Genese 12:1-20
12 Tsô Yehova kaa a Aberam ér: “Mough hen tar wou kera shi undu ior ou kua ya u teru, yem hen tar u me tese u la.+
2 Me gema u u hingir ikyurior i vesen, me ver u doo doo, me na iti you ia za gwa shi u lu iveren hen ior kpaa.+
3 Mba ve ver u doo doo yô, mo kpa me ver ve doo doo, or u nan we u ifyan yô,+ mo kpa me wa nan ifyan, man ka sha ikyev you icombor i sha tar cii ia zua a iveren ye.”+
4 Tsô Aberam mough yem er Yehova kaa un nahan; Loti kpaa yem vea na. Aberam lu anyom 75 shighe u mough hen Haran kera la.+
5 Aberam mough a kwase na Sarai+ man Loti wan u anmgbian na+ kua ikyav mbi ve lu a mi+ man ior mba ve va zua a mi ken Haran la cii, ve ver ishigh u yemen tar u Kaanan.+ Mba za nyer ken tar u Kaanan yô,
6 Aberam nyôr ken tar la yem zan zan za ar hen haregh u Shekem,+ ikyua a uzegembaikyonov mba More+ la. Sha shighe la Mbakaanan lu ken tar shon.
7 Yehova maa ande hen Aberam kaa a na ér: “Me na ônov ou*+ tar ne.”+ Nahan a ta atse her sha ci u Yehova u ande hen a na la.
8 Shighe karen yô, a mough heela a yem hen haregh u iwoogh u a lu Betel+ vegher u sha ityoughkitaregh la. A tim tenti hen atô, Betel lu un shin ityôtar, Ai+ di lu un sha ityoughkitaregh. A ta Yehova atse+ her maa a hii u yilan sha iti i Yehova.+
9 Aberam shi va mough heela gba yemen vegher u Negebi+ la, lu haan afo yemen.
10 Tsô ijen va gba ken tar la, nahan Aberam mough sen vegher u Igipiti la, sha er una za tema her anshighe kpuaa* yô,+ sha ci u ijen kôr ken tar la kpishi.+
11 Mba za zurum u nyôron ken Igipiti yô, a kaa a kwase na Sarai ér: “Wea lumun yô kegh ato a mo. M fa u doo kwase kpen kpen,+
12 nahan Mbaigipiti vea za nengen a we yô, vea kaa ér, ‘Ka kwase na je ne.’ Maa vea wuam, kpa vea de u u lu uma her.
13 Nahan wea lumun yô kaa wer u ngu ingyôr yam, sha er me nyôr ken zayol sha ci wou ga, nahan uma wam una war yô.”+
14 Aberam za nyer a nyôr ken Igipiti nahan, Mbaigipiti nenge er kwase la doo kwase tsung yô.
15 Mbatarev mba Farou kpaa nenge a na, nahan ve gba za wuese un sha ato a Farou, maa i va kua a kwase la i za a na hen ya u Farou.
16 A er a Aberam doo doo sha ci u kwase la, a na un iyôngo man ibua kua anom a jaki man ungô mba jaki man ikpan i nomso man i ukase kua urakumi.+
17 Tsô Yehova va a atsan a vihin tsung sha Farou kua mba hen ya na, sha ci u Sarai kwase u Aberam.+
18 Nahan Farou yila Aberam gba kaan a na ér: “Ka nyi u er a mo nahana? Er nan yange u kaa a mo wer ka kwase wou ga?
19 Er nan yange u kaa a mo wer, ‘Ka ingyôr yam’?+ U er nahan yô m lu nôngon u tôôn un mer a hingir kwase wam. M hide u a kwase wou. Yem ase a na!”
20 Nahan Farou na ior nav zwa ve za ver un gbenda, un vea kwase na kua hanma kwagh u lu a mi cii, a yem.+
