Ezekiel 37:1-28

  • Sirmata iti tanap dagiti namaga a tulang (1-14)

  • Dua a baston a mapagtipon (15-28)

    • Maymaysa a nasion nga iturayan ti maysa nga ari (22)

    • Agnanayon a tulag ti kappia (26)

37  Nagtignay kaniak ti pannakabalin* ni Jehova, ket innalanak ti espiritu ni Jehova ken impannak iti tengnga ti tanap+ a napno kadagiti tulang.  Pinalasatnak iti aglawlaw dagita, ket nakaad-adu a tulang ti nakitak a naiwarawara iti tanap, ken nakamagmaga dagita.+  Insaludsodna kaniak: “Anak ti tao, mabalin kadi nga agbiag dagitoy a tulang?” Insungbatko: “O Kangatuan* nga Apo Jehova, sika ti makaammo iti dayta.”+  Iti kasta, kinunana kaniak: “Agipadtoka maipapan kadagitoy a tulang, ket ibagam, ‘Dakayo a namagaan a tulang, denggenyo ti sao ni Jehova:  “‘Daytoy ti kinuna ti Kangatuan nga Apo Jehova kadagitoy a tulang: “Ikkankayto iti anges, ket agbiagkayto.+  Ikkankayto kadagiti pennet ken lasag, kalupkopankayo iti kudil, ken ikkankayo iti anges, ket agbiagkayto; ken maammuanyonto a siak ni Jehova.”’”  Iti kasta, nagipadtoak kas naibilin kaniak. Bayat a nagipadtoak, adda agkakanaltuok nga uni, ket nangrugi nga agsisilpo dagiti tulang.  Nakitak a naaddaan dagita kadagiti pennet ken lasag, ket nakalupkopan dagita iti kudil. Ngem awan pay laeng ti angesda.  Kinunana kaniak: “Agipadtoka iti angin. Agipadtoka, anak ti tao, ket ibagam iti angin, ‘Daytoy ti kinuna ti Kangatuan nga Apo Jehova: “Manipud iti uppat a direksion,* umayka O angin,* ket puyotam dagitoy a napapatay, tapno agbiagda.”’” 10  Gapuna, nagipadtoak kas imbilinna kaniak, ket naaddaan dagita iti anges.* Nagbiag ken nagtakderda,+ ket nagbalinda a nagdakkel nga armada. 11  Kinunana kaniak: “Anak ti tao, dagitoy a tulang ket ti intero a sangakabbalayan ti Israel.+ Ibagbagada, ‘Namagaan dagiti tulangmi, ket napukaw ti namnamami.+ Naan-anay a naisinakami.’ 12  Gapuna, agipadtoka, ket ibagam, ‘Daytoy ti kinuna ti Kangatuan nga Apo Jehova: “Luktakto dagiti tanemyo+ ken ibangonkayo iti tanemyo, dakayo nga ilik, ket ipankayo idiay Israel.+ 13  Maammuanyonto a siak ni Jehova inton luktak dagiti tanemyo ken iruarkayo iti tanemyo, O ilik.”’+ 14  ‘Ikabilkonto kadakayo ti espirituk ket agbiagkayto,+ ken pagnaedenkayto iti dagayo; ket maammuanyonto a siak, ni Jehova, ti nagsao ken nangaramid iti dayta,’ kuna ni Jehova.” 15  Kinuna manen kaniak ni Jehova: 16  “Anak ti tao, mangalaka iti baston ket isuratmo iti dayta, ‘Para ken Juda ken para kadagiti umili ti Israel a kakaduana.’+ Mangalaka iti sabali pay a baston ket isuratmo iti dayta, ‘Para ken Jose, ti baston ni Efraim, ken ti intero a sangakabbalayan ti Israel a kakaduana.’+ 17  Kalpasanna, pagabayem dagita tapno agbalin a kasla maymaysa a baston iti imam.+ 18  Inton ibaga kenka dagiti kailiam,* ‘Saanmo kadi nga ibaga kadakami ti kaipapanan dagitoy a banag?’ 19  ibagam kadakuada, ‘Daytoy ti kinuna ti Kangatuan nga Apo Jehova: “Alaekto ti baston ni Jose, nga adda iti ima ni Efraim, ken dagiti tribu ti Israel a kakaduana, ket itiponkonto ida iti baston ni Juda. Pagbalinekto dagita a maymaysa a baston,+ ket agbalindanto a maymaysa iti imak.”’ 20  Masapul nga iggamam dagiti baston a sinuratam tapno makitada. 21  “Kalpasanna, ibagam kadakuada, ‘Daytoy ti kinuna ti Kangatuan nga Apo Jehova: “Alaekto dagiti Israelita manipud kadagiti nasion nga ayanda, ket ummongekto ida manipud iti tunggal direksion ken ipanko ida iti dagada.+ 22  Pagbalinekto ida a maymaysa a nasion iti daga,+ kadagiti bantay ti Israel, ket maysa nga ari ti mangiturayto kadakuada,+ ken saandanton a dua a nasion; saandanto metten a mabingay iti dua a pagarian.+ 23  Saandanton a rugitan ti bagida kadagiti makarimon nga idoloda* ken iti dakes nga aramidda ken iti amin a basolda.+ Isalakankonto ida iti amin a saanda a panagmatalek a nakaigapuan ti panagbasolda, ket dalusakto ida. Isudanto ti ilik, ket siakto ti Diosda.+ 24  “‘“Ni adipenko a David ti agbalinto nga arida,+ ket maymaysanto ti pastorda.+ Surotendanto dagiti pangngeddengko ken tungpalenda a naimbag dagiti paglintegak.+ 25  Agnaeddanto iti daga nga intedko iti adipenko a ni Jacob, a nagnaedan dagidi ammayo,+ ket agnaeddanto iti dayta iti agnanayon,+ isuda ken ti annakda* ken ti annak ti annakda;+ ket ni adipenko a David ti panguluenda* iti agnanayon.+ 26  “‘“Mangaramidakto kadakuada iti tulag ti kappia;+ agnanayonto dayta a tulag. Ikabilkonto ida iti dagada, paaduek ida,+ ken ikabilko ti santuariok iti tengngada iti agnanayon. 27  Addanto kadakuada* ti toldak,* ket siakto ti Diosda, ken isudanto ti ilik.+ 28  Maammuanto dagiti nasion a siak, ni Jehova, pagbalinek a nasantuan ti Israel inton adda ti santuariok iti tengngada iti agnanayon.”’”+

Footnotes

Lit., “ima.”
Wenno “Soberano.”
Lit., “uppat nga angin.”
Wenno “anges; espiritu.”
Wenno “espiritu.”
Lit., “annak dagiti kailiam.”
Ti naaramat a Hebreo a sao ket mabalin a mainaig iti sao a naipatarus a “takki” ken nausar kas pangumsi.
Wenno “annak a lallaki.”
Wenno “prinsipeda.”
Wenno “iti ngatuenda.”
Wenno “pagtaengak.”