ti tunggal maysa kadakayo sigun iti aramidna, O sangakabbalayan ti Israel.”
21 Idi agangay, iti maika-12 a tawen, iti maikalima nga aldaw ti maika-10 a bulan kalpasan ti pannakaipanmi iti sabali a daga, immay kaniak ti maysa a tao a nakalibas idiay Jerusalem+ ket kinunana: “Nadadaelen ti siudad!”+
22 Iti rabii sakbay nga immay ti nakalibas a tao, nagtignay kaniak ti pannakabalin* ni Jehova, ket linuktanna ti ngiwatko sakbay nga immay kaniak dayta a tao iti bigat. Iti kasta, naluktan ti ngiwatko ket saanakon nga umel.+
23 Kinuna kaniak ni Jehova:
24 “Anak ti tao, ibagbaga dagiti agnanaed kadagitoy a rebba+ maipapan iti Israel, ‘Maymaysa laeng idi ni Abraham, ket kaskasdi a natagikuana ti daga.+ Ngem adukami; sigurado a naited ti daga kas sanikuami.’
25 “Gapuna, ibagam kadakuada, ‘Daytoy ti kinuna ti Kangatuan nga Apo Jehova: “Mangmangankayo iti taraon nga adda darana,+ tumangtangadkayo kadagiti makarimon nga idoloyo,* ken agibukbukbokkayo iti dara.+ Isu nga apay koma a tagikuaenyo ti daga?
26 Nagtalekkayo iti espadayo,+ nagaramidkayo iti dakes, ken dinennaan ti tunggal maysa kadakayo ti asawa ti kaarrubana.+ Isu nga apay koma a tagikuaenyo ti daga?”’+
27 “Kastoy ti ibagam kadakuada, ‘Daytoy ti kinuna ti sibibiag a Kangatuan nga Apo Jehova: “Ikarik, mapapatayto iti espada dagidiay agnanaed kadagiti rebba; ipakankonto ida kadagiti atap nga animal iti tanap; ken matayto iti sakit dagidiay adda kadagiti pagkamangan ken kueba.+
28 Pagbalinekto a naan-anay a langalang ti daga.+ Agpatingganto ti nakaro a panagpannakkelna, ket mapanawanto dagiti bantay ti Israel,+ nga awan ti lumasat sadiay.
29 Maammuandanto a siak ni Jehova inton pagbalinek a naan-anay a langalang ti daga+ gapu iti amin a dakes nga inaramidda.”’+
30 “Anak ti tao, pagsasaritaandaka dagiti kailiam iti abay dagiti pader ken kadagiti ruangan ti balay.+ Ibagbaga ti tunggal maysa iti kabsatna, ‘Umayka, ket denggenta ti ibaga ni Jehova.’
31 Aguummongdanto nga agtugaw iti sanguanam kas ilik; ket denggendanto ti ibagam, ngem saandanto nga aramiden dagita.+ Ta pasablogandakanto,* ngem naagum ti pusoda iti kuarta.
32 Ibilbilangdaka a kas romantiko a kanta ti ayat, a maikankanta iti napintas a timek ken nasayaat ti pannakatokarna iti dekuerdas nga instrumento. Mangngegdanto ti ibagam, ngem awanto ti mangaramid kadagita.
33 Inton pumudno dayta—ta sigurado a pumudno—maammuandanto nga adda propeta iti tengngada.”+
Footnotes
^ Lit., “mangipanaw kenkuana.”
^ Wenno “kararuana.”
^ Wenno “kararua.”
^ Wenno “panungsungbatekto ti parabantay iti darana.”
^ Wenno “kararuam.”
^ Wenno “Soberano.”
^ Wenno “di kinahustisia.”
^ Lit., “malagip a maibusor.”
^ Lit., “ima.”
^ Ti naaramat a Hebreo a sao ket mabalin a mainaig iti sao a naipatarus a “takki” ken nausar kas pangumsi.
^ Wenno “agsaodanto a sidederrep.”
