Ezekiel 27:1-36
-
Dung-aw para iti lumlumned a barko ti Tiro (1-36)
27 Kinuna manen kaniak ni Jehova:
2 “Anak ti tao, mangikantaka iti dung-aw* gapu iti Tiro,+
3 ket ibagam iti Tiro,‘Sika nga agnanaed kadagiti pagserkan ti baybay,Ti komersiante para kadagiti umili ti adu nga isla,Daytoy ti kinuna ti Kangatuan* nga Apo Jehova:
“O Tiro, imbagam, ‘Nakapimpintasak.’+
4 Adda dagiti teritoriam iti tengnga ti baybay,Ket pinagbalin dagiti managbangon a perpekto ti kinapintasmo.
5 Inaramidda ti amin a tablam manipud kadagiti kayo a parwa ti Senir,+Ken nangalada iti kayo a sedro manipud Lebanon tapno iyaramidandaka iti poste ti barko.
6 Inaramidda dagiti gaudmo manipud kadagiti kayo a roble ti Basan,Ken naaramid ti puruam iti kayo a sipres a nadisenuan iti marfil manipud kadagiti isla ti Kitim.+
7 Dekolor a lienso manipud Egipto ti layagmo,Ti linong ti kubiertam ket asul a sinulid ken purpura a delana manipud kadagiti isla ti Elisha.+
8 Paragaudmo dagiti agnanaed iti Sidon ken iti Arvad.+
Dagiti eksperto a trabahadormo ti tripulantem, O Tiro.+
9 Dagiti eksperiensiado* ken eksperto a trabahador ti Gebal+ ti nangtapal iti nagsasaipan ti barkom.+
Amin a barko iti baybay ken dagiti marinoda nakisinnukatda kenka iti tagilako.
10 Karaman iti armadam ti lallaki ti Persia, Lud, ken Put, dagiti mannakigubatmo.+
Imbitinda kenka ti kalasag ken helmetda, ket pinapintasdaka.
11 Dagiti lallaki ti Arvad iti armadam ti nangbantay kadagiti padermo,Ket natured a lallaki ti adda kadagiti torrem.
Imbitinda dagiti nagtimbukel a kalasagda kadagiti padermoKen pinagbalinda a perpekto ti kinapintasmo.
12 “‘“Nakinegosio kenka ti Tarsis+ gapu iti adu a kinabaknangmo.+ Pirak, landok, lata, ken buli ti insukatda kadagiti produktom.+
13 Nakisinnukat kenka ti Javan, Tubal,+ ken Mesek,+ a nangtedda kadagiti adipen+ ken alikamen a gambang kas sukat dagiti tagilakom.
14 Dagiti kabalio ken mulo ti insukat ti sangakabbalayan ni Togarma+ para kadagiti produktom.
15 Nakisinnukat kenka dagiti umili ti Dedan;+ paralakom ida; trabahadormo dagiti komersiante ti adu nga isla; nangtedda kenka iti sara a marfil+ ken kayo a kamagong kas buis.
16 Nakinegosio kenka ti Edom gapu iti adu a produktom. Nangtedda iti turkesa, purpura a delana, namaris a nabordaan a lupot, napino a tela, korales, ken rubi kas sukat dagiti produktom.
17 “‘“Nakisinnukat kenka ti Juda ken ti Israel, nga intedda ti trigo ti Minnit,+ napili a taraon, diro,+ lana, ken balsamo+ kas sukat dagiti produktom.+
18 “‘“Nakinegosio kenka ti Damasco+ gapu iti adu a produktom ken iti amin a kinabaknangmo, nga insukatna ti arak ti Helbon ken delana ti Zahar.*
19 Landok a pinanday, kasia,* ken nabanglo a ruot ti insukat ti Vedan ken Javan manipud Uzal para kadagiti produktom.
20 Lupot a pagtugawan* iti bukot ti animal ti insukat ti Dedan+ para kadagiti tagilakom.
21 Trabahadormo dagiti Arabo ken amin a panguluen ti Kedar,+ a komersiante iti urbon a karnero, kalakian a karnero, ken kalakian a kalding.+
22 Nakisinnukat kenka dagiti komersiante ti Sheba ken Raama;+ intedda ti amin a kita ti kasayaatan a bangbanglo, napateg a batbato, ken balitok kas sukat dagiti produktom.+
23 Nakisinnukat kenka ti Haran,+ Canne, Eden,+ dagiti komersiante ti Sheba,+ Assur,+ ken Kilmad.
24 Iti pagtagilakuam, insukatda dagiti napintas a bado, kagay nga asul ken namaris a nabordaan a lupot, ken nadumaduma ti kolorna a karpet, a nagalutan amin iti tali.
25 Dagiti barko ti Tarsis+ ti nangibiahe kadagiti tagilakom,Isu a napunno ken napadagsenanka iti karga* iti tengnga ti taaw.
26 Dagiti paragaudmo impandaka iti nadawel a baybay;Rinebba ti angin iti daya ti barkom iti tengnga ti taaw.
27 Dagiti kinabaknang, produkto, tagilako, marinero, ken tripulantem,Dagiti mangtaptapal iti nagsasaipan ti barkom, dagiti makisinsinnukat iti tagilakom,+ ken amin a mannakigubatmo+—Ti amin a nakaad-adu a tattao* iti tengngam—Lumneddanto amin iti tengnga ti taaw inton madadaelka.+
28 Magunggonto dagiti igid ti baybay inton agpukkaw dagiti tripulantem.
29 Amin a paragaud, marino, ken tripulante,Umulogdanto iti barkoda sa agtakderda iti daga.
30 Agpukkawdanto ken sangitandaka a sipapait+Bayat a purpuruakanda ti uloda iti tapok ken agid-iddada iti dapo.
31 Kalbuendanto ti uloda ken agbadoda iti nakersang a lupot;Sangitandakanto a sipapait* ken nakaronto ti panagdung-awda.
32 Iti panagun-unnoyda, kantaandakanto iti dung-aw:
‘Asino ti kas iti Tiro, a naulimek itan iti tengnga ti baybay?+
33 Idi simrek dagiti produktom manipud iti taaw, pinennekmo ti adu a tattao.+
Ti adu a kinabaknang ken tagilakom ti nangpabaknang kadagiti ari ti daga.+
34 Narbakan iti taaw, iti adalem a danum,+Ket limned a kaduam ti amin a tagilako ken umilim.+
35 Masmasdaawto a kumita kenka ti amin nga agnanaed kadagiti isla,+Ket agpigergerto iti buteng dagiti arida+—mariribukanto ti rupada.
36 Agsagawisiwto dagiti komersiante kadagiti nasion gapu iti napasamak kenka.
Kellaat ken nakaam-amakto ti panagpatinggam,Ket awankanton iti agnanayon.’”’”+
Footnotes
^ Wenno “kanta ti panagladingit.”
^ Wenno “Soberano.”
^ Lit., “lallakay.”
^ Wenno “ken lumabaga a kolor dapo a delana.”
^ Kayo a kapamilia ti kayo a kanela.
^ Wenno “Naabel a lupot a pagtugawan.”
^ Wenno mabalin a, “ken nadayagka.”
^ Lit., “intero a kongregasion.”
^ Wenno “sipapait ti kararuada.”
