Ezekiel 28:1-26

  • Padto maibusor iti ari ti Tiro (1-10)

    • “Maysaak a dios” (2, 9)

  • Dung-aw para iti ari ti Tiro (11-19)

    • “Addaka idi idiay Eden” (13)

    • ‘Ti nadutokan a manangsalaknib a kerubin’ (14)

    • “Nasarakan kenka ti kinakillo” (15)

  • Padto maibusor iti Sidon (20-24)

  • Maisublinto ti Israel (25, 26)

28  Kinuna manen kaniak ni Jehova:  “Anak ti tao, ibagam iti lider ti Tiro, ‘Daytoy ti kinuna ti Kangatuan* nga Apo Jehova: “Gapu ta timmangsit ti pusom,+ ibagbagam, ‘Maysaak a dios. Nakatugawak iti trono ti dios iti tengnga ti baybay.’+ Ngem maysaka laeng a tao, saan a dios,Nupay ibilbilangmo ti bagim a maysa a dios.   Nasirsiribka ngem ni Daniel.+ Awan ti palimed a nailemmeng kenka.   Bimmaknangka gapu iti sirib ken pannakatarusmo,Ket itultuloymo ti agurnong iti balitok ken pirak iti pagidulinam iti gameng.+   Bimmaknangka unay gapu iti kinalaingmo nga agnegosio,+Ket timmangsit ti pusom gapu iti kinabaknangmo.”’  “‘Gapuna, daytoy ti kinuna ti Kangatuan nga Apo Jehova: “Gapu ta ibilbilangmo ti bagim a maysa a dios,   Iyegko dagiti ganggannaet a bumusor kenka, ti kaulpitan kadagiti nasion,+Ket asutendanto ti espadada maibusor iti kinapintas a nagun-od ti siribmoKen rugitanda ti nadayag a kinangayedmo.+   Ipababadakanto iti abut,*Ket naranggasto ti ipapataymo iti tengnga ti taaw.+   Ibagamto pay la kadi iti mangpapatay kenka, ‘Maysaak a dios’? Maysaka laeng a tao, saan a dios, iti ima dagidiay mangrugrugit kenka.”’ 10  ‘Iti ima dagiti ganggannaet, mataykanto a kas kadagiti di nakugit,Ta siak a mismo ti nagsao,’ kuna ti Kangatuan nga Apo Jehova.” 11  Kinuna manen kaniak ni Jehova: 12  “Anak ti tao, mangikantaka iti dung-aw* maipapan iti ari ti Tiro, ket ibagam, ‘Daytoy ti kinuna ti Kangatuan nga Apo Jehova: “Sika idi ti ulidan ti kinaperpekto,*Napnuanka iti sirib+ ken nakapimpintaska.+ 13  Addaka idi idiay Eden, ti hardin ti Dios. Naarkosanka iti tunggal napateg a bato—Rubi, topasio, ken jaspe;krisolito, onix, ken jade; safiro, turkesa,+ ken esmeralda;Ket naaramid iti balitok dagiti pakaikabilan ken pakaisulbonganda. Naisaganada idi aldaw a naparsuaka. 14  Insaadka kas nadutokan a manangsalaknib a kerubin. Addaka idi iti nasantuan a bantay ti Dios,+ ket nagpagnapagnaka iti tengnga ti umap-apuy a batbato. 15  Awan idi ti pakababalawan ti aramidmo manipud idi aldaw a naparsuakaAgingga a nasarakan kenka ti kinakillo.+ 16  Gapu iti adu a tagilakom,+Napnoka iti kinaranggas, ket nangrugika nga agbasol.+ Isu a papanawenkanto kas narugit a banag iti bantay ti Dios ket dadaelenka,+O manangsalaknib a kerubin, manipud iti ayan ti umap-apuy a batbato. 17  Timmangsit ti pusom gapu iti pintasmo.+ Dinadaelmo ti siribmo gapu iti nadayag a kinangayedmo.+ Ipuruakkanto iti daga.+ Pagbalinenkanto a pagsidsiddaawan iti sanguanan dagiti ari. 18  Rinugitam dagiti santuariom gapu iti adu a basolmo ken nakusit a panagnegosiom. Mangpataudakto iti apuy iti tengngam, ket uramennakanto.+ Pagbalinenkanto a dapo iti daga iti sanguanan ti amin a mangkitkita kenka. 19  Masmasdaawto a kumita ti amin a tattao a makaam-ammo kenka.+ Kellaat ken nakaam-amakto ti panagpatinggam,Ket awankanton iti agnanayon.”’”+ 20  Kinuna manen kaniak ni Jehova: 21  “Anak ti tao, sumangoka iti Sidon,+ ket agipadtoka maibusor kenkuana. 22  Ibagam, ‘Daytoy ti kinuna ti Kangatuan nga Apo Jehova: “Busorenka, O Sidon, ket maipadayagakto iti tengngam;Maammuanto dagiti tattao a siak ni Jehova inton dusaenka ken ipakitak a nasantuanak. 23  Mangibaonakto kenka iti makapapatay a sakit ket agayusto ti dara iti kalsadam. Matuangto iti tengngam dagiti napapatay inton bumusor kenka ti espada manipud iti amin a direksion;Ket maammuandanto a siak ni Jehova.+ 24  “‘“Saanton a mapalikmutan ti sangakabbalayan ti Israel iti makasugat a siitan a mula ken naut-ot a siit,+ dagidiay manglalais kadakuada; ket maammuanto dagiti tattao a siak ti Kangatuan nga Apo Jehova.”’ 25  “‘Daytoy ti kinuna ti Kangatuan nga Apo Jehova: “Inton ummongek manen ti sangakabbalayan ti Israel manipud kadagiti ili a nakaiwarawaraanda,+ maipakitakto a nasantuanak iti tengngada iti imatang dagiti nasion.+ Agnaeddanto iti dagada+ nga intedko ken Jacob nga adipenko.+ 26  Natalgeddanto nga agnaed iti dayta+ ket agibangonda kadagiti balay ken agmulada kadagiti ubas.+ Agnaeddanto a sitatalged inton dusaek ti amin a manglalais kadakuada iti aglawlawda;+ ket maammuandanto a siak ni Jehova a Diosda.”’”

Footnotes

Wenno “Soberano.”
Wenno “tanem.”
Wenno “kanta ti panagladingit.”
Lit., “Mangselselioka idi iti pagtuladan.”