Ezekiel 30:1-26

  • Padto maibusor iti Egipto (1-19)

    • Naipadto ti iraraut ni Nabucodonosor (10)

  • Natukkol ti pannakabalin ni Faraon (20-26)

30  Kinuna manen kaniak ni Jehova:  “Anak ti tao, agipadtoka ket ibagam, ‘Daytoy ti kinuna ti Kangatuan* nga Apo Jehova: “Idung-awyo, ‘Um-umayen ti aldaw!’   Ta asidegen ti aldaw, wen, asidegen ti aldaw ni Jehova.+ Nangisitto ti ulep iti dayta nga aldaw,+ ti naikeddeng a tiempo dagiti nasion.+   Dumtengto ti espada maibusor iti Egipto, ket agbutengto ti Etiopia inton matay ti tattao idiay Egipto;Naala ti kinabaknangna ken nadadael dagiti pundasionna.+   Ti Etiopia,+ Put,+ Lud, ken ti amin a naglalaok a tattao,*Ken ti Cub, agraman ti annak a lallaki iti daga ti tulag,*Ket matayto amin iti espada.”’   Daytoy ti kinuna ni Jehova: ‘Mapapatayto met dagiti mangsupsuporta iti Egipto,Ken maipababanto ti pagpampannakkelna a pannakabalin.’+ “‘Manipud Migdol+ agingga iti Siene,+ mataydanto iti espada,’ kuna ti Kangatuan nga Apo Jehova.  ‘Isudanto ti kakaruan ti pannakalangalangna kadagiti daga, ket dagiti siudadna ti kakaruanto ti pannakadadaelna kadagiti siudad.+  Maammuandanto a siak ni Jehova inton puorak ti Egipto ken maparmek ti amin a kaaliansana.  Iti dayta nga aldaw, mangibaonakto kadagiti mensahero a nakabarko tapno pagpigergerenda ti Etiopia a nalabes ti kompiansana; kabutengdanto ti aldaw a dumteng iti Egipto, ta sigurado a dumteng dayta.’ 10  “Daytoy ti kinuna ti Kangatuan nga Apo Jehova: ‘Pagpatinggaekto ti intero nga armada ti Egipto babaen ti ima ni Ari Nabucodonosor* ti Babilonia.+ 11  Isu ken ti armadana, ti kaulpitan kadagiti nasion,+ ti maibaonto a mangdadael iti daga. Asutendanto ti espadada maibusor iti Egipto ken punnuenda ti daga kadagiti napapatay.+ 12  Pagmagaekto dagiti kanal ti Nilo+ ken ilakokto ti daga iti ima ti dakes a tattao. Dadaelekto ti daga ken ti amin nga adda iti dayta babaen ti ima dagiti ganggannaet.+ Siak, ni Jehova, ti nagsao.’ 13  “Daytoy ti kinuna ti Kangatuan nga Apo Jehova: ‘Dadaelekto met dagiti makarimon nga idolo* ket ikkatekto dagiti awan serserbina a dios ti Nof.*+ Awanton ti prinsipe* manipud Egipto, ket pagbutngekto ti Egipto.+ 14  Dadaelekto ti Patros,+ puorak ti Zoan, ken dusaek ti No.*+ 15  Ibukbokkonto ti pungtotko iti Sin, ti pagkamangan ti Egipto, ken dadaelek dagiti umili ti No. 16  Puorakto ti Egipto. Agbutengto ti Sin, maserrekto ti No, ken marautto ti Nof* iti tengnga ti aldaw! 17  Matayto iti espada ti agtutubo a lallaki ti On* ken Pibeset, ken maipanawto ti tattao kadagiti siudad. 18  Sumipngetto ti aldaw idiay Tehafnehes inton tukkolek sadiay dagiti sangol ti Egipto.+ Agpatingganto ti pagpampannakkelna a pannakabalin,+ maabbonganto iti ulep, ken maipanawto ti tattao kadagiti ilina.+ 19  Dusaekto ti Egipto, ket maammuandanto a siak ni Jehova.’” 20  Iti maika-11 a tawen, iti maikapito nga aldaw ti umuna a bulan, kinuna kaniak ni Jehova: 21  “Anak ti tao, tinukkolko ti takiag ni Faraon nga ari ti Egipto; saanto a mabedbedan tapno saan nga umimbag wenno mapatapatan tapno awan pigsana nga agiggem iti espada.” 22  “Gapuna, daytoy ti kinuna ti Kangatuan nga Apo Jehova: ‘Busorenka, Faraon nga ari ti Egipto,+ ken tukkolekto dagiti takiagna, daydiay napigsa ken daydiay natukkol,+ ket maibbatannanto ti espada.+ 23  Kalpasanna, iwarawarakto dagiti Egipcio kadagiti nasion ken iwarasko ida kadagiti daga.+ 24  Papigsaekto dagiti takiag* ti ari ti Babilonia+ ken ikabilko iti imana ti espadak.+ Tukkolekto dagiti takiag ni Faraon, ket agasugto iti napigsa iti sanguananna* kas iti matmatay a tao. 25  Papigsaekto dagiti takiag ti ari ti Babilonia, ngem agkapuyto dagiti takiag ni Faraon; ket maammuandanto a siak ni Jehova inton ikabilko ti espadak iti ima ti ari ti Babilonia ken usarenna dayta maibusor iti Egipto.+ 26  Iwarawarakto dagiti Egipcio kadagiti nasion ken iwarasko ida kadagiti daga,+ ket maammuandanto a siak ni Jehova.’”

Footnotes

Wenno “Soberano.”
Wenno “amin a naggapu iti sabali a nasion.”
Nalabit tumukoy kadagiti Israelita a nakialiansa iti Egipto.
Lit., “Nabucodorosor,” sabali pay nga ispelingna.
Ti naaramat a Hebreo a sao ket mabalin a mainaig iti sao a naipatarus a “takki” ken nausar kas pangumsi.
Wenno “Memfis.”
Wenno “panguluen.”
Kayatna a sawen, ti Tebes.
Wenno “Memfis.”
Kayatna a sawen, ti Heliopolis.
Wenno “Nayonakto ti pannakabalin.”
Kayatna a sawen, iti sanguanan ti ari ti Babilonia.