Proveb 3:1-35
3 Boe blong mi, yu no mas fogetem ol tijing* blong mi,Mo i gud yu folem ol komanmen blong mi long fulhat blong yu,
2 From we ol samting ya bambae oli ademap plante moa dei long laef blong yu,Mo plante moa yia long laef blong yu, mo oli mekem se yu gat pis.+
3 Yu no mas letem fasin blong yu blong lavem man oltaem, mo blong holem promes,* i gowe long yu.+
Yu fasem tufala raon long nek blong yu,Mo yu raetemdaon tufala long hat blong yu, olsem we yu raetemdaon long wan ston.+
4 Olsem nao, God mo ol man bambae oli glad long yu,Mo oli luksave se yu yu gat hed.+
5 Yu mas trastem Jehova+ long fulhat blong yu,Mo yu no mas dipen* long prapa save blong yu.+
6 Long olgeta samting we yu mekem, yu mas tingbaot hem,+Nao hem bambae i mekem ol rod blong yu oli stret.+
7 Yu no mas kam waes from prapa save blong yu nomo.+
I gud yu fraet* long Jehova mo tanem baksaed long ol fasin nogud.
8 Sipos yu mekem olsem, fasin ya bambae i olsem meresin we i mekem yu yu harem gud long bodi* blong yu,Mo bambae i mekem ol bun blong yu oli strong bakegen.
9 Yu mas givim ol gudgudfala samting blong yu long Jehova blong ona long hem,+Mo yu mekem sem mak long ol fas kakae* long garen blong yu,*+
10 Nao ol stohaos blong yu bambae oli fulap gud,+Mo ol wel blong waen blong yu* bambae oli fulap gud long ol niu waen gogo oli stap kafkafsaed.
11 Boe blong mi, taem Jehova i stretem yu, yu no mas sakemaot advaes blong hem,+Mo yu no mas agensem ol tok we hem i talem blong stretem yu,+
12 From we olgeta we Jehova i lavem olgeta, hem i stap stretem olgeta,+Stret olsem we wan papa i stretem pikinini we hem i glad tumas long hem.+
13 Man we i faenem waes+Mo man we i kasem fasin luksave, hem i glad.
14 I moa gud man i kasem waes, i bitim we hem i stap kasem silva,Mo i moa gud hem i kasem moa waes, i bitim we hem i stap kasem gol.+
15 Waes i sas moa i bitim ol korel,*I no gat wan samting we yu wantem tumas i sem mak long hem.
16 Longfala laef i stap long raethan blong hem,Mo ol rij samting mo glori* oli stap long lefhan blong hem.
17 Ol rod blong hem oli mekem man i hapi,Mo i gat pis long olgeta rod blong hem.+
18 Hem i olsem wan tri blong laef, long olgeta we oli holem waestok,Mo olgeta we oli gohed blong holemtaet waestok, bambae ol man oli singaot olgeta se, ol hapi man.+
19 Jehova i yusum waes blong putum fandesen blong wol ya.+
Hem i yusum fasin luksave blong putum heven i stap strong long ples blong hem.+
20 Long save blong hem, hem i openem ol dip wota,Mo i mekem ol klaod long skae oli folfoldaon olsem wota blong naet.+
21 Boe blong mi, yu no mas tekemaot ae blong yu long olgeta.*Yu mas holemgud waestok we i wok gud, mo fasin blong yusum gud tingting.
22 Bambae oli givim laef long yu*Mo bambae oli olsem wan naes samting we i flasem gud nek blong yu,
23 Nao bambae yu wokbaot long rod blong yu, we yu sef nomo,Mo leg blong yu i no fas long wan samting.*+
24 Taem yu ledaon, bambae yu no fraet,+Bambae yu ledaon, mo bambae yu slip we yu harem gud.+
25 Bambae yu no fraet long eni trabol, we i kamaot wantaem nomo mo i mekem man i fraet bitim mak,+No long strong win we i stap kasem ol man nogud.+
26 Hemia from we Jehova bambae i soemaot long yu se yu save trastem hem nomo,+Bambae hem i no letem leg blong yu i fas long trap.+
27 I nogud yu holembak gudfala samting we yu sud givim long man we i nidim.*+
Sipos yu naf blong givhan,* i gud yu mekem.+
28 I nogud yu talem long neba blong yu se: “!Yu gowe, yu kambak afta nomo! Tumoro nomo bambae mi givim long yu.”Sipos yu save givim long hem naoia, i gud yu mekem.
29 Yu no mas mekem plan blong spolem neba blong yu+We i harem se hem i sef taem hem i stap klosap long yu.
30 Yu no mas rao wetem wan man, blong nating nomo+Sipos hem i no mekem wan nogud samting long yu.+
31 Yu no mas jalus long man blong faet+Mo yu no jusum eni fasin blong hem,
32 From we Jehova i no laekem nating ol man blong trik,+Be Hem i fren gud wetem ol man we oli gat stret fasin.+
33 Jehova i stap singaot trabol i kam long haos blong man nogud,+Be hem i blesem hom blong ol stret man.+
34 Hem i stap jikim ol man we oli stap tok flas,+Be hem i soemaot se hem i glad long ol man we oli gat tingting daon.+
35 Ol waes man, bambae oli kasem ona,Be ol man we oli stupid, oli stap leftemap ol fasin ya nomo we man i no save ona long olgeta from.+
Ol futnot
^ NT: “loa.”
^ NT: “blong tok tru.”
^ PT: “lei.”
^ NT: “tinghevi.”
^ PT: “nambuton.”
^ NT: “kakae we yu kasem.”
^ NT: “beswan kakae.”
^ NT: “ples blong mekem waen.”
^ I klia se hemia ol fasin blong God we ol vas bifo long hemia, oli tokbaot.
^ NT: “long sol blong yu.”
^ NT: “i no stambol.”
^ NT: “Sipos han blong yu i gat paoa blong givhan.”
^ NT: “man we samting ya i blong hem.”
