Ezekiel 1:1-28

  • Makakita ni Ezekiel idiay Babilonia kadagiti sirmata manipud iti Dios (1-3)

  • Sirmata maipapan iti nailangitan a karuahe ni Jehova (4-28)

    • Napigsa nga angin, ulep, ken apuy (4)

    • Uppat a sibibiag a parsua (5-14)

    • Uppat a pilid (15-21)

    • Kristal a suelo a sumilapsilap a kasla yelo (22-24)

    • Trono ni Jehova (25-28)

1  Iti maika-30 a tawen, iti maikalima nga aldaw ti maikapat a bulan, bayat a kaduak dagiti naipanaw nga umili+ iti igid ti karayan a Kebar,+ naluktan ti langit ket nakakitaak kadagiti sirmata manipud iti Dios.  Iti maikalima nga aldaw ti bulan—kayatna a sawen, iti maikalima a tawen ti pannakaipanaw ni Ari Jehoiakin+  nagsao ni Jehova ken ni Ezekiel* nga anak ni Buzi a padi nga adda iti igid ti karayan a Kebar iti daga dagiti Caldeo.+ Nagtignay kenkuana sadiay ti pannakabalin* ni Jehova.+  Bayat a kumitkitaak, adda nakitak a napigsa nga angin+ manipud iti amianan, ken adda napuskol nga ulep ken gumilapgilap nga apuy*+ a napalawlawan iti naraniag a lawag, ken adda maysa a kasla nasileng a metal*+ iti tengnga ti apuy.  Adda kasla uppat a sibibiag a parsua+ iti tengngana, ket umasping iti tao ti langada.  Uppat ti rupa ken uppat ti payak+ ti tunggal maysa.  Nakaunnat dagiti sakada, kasla dapan ti urbon a baka dagiti dapanda, ket rumimatrimat dagiti sakada a kas iti napasileng a gambang.+  Adda ima ti tao iti tunggal sirok ti uppat a payakda iti uppat a sikiganda, ken addaanda nga uppat kadagiti rupa ken payak.  Agsisinnagid dagiti payakda. Saanda nga agsikko no umakarda; diretso ti panagabante ti tunggal maysa.+ 10  Kastoy ti langa dagiti rupada: Rupa ti tao iti sango, rupa ti leon+ iti kannawan, rupa ti kalakian a baka+ iti kannigid, ken rupa+ ti agila+ iti likud. 11  Kasta dagiti rupada. Nakaukrad ti dua a payakda iti ngato nga agsinsinnagid ken adda dua a payakda a nangabbong iti bagida.+ 12  Diretso ti panagabante ti tunggal maysa, a mapanda iti sadinoman a pangiturongan kadakuada ti espiritu.+ Saanda nga agsikko no umakarda. 13  Kasla sumsumged a beggang ti apuy ti langa dagiti sibibiag a parsua, ken adda dagiti naraniag a kasla apuy ti aluten nga agsublisubli iti nagbabaetan dagiti sibibiag a parsua, ket adda rumrummuar a kimat manipud iti apuy.+ 14  No mapan ken agsubli dagiti sibibiag a parsua, kasla kimat ti langa ken panagtignayda. 15  Bayat a kitkitaek dagiti sibibiag a parsua, adda nakitak a maysa a pilid iti daga iti abay ti tunggal sibibiag a parsua nga uppat ti rupada.+ 16  Narangrang a kas iti krisolito ti langa ken pakabuklan dagiti pilid, ket agpapada ti langada nga uppat. Ti langa ken pakabuklanda ket kasla iti pilid nga adda iti uneg ti sabali a pilid.* 17  No umakarda, makapanda iti aniaman kadagiti uppat a direksion a saanda nga agsikko. 18  Nakataytayag dagiti basikawda* isu a makapasiddaaw, ken napno iti mata ti intero nga aglikmut dagiti basikawda nga uppat.+ 19  No umakar dagiti sibibiag a parsua, umakar met a kaduada dagiti pilid, ket no ngumato dagiti sibibiag a parsua manipud iti daga, ngumato met dagiti pilid.+ 20  Mapanda iti pangiturongan kadakuada ti espiritu, iti sadinoman a pagturongan ti espiritu. No ngumatoda, ngumato met dagiti pilid, ta ti espiritu a mangtigtignay kadagiti sibibiag a parsua* ket adda met kadagiti pilid. 21  No umakarda, umakar met dagitoy; ket no agsardengda, agsardeng met dagitoy. No ngumatoda manipud iti daga, ngumato met dagiti pilid, ta adda met kadagiti pilid ti espiritu a mangtigtignay kadagiti sibibiag a parsua. 22  Iti ngato dagiti ulo dagiti sibibiag a parsua, adda kasla kristal a suelo a sumilapsilap a kas iti yelo ket nakaskasdaaw ti langana.+ 23  Iti sirok ti suelo, nakaunnat* ken agsinnagid dagiti payakda. Addaan ti tunggal sibibiag a parsua iti dua a payak iti agsumbangir a sikigan ti bagida. 24  Idi nangngegko ti uni dagiti payakda, kasla uni ti agay-ayus a danum, kas iti timek ti Mannakabalin-amin.+ No umakarda, kasla uni dayta ti maysa nga armada. No agsardengda, ibabada dagiti payakda. 25  Adda timek iti rabaw ti suelo nga adda iti ngato dagiti uloda. (No agsardengda, ibabada dagiti payakda.) 26  Iti rabaw ti suelo nga adda iti ngato dagiti uloda, adda kasla safiro a bato,+ a kalanglanga ti maysa a trono.+ Adda kasla tao a nakatugaw iti trono.+ 27  Adda nakitak a narangrang a banag a kas iti nasileng a metal+ a kasla apuy ti langana+ manipud siketna nga agpangato ken manipud siketna nga agpababa. Nakaranraniag ti intero nga aglikmutna 28  a kas iti bullalayaw+ iti ulep iti aldaw nga agtudtudo. Kasta ti panagparang ti lawag a nangraniag iti aglikmut. Kaaspingna ti dayag ni Jehova.+ Idi nakitak dayta, nagrukobak ket adda nangngegko a timek ti maysa nga agsasao.

Footnotes

Kaipapananna, “Mangpabileg ti Dios.”
Lit., “ima.”
Wenno “ken kimat.”
Wenno “elektrum.” Napaglaok a balitok ken pirak.
Mabalin a napagkinnuros ti dua a pilid.
Iti Ingles, “rim.”
Lit., “ti espiritu ti sibibiag a parsua.”
Wenno mabalin a, “nakaukrad iti ngato.”