Ezekiel 24:1-27

  • Mayarig ti Jerusalem iti aglatlati a kaldero (1-14)

  • Agserbi kas pagilasinan ti ipapatay ti asawa ni Ezekiel (15-27)

24  Kinuna manen kaniak ni Jehova iti maikasiam a tawen, iti maika-10 nga aldaw ti maika-10 a bulan:  “Anak ti tao, irekordmo daytoy a petsa,* daytoy nga aldaw. Inrugi ti ari ti Babilonia a rauten ti Jerusalem iti daytoy nga aldaw.+  Mangisalaysayka iti proverbio* maipapan iti rebelioso a sangakabbalayan, ket ibagam maipapan kadakuada: “‘Daytoy ti kinuna ti Kangatuan* nga Apo Jehova: “Isaangmo ti kaldero;* iparabawmo iti apuy ken ikkam iti danum.+   Ipisokmo iti dayta dagiti nasayaat a karne,+Ti luppo ken abaga; punnuem iti kasayaatan a tultulang.   Alaem ti kasayaatan a karnero,+ ket sungrodam iti adu a kayo ti sirok ti kaldero. Angrem dagiti karne, ket lutuem dagiti tulang iti uneg dayta.”’  “Gapuna, daytoy ti kinuna ti Kangatuan nga Apo Jehova: ‘Kaasi pay ti siudad ti panagibukbok iti dara,+ ti aglatlati a kaldero, a saan a naikkat ti latina! Saggaysa nga ikkatem ti nagyanna;+ saanka a mangaramid iti binnunot para kadagita.   Ta adda iti dayta ti darana;+ imbukbokna iti dakkel a bato. Saanna nga imbukbok iti daga, tapno magaburan iti tapok.+   Tapno marubroban ti pungtot iti panangipakatko iti pammales,Inkabilko ti darana iti rabaw ti nasileng a dakkel a batoTapno saan koma a maabbongan.’+  “Gapuna, daytoy ti kinuna ti Kangatuan nga Apo Jehova: ‘Kaasi pay ti siudad ti panagibukbok iti dara!+ Sungrodakto iti adu a kayo. 10  Buntonem dagiti kayo ket pasgedam,Lutuem a naimbag ti karne, ibellengmo ti digo, ket bay-am a makset dagiti tulang. 11  Iparabawmo kadagiti beggang ti awan nagyanna a kaldero tapno pumudotTapno bumeggang ti gambangna. Marunawto iti tengngana ti kinarugitna,+ ket maibusto ti latina. 12  Makapaupay ken makabannog,Ta saanto a maikkat ti nakaro a latina.+ Ibellengmo dayta iti apuy agraman ti latina!’ 13  “‘Narugitka gapu iti naalas nga aramidmo.+ Pinadaska a dalusan, ngem saan a maikkat ti kinarugitmo. Saanka a madalusan agingga a bumaaw ti pungtotko kenka.+ 14  Siak, ni Jehova, ti nagsao. Mapasamakto dayta. Sigurado nga agtignayakto, saanakto a malidayan ken saankonto a pagbabawyan dayta.+ Ukomendakanto maitunos iti aramid ken pannakilangenmo,’ kuna ti Kangatuan nga Apo Jehova.” 15  Kinuna manen kaniak ni Jehova: 16  “Anak ti tao, biglanto nga alaek ti ay-ayatem.+ Saanka nga agladingit;* saanka met nga agsangit wenno aglua. 17  Saanmo nga ipakita ti panagladingitmo, ken saanmo nga aramiden dagiti ritual iti panagleddaang iti natay.+ Isuotmo ti turbante+ ken ti sandaliasmo.+ Saanmo nga abbongan ti iming,*+ ken saanmo a kanen ti tinapay nga inted ti dadduma.”*+ 18  Nagsaoak kadagiti umili iti bigat, ket natay ti asawak iti rabii. Isu nga inaramidko iti bigat ti naibilin kaniak. 19  Imbaga kaniak dagiti umili: “Saanmo kadi nga ibaga ti pakainaigan kadakami dagitoy nga ar-aramidem?” 20  Insungbatko: “Kinuna kaniak ni Jehova, 21  ‘Ibagam iti sangakabbalayan ti Israel: “Daytoy ti kinuna ti Kangatuan nga Apo Jehova, ‘Rugitakon ti santuariok,+ ti pagpampannakkelyo, ti napateg kadakayo ken ti tartarigagayan ti pusoyo.* Matayto iti espada ti annakyo a lallaki ken babbai nga imbatiyo.+ 22  Aramidenyonto ti kas iti inaramidko. Saanyonto nga abbongan ti imingyo, ken saanyonto a kanen ti tinapay nga inted ti dadduma.+ 23  Saanyonto nga ikkaten ti turbante iti uloyo ken ti sandalias iti sakayo. Saankayto nga agladingit wenno agsangit. Imbes ketdi, madadaelkayto gapu iti basolyo,+ ket aganug-ogkayto. 24  Nagbalin ni Ezekiel a pagilasinan para kadakayo.+ Aramidenyonto ti inaramidna. Inton mapasamak dayta, maammuanyonto a siak ti Kangatuan nga Apo Jehova.’”’” 25  “No maipapan kenka, anak ti tao, inton ikkatek ti pagkamanganda—ti napintas a banag a pagragsakanda, ti napateg kadakuada, ti tartarigagayan ti pusoda*—agraman ti annakda a lallaki ken babbai,+ 26  ipadamagto dayta kenka daydiay nakalibas.+ 27  Iti dayta nga aldaw, agsaokanto iti daydiay nakalibas, ket saankanton nga umel.+ Agbalinkanto a pagilasinan kadakuada, ket maammuandanto a siak ni Jehova.”

Footnotes

Lit., “ti nagan ti aldaw.”
Wenno “estoria.”
Wenno “Soberano.”
Wenno “nalawa ti ngarabna a kaldero.”
Wenno “Saanmo a banugbogen ti barukongmo.”
Wenno “makinngato a bibig.”
Lit., “ti tinapay ti tattao.”
Wenno “ti kakaasian ti kararuayo.”
Wenno “kararuada.”