Ezekiel 12:1-28
12 Kinuna manen kaniak ni Jehova:
2 “Anak ti tao, rebelioso a sangakabbalayan ti pagnanaedam. Adda matada, ngem saanda a makakita, adda lapayagda, ngem saanda a makangngeg,+ ta rebeliosoda a sangakabbalayan.+
3 Ngem sika, anak ti tao, isaganam dagiti gargaretmo a kasla mapanka iti sabali a lugar. Iti aldaw, bayat a kumitkitada, masapul a pumanawka. Pumanawka iti pagtaengam a kasla mapanka iti sabali a lugar bayat a kumitkitada. Bareng mabigbigda ti kaipapanan daytoy, uray no rebeliosoda a sangakabbalayan.
4 Iruarmo dagiti gargaretmo a kasla mapanka iti sabali a lugar iti aldaw bayat a kumitkitada, sa iti rabii bayat a kumitkitada, pumanawka a kasla mapanka iti sabali a lugar.+
5 “Bayat a kumitkitada, abutam ti pader, ket awitem dagiti gargaretmo a rummuar iti dayta.+
6 Bayat a kumitkitada, ibaklaymo dagiti gargaretmo sa iruarmo iti kasipngetan. Abbongam ti rupam tapno saanmo a makita ti daga, ta aramidenka a pagilasinan iti sangakabbalayan ti Israel.”+
7 Inaramidko ti naibilin kaniak. Iti aldaw, inruarko dagiti gargaretko a kasla pumanawak, ken iti rabii, manomano nga inabutak ti pader. Idi nasipngeten, inruarko dagiti gargaretko sa imbaklayko iti imatangda.
8 Kabigatanna, kinuna manen kaniak ni Jehova:
9 “Anak ti tao, saan kadi nga insaludsod kenka ti rebelioso a sangakabbalayan ti Israel, ‘Ania ti ar-aramidem?’
10 Isungbatmo kadakuada, ‘Daytoy ti kinuna ti Kangatuan* nga Apo Jehova: “Daytoy a mensahe ket para iti panguluen+ ti Jerusalem ken iti intero a sangakabbalayan ti Israel iti uneg ti siudad.”’
11 “Ibagam, ‘Siak ti pagilasinan para kadakayo.+ Maaramidto kadakuada ti inaramidko. Maipanaw ken maadipendanto.+
12 Ti panguluen nga adda iti tengngada ibaklaynanto dagiti gargaretna sa pumanaw iti kasipngetan. Abutannanto ti pader sa awitenna dagiti gargaretna a rummuar iti dayta.+ Abbongannanto ti rupana tapno saanna a makita ti daga.’
13 Isaruagkonto ti iketko kenkuana, ket matiliwto iti iketko.+ Kalpasanna, ipankonto idiay Babilonia, iti daga dagiti Caldeo, ngem saannanto a makita dayta; ken matayto sadiay.+
14 Iwarawarakto iti amin a direksion ti amin nga adda iti aglawlawna, dagiti katulongan ken soldadona;+ ket mangasutakto iti espada a mangkamat kadakuada.+
15 Maammuandanto a siak ni Jehova inton iwarawarak ida kadagiti nasion ken iti nadumaduma a pagilian.
16 Ngem ipaluboskonto a makalasat ti sumagmamano kadakuada iti espada, nakaro a bisin, ken makapapatay a sakit, tapno maibagada ti amin a dakes nga aramidda kadagiti nasion a papananda; ket maammuandanto a siak ni Jehova.”
17 Kinuna manen kaniak ni Jehova:
18 “Anak ti tao, agpigergerka a mangan iti tinapaymo sa madanagan ken mariribukanka a manginum iti danummo.+
19 Ibagam kadagiti umili ti daga, ‘Daytoy ti kinuna ti Kangatuan nga Apo Jehova kadagiti agnanaed iti Jerusalem iti daga ti Israel: “Madandanagandanto a mangan iti tinapayda ken mabutbutengdanto a manginum iti danumda, ta naan-anayto a mapanawan ti dagada+ gapu iti kinaranggas ti amin nga agnanaed iti dayta.+
20 Madadaelto dagiti mapagnanaedan a siudad, ken agbalinto a langalang ti daga;+ ket maammuanyonto a siak ni Jehova.”’”+
21 Kinuna manen kaniak ni Jehova:
22 “Anak ti tao, ania daytoy a proverbio a mangmangngeg iti Israel, ‘Lumabas dagiti aldaw, ket agbalin nga awan serserbi ti tunggal sirmata’?+
23 Isu nga ibagam kadakuada, ‘Daytoy ti kinuna ti Kangatuan nga Apo Jehova: “Pasardengekto daytoy a pagsasao, ket saandanton nga usaren a kas proverbio iti Israel.”’ Ngem ibagam kadakuada, ‘Asidegen dagiti aldaw,+ ket mapasamakto ti tunggal sirmata.’
24 Ta awanton ti aniaman nga ulbod a sirmata wenno mangpasablog* a panagbuyon iti sangakabbalayan ti Israel.+
25 ‘“Ta siak, ni Jehova, agsaoakto. Saanto a maitantan ti pannakapasamak ti aniaman nga ibagak.+ Iti kaaldawanyo,+ O rebelioso a sangakabbalayan, agsaoakto ket tungpalek dayta,” kuna ti Kangatuan nga Apo Jehova.’”
26 Kinuna manen kaniak ni Jehova:
27 “Anak ti tao, kastoy ti ibagbaga dagiti umili* ti Israel, ‘Mabayag pay a matungpal ti makitkitana a sirmata, ken agipadpadto maipapan iti adayo pay a masakbayan.’+
28 Gapuna, ibagam kadakuada, ‘Daytoy ti kinuna ti Kangatuan nga Apo Jehova: “‘Saanto a maitantan ti aniaman a sawek; maaramidto ti amin nga ibagak,’ kuna ti Kangatuan nga Apo Jehova.”’”
