Ezekiel 16:1-63

  • Panagayat ti Dios iti Jerusalem (1-63)

    • Nasarakan kas napanawan nga anak (1-7)

    • Arkosan ti Dios ken makitulag kenkuana kas asawa (8-14)

    • Saan nga agmatalek (15-34)

    • Nadusa kas mannakikamalala (35-43)

    • Naikompara iti Samaria ken Sodoma (44-58)

    • Lagipen ti Dios ti tulagna (59-63)

16  Kinuna manen kaniak ni Jehova:  “Anak ti tao, ipakaammom iti Jerusalem dagiti dakes nga aramidna.+  Ibagam, ‘Daytoy ti kinuna ti Kangatuan* nga Apo Jehova iti Jerusalem: “Nagtaud ken nayanakka iti daga dagiti Canaanita. Amoreo+ ti amam ken Heteo+ ti inam.  Idi aldaw a nayanakka, saan a napugsat ti pusegmo, saanka a nadalusan iti danum, saanka a naaprosan iti asin, ken saanka a nabungon iti lupot.  Awan ti naasian kenka a mangaramid iti aniaman kadagitoy a banag. Wen, awan ti naasian kenka. Naibellengka ketdi iti tanap ta naguraka* idi aldaw a nayanakka.  “‘“Idi limmabasak, nakitaka nga agkusaykusay iti daram, ket bayat a nakaiddaka iti daram, kinunak: ‘Agbiagka!’ Wen, kinunak bayat a nakaiddaka iti daram: ‘Agbiagka!’  Pinagbalinka a nakataytayag a kas kadagiti mula nga agtubo iti talon, ket dimmakkel, pimmigsa, ken insuotmo dagiti kasayaatan nga arkos. Dimmakkel dagiti susom, ken immatiddog dagiti buokmo; ngem labuska pay laeng.”’  “‘Idi limmabasak ken nakitaka, nadlawko nga addakan iti edad a makiinnayat. Isu nga inyabbongko kenka ti badok*+ ket inabbongak ti labus a bagim ken nagsapataak ken nakitulagak kenka,’ kuna ti Kangatuan nga Apo Jehova, ‘ket nagbalinka a kukuak.  Binugguanka pay iti danum ken inikkatko ti dara iti bagim sa sinapsapuanka iti lana.+ 10  Kalpasanna, binaduanka iti nabordaan a lupot ken inikkanka iti napintas a lalat* a sandalias ken binalkutka iti napino a lienso, sa binaduanka kadagiti nangina a lupot. 11  Inarkosanka ket nangikabilak kadagiti pulseras iti imam ken kuentas iti tengngedmo. 12  Nangikabilak met iti aritos iti agong ken lapayagmo ken iti napintas a korona iti ulom. 13  Inar-arkosam ti bagim iti balitok ken pirak, ken nagbadoka iti napino a lienso, nangina a lupot, ken nabordaan a kawes. Napino nga arina, diro, ken lana ti kankanem, ket nagbalinka a nakapimpintas,+ ken maikari kas reyna.’”* 14  “‘Nagdinamag ti kinalatakmo* kadagiti nasion+ gapu iti kinapintasmo, ta perpekto dayta gapu ta inkabilko kenka ti kinangayedko,’+ kuna ti Kangatuan nga Apo Jehova.” 15  “‘Ngem nagtalekka iti kinapintasmo+ ket nagbalinka a balangkantis gapu iti kinalatakmo.+ Nakirelasionka iti asinoman a lumabas,+ ket intedmo ti bagim kadakuada. 16  Innalam ti dadduma a dekolor a badom ket dinekorasionam dagiti nangato a disso a nakirelasionam+—a saan a rumbeng a maaramid ken saan met a rumbeng a mapasamak. 17  Innalam met dagiti napintas nga alahasmo* a balitok ken pirak nga intedko ket nangaramidka kadagiti imahen ti lalaki sa nakirelasionka kadagita.+ 18  Innalam pay dagiti nabordaan a badom ket inyabbongmo kadagita,* sa indatonmo kadagita ti lana ken insiensok.+ 19  Ti tinapay nga intedko kenka—a naaramid iti napino nga arina, lana, ken diro nga intedko a kanem—impaaymo met kadakuada kas daton a makaay-ayo* ti banglona.+ Kasta ti napasamak,’ kuna ti Kangatuan nga Apo Jehova.” 20  “‘Innalam ti annakmo a lallaki ken babbai nga inyanakmo kaniak,+ ket indatonmo kadagiti idolo+—saan pay kadi nga umdas ti panagbalangkantismo? 21  Pinapataymo ti annakko, ket indatonmo ida babaen ti panangipalasatmo iti apuy.+ 22  Bayat ti panagaramidmo iti dakes ken ti pannakirelasionmo, saanmo a linagip dagiti aldaw ti kinaubingmo idi labuska, nga agkusaykusay iti daram. 23  Kalpasan ti amin a kinadakesmo, kaasika, wen, kaasika pay,’+ kuna ti Kangatuan nga Apo Jehova. 24  ‘Nangbangonka iti pagdaydayawam ken nangaramidka iti nangato a dissom iti tunggal plasa. 25  Binangonmo dagiti nangato a dissom iti kalatakan a lugar iti tunggal kalsada, ken pinagbalinmo a makapasuron ti kinapintasmo babaen ti pannakirelasionmo* iti asinoman nga aglabas,+ ket pinakarom ti panagbalangkantismo.+ 26  Nakirelasionka iti annak a lallaki ti Egipto,+ dagiti naderrep a kaarrubam,* ket pinagpungtotnak gapu iti nakaad-adu a panagbalangkantismo. 27  Gapuna, usarekto ti pannakabalinko maibusor kenka ket kissayak ti sustentom a taraon+ ken aramidek kenka ti kayat ti babbai a manggurgura kenka,+ ti annak a babbai dagiti Filisteo, a naibabain gapu iti naalas nga aramidmo.+ 28  “‘Gapu ta saanka a mapmapnek, nakirelasionka iti annak a lallaki ti Asiria,+ ngem saanka latta a napnek. 29  Pinakarom ti panagbalangkantismo iti daga dagiti komersiante* ken kadagiti Caldeo,+ ngem saanka a napnek uray kalpasan dayta. 30  Anian a nagdakes* ti pusom,’* kuna ti Kangatuan nga Apo Jehova, ‘idi inaramidmo amin dagitoy a banag, a nagtignayka a kas iti awan babainna a balangkantis!+ 31  Ngem idi binangonmo ti pagdaydayawam iti kalatakan a lugar iti tunggal kalsada ken nangaramidka iti nangato a dissom iti tunggal plasa, nagbalinka a kasla saan a balangkantis ta saanmo a kayat ti mabayadan. 32  Mannakikamalalaka nga asawa a mangay-ayat kadagiti estranghero imbes a ti asawam!+ 33  Mangted ti tattao iti sagut iti amin a balangkantis,+ ngem sika ti nangted iti sagut iti amin nga agtartarigagay kenka,+ ken pinasuksokam ida tapno makirelasion kenka ti amin nga adda iti aglawlawmo.+ 34  Sabsabalika no idilig iti dadduma a babbai nga agbalbalangkantis. Awan ti nagbalangkantis a kas iti ar-aramidem! Sika ti agbaybayad, ken saandaka a baybayadan. Baliktad ti ar-aramidem.’ 35  “Gapuna, O balangkantis,+ denggem ti sao ni Jehova. 36  Daytoy ti kinuna ti Kangatuan nga Apo Jehova, ‘Gapu ta nakaro unay ti kinaderrep ken kinalamolamom iti pannakirelasionmo kadagiti mangay-ayat kenka ken iti amin a makarimon, makapasuron nga idolo*+ a nangidatonam pay iti dara ti annakmo,+ 37  ummongek ngarud ti amin a mangay-ayat kenka a pinaragsakmo, amin nga inayatmo agraman ti amin a ginuram. Ummongekto ida a bumusor kenka manipud iti intero nga aglawlaw ket ipakitak ti labus a bagim, tapno makitadaka a labus.+ 38  “‘Ipalak-amkonto kenka ti pannusa a maikari iti babbai a mannakikamalala+ ken agibukbukbok iti dara,+ ket maibukbokto ti daram gapu iti pungtot ken imon.+ 39  Iyawatkanto iti imada, ket rebbaendanto dagiti pagdaydayawam ken dagiti nangato a dissom.+ Ikkatendanto dagiti bado+ ken napintas nga alahasmo*+ ket panawandaka a nakalabus. 40  Mangibaondanto iti adu a tattao+ a mangubor kenka+ ket patayendakanto iti espada.+ 41  Puorandanto dagiti balaymo+ ket dusaendaka iti imatang ti adu a babbai. Pagpatinggaekto ti panagbalangkantismo,+ ket saankanton nga agbayad. 42  Bumaawto ti pungtotko kenka+ inton maipapasko dayta.+ Agkalmaak ken saanakton a makapungtot.’ 43  “‘Gapu ta dimo linagip dagiti aldaw ti kinaagtutubom+ ken pinagpungtotnak gapu kadagitoy nga inaramidmo, ipalak-amkonto kenka ti resulta dagiti aramidmo,’ kuna ti Kangatuan nga Apo Jehova, ‘ket saanmonton nga itultuloy ti naalas a kababalinmo ken dagiti dakes nga aramidmo. 44  “‘Asinoman nga agusar iti proverbio iyaplikarnanto kenka daytoy a pagsasao: “No ania ti ina, kasta met ti anakna a babai!”+ 45  Sika ti anak a babai ti inam, a nanglais iti asawa ken annakna. Ken sika ti kabsat dagiti kakabsatmo a babbai, a nanglais iti assawa ken annakda. Heteo ti inayo ken Amoreo+ ti amayo.’” 46  “‘Manangmo ti Samaria,+ nga agnanaed iti amianam* a kaduana ti annakna a babbai.*+ Adingmo ti Sodoma,+ nga agnanaed iti abagatam* a kaduana ti annakna a babbai.+ 47  Saanmo laeng a tinulad dagiti kababalin ken dakes nga aramidda, no di ket nagalisto a nagbalinka a dakdakes ngem kadakuada.+ 48  Ikarik,’ kuna ti sibibiag a Kangatuan nga Apo Jehova, ‘saan nga inaramid ti Sodoma a kabsatmo ken ti annakna a babbai ti inaramidyo nga agiina. 49  Daytoy ti biddut ti Sodoma a kabsatmo: Natangsitda+ nga agiina,+ adu ti taraonda,+ ken awan pakaburiboranda;+ ngem dida tinulongan dagiti marigrigatan ken napanglaw.+ 50  Nagtultuloyda a natangsit+ ken nagar-aramid iti dakes iti imatangko,+ isu a masapul nga ikkatek ida.+ 51  “‘Saan pay a nakagudua ti Samaria+ iti kaadu ti basolmo. Pinaadum ti dakes nga aramidmo nga ad-adu ngem kadakuada, nga uray la nagparang a nalinteg dagiti kakabsatmo gapu iti amin a dakes nga aramidmo.+ 52  Lak-amem itan ti pannakaibabainmo ta inkalintegam ti kababalin dagiti* kakabsatmo. Gapu ta dakdakes ti basolmo ngem kadakuada, nalinlintegda ngem sika. Isu nga ita, maibabainka, malalaiska ta pinagbalinmo a kasla nalinteg ti kakabsatmo.’ 53  “‘Ummongekto dagiti tiniliwda, dagiti tiniliw ti Sodoma ken ti annakna ken dagiti tiniliw ti Samaria ken ti annakna; ummongekto met dagiti tiniliwmo,+ 54  tapno lak-amem ti pannakaibabainmo; ket mariknamto ti pannakaibabain gapu iti panangliwliwam kadakuada. 55  Ti kakabsatmo, ti Sodoma ken ti annakna, agsublidanto iti dati a kasasaadda, ken ti Samaria ken ti annakna, agsublidanto iti dati a kasasaadda, ket sika ken ti annakmo, agsublikayto iti dati a kasasaadyo.+ 56  Saan a maikari a dakamatem ti kabsatmo a Sodoma iti aldaw ti panagtangsitmo, 57  sakbay a naipakaammo ti kinadakesmo.+ Ita, umsiendaka ti annak a babbai ti Siria ken dagiti kaarrubana, ken laisendaka ti annak a babbai dagiti Filisteo,+ ti amin nga adda iti aglawlawmo. 58  Lak-amemto ti resulta ti naalas a kababalinmo ken dagiti dakes nga aramidmo,’ kuna ni Jehova.” 59  “Ta daytoy ti kinuna ti Kangatuan nga Apo Jehova, ‘Aramidekon kenka ti kas iti inaramidmo,+ ta linaismo ti sapatam babaen ti panangsukirmo iti tulagko.+ 60  Ngem lagipekto ti tulagko kenka kadagiti aldaw ti kinaagtutubom, ket mangaramidakto kenka iti permanente a tulag.+ 61  Malagipmonto ti kababalinmo ken mabainka+ inton awatem ti kakabsatmo, dagiti manang ken adingmo, ket itedkonto ida kas annakmo, ngem saan a gapu iti tulagmo.’ 62  “‘Mangaramidakto kenka iti tulag; ket maammuamto a siak ni Jehova. 63  Iti kasta, malagipmonto ken mabainka unay a manginganga iti ngiwatmo gapu iti pannakaibabainmo,+ inton pakawanenka* iti laksid ti amin nga inaramidmo,’+ kuna ti Kangatuan nga Apo Jehova.”

Footnotes

Wenno “Soberano.”
Wenno “nagura ti kararuam.”
Wenno “paldak.”
Wenno “lalat ti foka.”
Wenno “maikari iti naarian a saad.”
Lit., “naganmo.”
Wenno “arkosmo.”
Kayatna a sawen, dagiti lallaki nga idolo.
Wenno “makapabang-ar.” Lit., “makapakalma.”
Lit., “panangikayangmo kadagiti sakam.”
Lit., “dagiti kaarrubam a dakkel ti lasagda.”
Lit., “iti Canaan.”
Wenno “nagkapuy.”
Wenno mabalin nga, “Anian a pungtotko kenka.”
Ti naaramat a Hebreo a sao ket mabalin a mainaig iti sao a naipatarus a “takki” ken nausar kas pangumsi.
Wenno “arkosmo.”
Lit., “iti kannigidmo.”
Mabalin a tumukoy kadagiti ili iti aglawlaw.
Lit., “iti kannawanmo.”
Wenno “nakiririka a pabor iti.”
Lit., “mangaramidak iti panangabbong iti basolmo.”