Ezekiel 3:1-27
3 Ket kinunana kaniak: “Anak ti tao, kanem ti adda iti sanguanam.* Kanem daytoy a lukot, ket inka agsao iti sangakabbalayan ti Israel.”+
2 Iti kasta, nagngangaak ket impakanna kaniak dayta a lukot.
3 Intuloyna a kinuna: “Anak ti tao, kanem daytoy a lukot nga itedko, tapno mabsogka.” Kinnanko dayta, ket kas kasam-it ti diro iti ngiwatko.+
4 Kinunana kaniak: “Anak ti tao, mapanka iti sangakabbalayan ti Israel ket ibagam kadakuada ti sawek.
5 Ta saanka nga ibabaon iti ili a dimo matarusan ti lengguaheda wenno narigatmo a maawatan ti panagsaoda, no di ket iti sangakabbalayan ti Israel.
6 Saanka nga ibabaon iti adu a nasion a dimo matarusan ti lengguaheda wenno narigatmo a maawatan ti panagsaoda, a dimo maawatan ti ibagbagada. No isuda koma ti pangibaonak kenka, dumngegdanto.+
7 Ngem saanto a dumngeg kenka ti sangakabbalayan ti Israel, ta dida kayat ti dumngeg kaniak.+ Natangken ti ulo ken puso ti amin nga Israelita.+
8 Pinagbalinko ta rupam a kas katangken ti rupada ken ta mugingmo a kas katangken ti mugingda.+
9 Pinagbalinko ti mugingmo a kas iti diamante, a natangtangken ngem iti bato.*+ Dimo kabuteng ida wenno kaamak ti rupada,+ ta rebeliosoda a sangakabbalayan.”
10 Intuloyna a kinuna kaniak: “Anak ti tao, ipapusom ken denggem ti amin a sasao nga ibagak kenka.
11 Mapanka kadagiti naipanaw a kailiam*+ ket agsaoka kadakuada. Ibagam, ‘Daytoy ti kinuna ti Kangatuan* nga Apo Jehova,’ dumngegda man wenno saan.”+
12 Adda espiritu a nangawit kaniak+ ket nangngegko iti likudak ti napigsa a timek a nagkuna: “Maidaydayaw koma iti daytoy a lugar ti dayag ni Jehova.”
13 Nakangngegak iti uni dagiti payak dagiti sibibiag a parsua bayat nga agsisinnagid dagita,+ ken ti uni dagiti pilid iti abayda,+ ken ti napigsa a timek.
14 Inawit ken innalanak ti espiritu, ket nariribukan ken makapungpungtot ti unegko, ngem sibibileg a nagtignay kaniak ti pannakabalin* ni Jehova.
15 Napanak ngarud kadagiti naipanaw a tattao idiay Tel-abib, nga agnanaed idi iti igid ti karayan a Kebar,+ ket nagyanak iti pagnanaedanda. Nakamulenglengak+ iti tengngada iti pito nga aldaw.
16 Iti ngudo ti pito nga aldaw, kinuna kaniak ni Jehova:
17 “Anak ti tao, pinagbalinka a parabantay iti sangakabbalayan ti Israel.+ No adda mangngegmo nga ibagak, masapul nga ipakdaarmo kadakuada.+
18 No ibagak iti dakes a tao, ‘Sigurado a matayka,’ ngem saanmo a pinakdaaran, ken saanka a nagsao a mangpakdaar a tallikudanna ti dakes a dalanna tapno agtalinaed a sibibiag,+ matayto iti basolna gapu ta dakes,+ ngem singirekto kenka ti darana.*+
19 Ngem no pakdaaram ti dakes a tao ket saanna a tallikudan ti kinadakesna ken ti dakes a dalanna, matayto gapu iti basolna, ngem maisalakanmonto ti biagmo.*+
20 Ngem no panawan ti nalinteg a tao ti kinalintegna ket agaramid iti di umiso,* mangikabilakto iti pakaitibkolanna ket matayto.+ No saanmo a pinakdaaran, matay iti basolna ket saanto a malagip dagiti nalinteg nga aramidna, ngem singirekto kenka ti darana.*+
21 Ngem no pinakdaaram ti nalinteg a tao a saan koma nga agbasol ket saan a nagbasol, sigurado nga agtalinaedto a sibibiag ta napakdaaran,+ ket maisalakanmonto ti biagmo.”*
22 Nagtignay kaniak sadiay ti pannakabalin ni Jehova, ket kinunana: “Tumakderka, mapanka iti tanap, ket agsaoakto kenka sadiay.”
23 Timmakderak ket napanak iti tanap. Adda sadiay ti dayag ni Jehova,+ a kas iti dayag a nakitak iti igid ti karayan a Kebar,+ ket nagrukobak.
24 Simrek kaniak ti espiritu ket pinagtakdernak+ sa kinunana:
“Mapanka, agpupokka iti balaymo.
25 Anak ti tao, galutandakanto iti tali tapno saanka a makapan iti tengngada.
26 Idekketkonto ti dilam iti ngadasmo, ket agumelkanto ken saanmo a matubngar ida, ta rebeliosoda a sangakabbalayan.
27 Ngem no agsaoak kenka, luktakto ta ngiwatmo, ket masapul nga ibagam kadakuada,+ ‘Daytoy ti kinuna ti Kangatuan nga Apo Jehova.’ Dumngeg koma daydiay dumdumngeg,+ ngem saan daydiay saanna a kayat ti dumngeg, ta rebeliosoda a sangakabbalayan.+
