Genese 9:1-29
9 Tsô Aôndo ver Noa kua ônov nav doo doo, a kaa a ve ér: “Mar nen kpishi, seer nen ngeen, iv nen tar.+
2 Mciem man iondo ia za hemen u gban akaauma a sha tar cii iyol sha kwagh wen; hanma kwaghuma u purugh sha man hanma kwagh u a zenden shin tar man ishu i shin zegemnger cii vea cian ne. Hegen ne m na ve sha ikyev yen.*+
3 Hanma inyam i uma i i tenger cii i lu kwaghyan wen.+ M na ne ve cii, er yange m na ne imendenev nahan.+
4 Kpa de ye nen inyam kua uma u i ga+—ka awambe a i je la.+
5 Heela tseegh ga, awambe a en* yô me pine kwagh sha a kpee je. Hanma kwagh u uma u a woo or cii me pine un kwagh sha mi; hanma or u nan woo orgen cii me pine nan kwagh sha mi, sha ci u ka anmgbian u nan je.+
6 Hanma or u nan hee awambe a or inya yô, nan kpa ka or nana haa awambe a nan inya ye,+ sha ci u Aôndo gba or sha ibyeen na.+
7 Mar nen kpishi, seer nen ngeen sha tar, seer nen a seer sha u.”+
8 Maa Aôndo shi kaa a Noa kua ônov nav mba ve lu vea na la ér:
9 “Hegen m ngu yan ikyur a ven+ kua ônov enev mba ne va mar la kpaa,
10 kua hanma kwaghuma u a lu vea ven cii, inyon man annyamev man hanma kwaghuma u a lu sha tar vea ven u yange due vea ven ken tso la—akaauma a a lu sha tar cii.+
11 Ka ikyur shon i m ye vea ven je ne: Mayange me kera tim akaauma cii sha mngerem ma deemee ga, shi mayange me kera va a mngerem ma deemee sha u timin tar kpaa ga.”+
12 Aôndo shi kaa ér: “Ka ikyav i ikyur i m lu yan vea ven kua hanma kwagh u uma u a lu vea ven cii, sha ikyov ikyov je ne.
13 M ver ikyume yam sha abeen, ia lu ikyav i ikyur i m ye vea tar la.
14 Shighe u m gbe ura sha tar yô,* ikyume la ia due sha abeen kpee je.
15 Mo kpaa me umbur ikyur i m ye a ven man hanma inja kwaghuma cii la kpee je; shi mayange mngerem ma a kera va sha tar deemee u timin akaauma cii ga.+
16 Ikyume la ia due sha abeen, nahan me nenge a i shi me umbur ikyuryan i tsôron i mo Aôndo m er a hanma inja kwaghuma i sha tar cii la kpee je.”
17 Aôndo shi kimbir kaan a Noa ér: “Ka ikyav i ikyur i m ye a hanma kwaghuma u sha tar cii je ne.”+
18 Ônov mba Noa mba ve due ken tso la yô, lu Shem man Ham man Yafeti.+ Ham va mar Kaanan.+
19 Ve mba utar mban lu ônov mba Noa, man ka ken ve ior cii due samber sha tar ye.+
20 Tsô Noa hii tom sule, a kaha sule u ikyon i wain.
21 Nahan me wain la yô a gba hunden,* nahan a yav idyelegh ken tenti na.
22 Tsô Ham, ter u Kaanan, nenge ter na idyelegh maa a za ôr anmgbianev nav mba uhar mbara ken won.
23 Nahan Shem man Yafeti ve tôô ikyondo ve hambe sha akende a ve, ve nyôr a mi ajime ajime. Maa ve cir ter ve idyelegh, kpa ve gema ashe a ve kera, ve nenge idyelegh u ter ve ga.
24 Wain va wanger Noa ashe, moughon kaven kwagh u wan na u kiriki a er a na la yô,
25 a kaa ér:
“Ifyan i̱ kôr Kaanan.+
A hingir kpan u anmgbianev nav u hemban gban ijime.”+
26 Shi a kaa ér:
“I wuese Yehova Aôndo u Shem,Kaanan a hingir kpan na.+
27 Aôndo a gbanger a tar u Yafeti,Shi a tema ken utenti mba Shem.
Un kpa Kaanan a hingir kpan na.”
28 Noa hide tsa anyom 350 zum u mngerem ma deemee va kar kera la.+
29 Nahan ayange a Noa tsa sha won cii yô kohol lu anyom 950, maa a kpe.
