Ezekiel 17:1-24

  • Burburtia maipapan iti dua nga agila ken puon ti ubas (1-21)

  • Agbalin a nakadakdakkel a sedro ti naganus a saringit (22-24)

17  Kinuna manen kaniak ni Jehova:  “Anak ti tao, mangibagaka iti burburtia ken proverbio maipapan iti sangakabbalayan ti Israel.+  Ibagam, ‘Daytoy ti kinuna ti Kangatuan* nga Apo Jehova: “Ti dakkel nga agila,+ a dadakkel ti payakna, atiddog dagiti pawisna, ken napno iti napintas a dutdot, ket napan iti Lebanon+ sa nagdisso iti tuktok ti kayo a sedro.+  Kinettelna ti saringit iti tuktok sa impanna iti daga dagiti komersiante* ken indissona iti siudad dagiti komersiante.+  Nangala pay iti sumagmamano a bin-i iti daga+ ket inkabilna iti nadam-eg a talon. Immulana dayta a kas iti kayo a sause iti abay ti adu a danum.  Nagtubo dayta ket nagbalin a nababa, agkalkalatkat a puon ti ubas+ nga agpauneg ti bulongna ken adda iti sirokna dagiti ramutna. Gapuna, nagbalin a puon ti ubas a nagsaringit ken naaddaan kadagiti sanga.+  “‘“Adda sabali pay a dakkel nga agila,+ a dadakkel ti payakna ken atiddog dagiti pawisna.+ Sigagagar nga inggaw-at ti puon ti ubas dagiti ramutna iti agila, nga umadayo iti nakaimulaanna, ken inturongna dagiti bulongna iti agila tapno mapadanuman.+  Naimula daytan iti nasayaat a talon nga asideg iti adu a danum, tapno agsanga iti adu, agbunga, ken agbalin a dakkel a puon ti ubas.”’+  “Ibagam, ‘Daytoy ti kinuna ti Kangatuan nga Apo Jehova: “Agbiagto ngata? Awanto ngata ti mangparut kadagiti ramutna+ a pakalungsotan dagiti bungana ken pakalaylayan dagiti saringitna?+ Magangonto dayta ket saanen a kasapulan ti napigsa a takiag wenno adu a tattao a mangparut kadagiti ramutna. 10  Uray no mayakar iti pakaimulaanna, agbiagto ngata? Saanto ngata a magango a naan-anay no mapul-oyan iti angin iti daya? Magangonto iti nakaimulaan ken nagtubuanna.”’” 11  Kinuna manen kaniak ni Jehova: 12  “Pangngaasim ta ibagam iti rebelioso a sangakabbalayan, ‘Saanmo kadi nga ammo ti kaipapanan dagitoy?’ Ibagam, ‘Napan ti ari ti Babilonia idiay Jerusalem ket innalana ti ari ken dagiti prinsipena sa inyawidna ida idiay Babilonia.+ 13  Innalana pay ti maysa kadagiti annak* ti ari+ ket nakitulag kenkuana ken pinagsapatana.+ Kalpasanna, impanawna dagiti prominente a lallaki iti daga,+ 14  tapno maipababa ti pagarian, ket saanen a makabangon. Makapagtultuloy laeng dayta no tungpalenna ti tulagan.+ 15  Ngem idi agangay, nagrebelde kenkuana ti ari+ babaen ti panangibaonna kadagiti mensaherona idiay Egipto tapno mangala kadagiti kabalio+ ken dakkel nga armada.+ Agballiginto ngata? Makaliklik ngata iti pannusa daydiay mangar-aramid kadagitoy? Mabalinna kadi a sukiren ti tulag a di madusa?’+ 16  “‘“Ikarik,” kuna ti sibibiag a Kangatuan nga Apo Jehova, “matayto idiay Babilonia, iti pagnanaedan ti ari* a namagbalin kenkuana* nga ari, daydiay inumsina ti sapatana ken sinukirna ti tulagna.+ 17  Saanto a makatulong kenkuana a makigubat ti dakkel nga armada ken adu a soldado ni Faraon,+ inton maaramid dagiti bunton a pagdalanan ken maibangon dagiti pader a mangpalawlaw iti siudad tapno mapapatay ti adu a tattao.* 18  Linaisna ti sapata ken sinukirna ti tulag. Inaramidna dagitoy uray no nagkari,* ket madusanto.”’ 19  “‘Gapuna, daytoy ti kinuna ti sibibiag a Kangatuan nga Apo Jehova: “Ikarik, iparabawkonto iti ulona ti resulta ti pananglaisna iti sapatak+ ken panangsukirna iti tulagko. 20  Isaruagkonto ti iketko kenkuana, ket matiliwto iti iketko.+ Ipankonto idiay Babilonia ket ukomekto sadiay ta saan a nagmatalek kaniak.+ 21  Matayto iti espada ti amin a makalasat a soldadona, ken maiwarawaranto iti amin a direksion*+ dagidiay nabati. Ket maammuanyonto a siak, ni Jehova, ti nangibaga iti dayta.”’+ 22  “‘Daytoy ti kinuna ti Kangatuan nga Apo Jehova: “Mangalaakto iti saringit iti murdong ti natayag a sedro+ sa imulak, mangkettelakto iti naganus a saringit iti murdong ti sanga,+ ket imulak iti natayag ken nangato a bantay.+ 23  Imulakto dayta iti nangato a bantay ti Israel; ket dumakkelto dagiti sangana, agbunga, ken agbalin a narukbos a sedro. Agyanto iti dayta ti tunggal kita ti billit ken agaponda kadagiti bulongna. 24  Maammuanto ti amin a kayo iti tanap a siak, ni Jehova, impababak ti natayag a kayo ket impangatok ti nababa a kayo;+ pinaggangok ti nalangto a kayo ket pinagsabongko ti nagango a kayo.+ Siak, ni Jehova, ti nangibaga ken nangaramid iti dayta.”’”

Footnotes

Wenno “Soberano.”
Lit., “iti Canaan.”
Lit., “bin-i.”
Kayatna a sawen, ni Nabucodonosor.
Kayatna a sawen, ni Zedekias.
Wenno “kararua.”
Lit., “intedna ti imana.”
Lit., “iti tunggal angin.”