Proveb 23:1-35
23 Taem yu sidaon blong kakae wetem wan king,Yu mas lukluk gud samting we i stap long fored blong yu.
2 Yu putum wan naef long trot blong yu*Sipos yu yu man blong kakae bigwan.*
3 Yu no mas hanggri from ol gudfala kakae blong hem,From we ol kakae ya oli blong trikim yu nomo.
4 Yu no mas westem paoa blong yu blong kasem ol sas samting.+
Yu stop mo yu soemaot se yu kasemsave samting.*
5 Taem yu tanem yu kwiktaem blong lukluk ol samting ya, oli no moa stap,+From we ol samting ya bambae oli openem wing blong olgeta olsem wan igel mo oli flae i go long skae.+
6 Yu no mas kakae ol kakae blong wan griri man,*Yu no mas hanggri from ol gudfala kakae blong hem,
7 From we hem i olsem wan man blong makem kaon.*Hem i talem long yu se: “Yu kakae mo yu dring,” be hem i no minim.*
8 Bambae yu traot long smol kakae we yu kakae,Mo bambae yu westem gudfala tok ya blong yu blong talem tangkiu long hem.
9 Yu no mas wispa long sora blong wan man we i stupid,+From we bambae hem i no laekem nating ol waestok ya we yu talem.+
10 Yu no mas muvum olfala mak blong graon+O seftem mak blong graon blong yu i go insaed long graon blong pikinini we i no gat papa.
11 Hemia from we Man Blong Difendem* olgeta, hem i strong,Hem bambae i stanap long bihaf blong olgeta blong agensem yu.+
12 Yu mas putum hat blong yu i stap fulwan long ol tok ya we i blong stretem yuMo yu mas lesin long ol toktok ya we i mekem man i gat save.
13 Yu no mas fraet blong stretem wan boe.*+
Bambae hem i no ded sipos yu wipim hem long wan stik.
14 Yu mas wipim hem long wan stik,Blong yu save sevem hem* blong i no go long Gref.*
15 Boe blong mi, sipos hat blong yu i kam waes,Hat blong mi tu bambae i glad tumas.+
16 Taem maot blong yu i talem samting we i stret,Long tingting* blong mi, bambae mi glad we mi glad.
17 Yu no mas letem hat blong yu i jalus long ol sinman,+Be yu mas fraet* long Jehova stat long moning kasem sapa,+
18 Olsem nao bambae yu gat wan fiuja+Mo hop blong yu bambae i no save lus.
19 Boe blong mi, yu mas lesin, mo yu kam waes,Mo yu mas lidim hat blong yu blong i folem rod we i stret.
20 Yu no mas stap wetem olgeta we oli dring tumas waen,+Mo olgeta we oli stap kakae mit bitim mak,+
21 From man we i stap drong oltaem mo man blong kakae bitim mak, bambae tufala i kam pua,+Mo man we i stap slip oltaem, bambae i werem ol rabis klos nomo.
22 Yu mas lesin long papa blong yu, from hem nao i mekem se yu bon,Mo naoia mama blong yu i kam olfala, be yu no mas luklukdaon long hem.+
23 Yu pemaot* trutok mo yu no mas salemaot,+Mo yu mekem olsem tu long waes, mo ol tok blong stretem yu mo fasin blong kasemsave samting.+
24 Wan man we fasin blong hem i stret, papa blong hem bambae i harem gud from.
Mo wan boe we i waes, papa we i lukaot long hem bambae i glad tumas long hem.
25 Papa mo mama blong yu bambae tufala i glad,Mo woman we i bonem yu bambae i harem gud.
26 Boe blong mi, plis, yu lesin long mi long olgeta hat blong yu,Mo i gud yu lukluk gud ol rod blong mi mo yu glad blong folem.+
27 From wan prostitut i olsem wan hol we i dip,Mo wan woman nogud,* i olsem wan wel we hol blong hem i smol nomo.+
28 Hem i ledaon i stap wet olsem wan stilman.+
Hem i mekem se plante moa man oli no moa holem promes blong olgeta.
29 ?Hu i stap kasem trabol? ?Hu i no save stap kwaet??Hu i stap rao? ?Hu i stap komplen??Hu i stap kasem kil from nating nomo? ?Hu ya we ae blong hem i hevi tumas?*
30 Hemia olgeta we oli stap gohed longtaem blong dring waen,+Mo olgeta we oli stap lukaotem waen* we oli miksim.
31 Yu no mas lukluk red kala blong waen,Taem i stap saen insaed long glas mo i stap godaon gud nomo long bel blong yu,
32 From we long en bambae i kakae yu olsem wan snek,Mo posen blong hem i haed olsem posen blong snek.
33 Ae blong yu bambae i lukluk ol samting i narakaen,Mo hat blong yu bambae i pulum yu blong talem ol tok we i no stret.+
34 Mo bambae yu olsem wan man we i stap ledaon long medel blong solwota,Mo olsem wan man we i stap ledaon antap long mas blong wan sip.
35 Bambae yu talem se: “Oli faetem mi, be mi no harem nating.*Oli kilim mi, be mi no save.
?Wetaem bambae mi wekap?+Mi nidim wan moa dring.”*
Ol futnot
^ NT: “Yu taetem yu blong yu no kakae bigwan.”
^ NT: “yu wan sol we i wantem kakae tumas.”
^ MNT: “Yu mas stop blong folem prapa save blong yu.”
^ NT: “man we ae blong hem i rabis.”
^ NT: “hem i stap kaontem long tingting blong hem.”
^ PT: “be hat blong hem i no stap wetem yu.”
^ PT: “Man We i Pemaot.”
^ NT: “pikinini; yangfala.”
^ NT: “sol blong hem.”
^ PT: “kidni.”
^ NT: “tinghevi.”
^ NT: “kasem.”
^ NT: “no klia.”
^ NT: “kam wanples blong traem ol waen.”
^ NT: “Mi no harem se i soa.”
^ NT: “Bambae mi go lukaotem wan moa.”
