Ezekiel 47:1-23

  • Ti karayan nga agayus manipud iti templo (1-12)

    • In-inut nga umadalem ti danum (2-5)

    • Napaimbag ti danum ti Natay a Baybay (8-10)

    • Saan a napaimbag ti nalutlot a disso (11)

    • Agserbi dagiti kayo kas taraon ken agas (12)

  • Dagiti pagpatinggaan ti daga (13-23)

47  Kalpasanna, insublinak iti pagserkan ti templo,+ ket nakakitaak sadiay iti agay-ayus a danum nga agpadaya iti sirok ti pagserkan ti templo, ta iti daya ti sango ti templo.+ Agpababa ti ayus ti danum manipud iti sirok ti kannawan a sikigan ti templo, iti abagatan ti altar.  Indalannak iti ruangan iti amianan+ sa impannak iti ruar ken inturongnak iti makinruar a ruangan a sumango iti daya,+ ket nakakitaak sadiay iti agtedtedted a danum manipud iti kannawan a sikigan.  Idi rimmuar ti lalaki iti daya a nakaiggem iti pagrukod,+ nangrukod iti 1,000 a kasiko* ket pinalasatnak iti danum a pagatlipaylipay.  Kalpasanna, nangrukod manen iti 1,000 a kasiko ket pinalasatnak iti danum a pagattumeng. Nangrukod iti sabali pay a 1,000 a kasiko ket pinalasatnak iti danum a pagassiket.  Idi nangrukod iti sabali pay a 1,000 a kasiko, napeggesen ti danum isu a saankon a maballasiw, ta nakaad-adalem dayta ken masapul a langoyen, maysa a karayan a saan a mapagna.  Insaludsodna kaniak: “Nakitam kadi daytoy, anak ti tao?” Kalpasanna, pinapagnanak nga agsubli iti igid ti karayan.  Idi nagsubliak, nakakitaak iti nakaad-adu a kayo iti agsumbangir nga igid ti karayan.+  Imbagana kaniak: “Agayus daytoy a danum iti makindaya a rehion sa aglayon idiay Araba*+ ken dumanon iti baybay. No makadanon iti baybay,+ mapaimbag ti danum sadiay.  Agbiagto ti nakaad-adu a sibibiag a parsua* iti sadinoman a pagayusan ti danum.* Adunto ti ikan gapu ta agayus sadiay daytoy a danum. Mapaimbagto ti danum ti baybay, ken ti amin nga agnanaed iti pagayusan ti danum. 10  “Agtakderto dagiti mangngalap iti igidna manipud En-gedi+ agingga iti En-eglaim. Addanto pagpamagaan iti iket sadiay. Adunto ti nagduduma a kita ti ikan, kas kadagiti ikan iti Dakkel a Baybay.*+ 11  “Addanto dagiti nalutlot a disso ken alog, ket saanto a mapaimbag dagitoy. Mabaybay-an ken agtalinaeddanto a naapgad.+ 12  “Agtubonto iti agsumbangir nga igid ti karayan ti amin a kita ti kayo a pagtaraon. Saanto a malaylay ti bulongda ken saandanto a maibusan iti bunga. Binulanto a mangpataudda iti baro a bunga, ta aggapu iti santuario ti danum nga agayus kadagita.+ Agserbinto a taraon ti bungada ken agas dagiti bulongda.”+ 13  Daytoy ti kinuna ti Kangatuan* nga Apo Jehova: “Daytoy ti teritoria nga itedyo kas tawid a daga ti 12 a tribu ti Israel, ket dua a kadisso ti bingayto ni Jose.+ 14  Tawidenyonto dayta ken agpapada ti bingayyo.* Inkarik nga itedko daytoy a daga kadagidi ammayo,+ ket ita, maiteden* kadakayo kas tawid. 15  “Daytoy ti pagpatinggaan ti daga iti makin-amianan a sikigan: Manipud iti Dakkel a Baybay a dumalan iti Hetlon+ nga agturong iti Zedad,+ 16  Hamat,+ Berota,+ ken Sibraim, nga adda iti nagbaetan ti teritoria ti Damasco ken teritoria ti Hamat, nga aglayon iti Hazer-haticon, iti abay ti pagpatinggaan ti Hauran.+ 17  Isu a ti pagpatinggaan ket mangrugi iti baybay agingga iti Hazar-enon,+ iti pagpatinggaan ti Damasco iti amianan, ken iti pagpatinggaan ti Hamat.+ Daytoy ti pagpatinggaan iti amianan. 18  “Ti pagpatinggaan iti daya ket mangrugi iti nagbaetan ti Hauran ken Damasco ken iti batog ti Jordan iti nagbaetan ti Gilead+ ken ti Israel. Rukodenyo ti distansia manipud iti pagpatinggaan agingga iti baybay iti daya.* Daytoy ti pagpatinggaan iti daya. 19  “Ti pagpatinggaan iti abagatan* ket mangrugi iti Tamar agingga iti dandanum ti Meribat-kades,+ nga agturong iti Karayan* sa iti Dakkel a Baybay.+ Daytoy ti pagpatinggaan iti abagatan.* 20  “Ti pagpatinggaan iti laud ket ti Dakkel a Baybay, manipud iti pagpatinggaan* agingga iti maysa a lugar a kabatog ti Lebo-hamat.*+ Daytoy ti pagpatinggaan iti laud.” 21  “Pagbibingayanyo daytoy a daga, iti 12 a tribu ti Israel. 22  Pagbibingayanyo daytoy kas tawidyo ken dagiti ganggannaet a residente a naaddaan iti annak bayat a makipagnanaedda kadakayo; ket agbalindanto a kasla pudpudno nga Israelita. Umawatdanto iti tawid a kas kadakayo iti tengnga dagiti tribu ti Israel. 23  Masapul nga ikkanyo ti ganggannaet a residente iti tawidna iti teritoria ti tribu a pagnanaedanna,” kuna ti Kangatuan nga Apo Jehova.

Footnotes

Tumukoy daytoy iti atiddog a kasiko. Kitaem ti App. B14.
Wenno “tanap.”
Wenno “kararua.”
Lit., “ti dua a karayan.”
Kayatna a sawen, ti Mediteraneo.
Wenno “Soberano.”
Lit., “Tawidenyonto dayta, tunggal maysa a kas iti kabsatna.”
Lit., “maitumpongen.”
Kayatna a sawen, ti Natay a Baybay.
Lit., “ti makin-abagatan a sikigan nga agpaabagatan.”
Kayatna a sawen, ti Karayan ti Egipto.
Lit., “ti makin-abagatan a sikigan nga agpaabagatan.”
Kayatna a sawen, manipud iti pagpatinggaan iti abagatan.
Wenno “pagserkan ti Hamat.”