Ezekiel 5:1-17
5 “Anak ti tao, mangalaka iti natadem nga espada nga usarem kas labaha ti mammukis. Kiskisam ti ulo ken barbasmo, sa timbangem ken bingaybingayem dagiti buok.
2 Puoramto ti kakatlona iti uneg ti siudad inton makompleton dagiti aldaw ti panangpalawlaw.+ Kalpasanna, alaemto ti sabali pay a kakatlo ket tagbatagbatem iti espada iti intero nga aglawlaw ti siudad.+ Iwarismonto iti angin ti maudi a kakatlo, ket mangasutakto iti espada a mangkamat kadakuada.+
3 “Mangalaka met iti sumagmamano a buok ket ikabilmo kadagiti karenken* ti badom.
4 Alaem ti dadduma a buok ket ipuruakmo iti apuy tapno mapuoran. Agramaramto daytoy nga apuy iti intero a sangakabbalayan ti Israel.+
5 “Kastoy ti kinuna ti Kangatuan* nga Apo Jehova, ‘Daytoy ti Jerusalem. Inkabilko iti tengnga dagiti nasion ken napalawlawan kadagiti pagilian.
6 Ngem sinukirna dagiti pangngeddeng ken paglintegak, a dakdakes pay ti inaramidna ngem kadagiti nasion ken pagilian iti aglawlawna.+ Ta linaksidda dagiti pangngeddengko, ket saanda a nagtulnog kadagiti paglintegak.’
7 “Gapuna, daytoy ti kinuna ti Kangatuan nga Apo Jehova, ‘Gapu ta dakdakeskayo ngem kadagiti nasion iti aglawlawyo ken saankayo a nagtulnog kadagiti paglintegan ken pangngeddengko, no di ket sinurotyo dagiti pangngeddeng dagiti nasion iti aglawlawyo,+
8 daytoy ti kinuna ti Kangatuan nga Apo Jehova: “Bumusorak kenka,+ O siudad, ket ukomenkanto iti imatang dagiti nasion.+
9 Aramidekto kenka ti saanko pay nga inaramid, ken diakton aramiden ti kas iti dayta, gapu iti amin a dakes nga aramidmo.+
10 “‘“Isu a kanento dagiti amma ti annakda,+ ket kanento dagiti annak ti ammada. Ukomenkayto ken iwarawarakto ti nabatbati kadakayo iti amin a direksion.”’*+
11 “‘Gapuna, ikarik,’ kuna ti sibibiag a Kangatuan nga Apo Jehova, ‘gapu ta rinugitanyo ti santuariok babaen ti amin a makarimon nga idolo ken aramidyo,+ laksidenkayto* met; saanakto a maasian, ken saanakto a mangngaasi.+
12 Matayto ti kakatlo kadakayo iti makapapatay a sakit wenno agsagaba iti nakaro a bisin. Mapapatayto iti espada ti sabali pay a kakatlo.+ Iwarawarakto ti maudi a kakatlo iti amin a direksion,* ket mangasutakto iti espada a mangkamat kadakuada.+
13 Iti kasta, agpatingganto ti ungetko ken bumaawto ti pungtotko kadakuada, ket mapnekakto.+ Maammuandanto a siak, ni Jehova, nagsaoak kadakuada gapu ta kalkalikagumak ti naipamaysa a debosion,+ inton naibuloskon ti pungtotko kadakuada.
14 “‘Pagbalinenkanto a nadadael ken malalais a disso iti tengnga dagiti nasion ken iti imatang ti amin a lumabas.+
15 Agbalinkanto a malalais ken mauy-uyaw,+ maysa a pakdaar ken pagbutngan kadagiti nasion iti aglawlawmo, inton ukomenka gapu iti unget, pungtot, ken kadagiti nakaro a pannusa. Siak, ni Jehova, imbagak daytoy.
16 “‘Ibaonkonto kadakuada dagiti makapapatay a pana ti nakaro a bisin. Dagiti pana nga ibaonko ti mangdadaelto kadakayo.+ Pagbalinekto a nakakarkaro ti panagbisinyo babaen ti panangpasardengko iti suplayyo a taraon.*+
17 Mangibaonakto kadakayo iti nakaro a bisin ken kadagiti narungsot nga atap nga animal,+ ket patayendanto dagiti annakyo. Agsagabakayonto gapu iti makapapatay a sakit ken pammapatay, ket mangyegakto iti espada maibusor kadakayo.+ Siak, ni Jehova, imbagak daytoy.’”
