Genese 28:1-22
28 Tsô Isaka yila Yakob, a ver un doo doo, a wa un kwagh a kaa a na ér: “De eren kwase ken ônkasev mba Kaanan ga.+
2 Yem ken Padan-aram, hen ya u Betuel, ter u ngôu, za vôso kwase ker, ken ônov mba Laban+ anmgbian u ngôu.
3 Aôndo u Hemban Agee Cii una ver u doo doo, una na u mar kpishi u seer ngeen, u hingir nongoior u vesen.+
4 Una na u iveren i Aberaham la,+ we man ônov ou* a we imôngo, sha er u ngohol tar u u tem shir ker, u Aôndo yange na Aberaham ne yô.”+
5 Nahan Isaka na Yakob gbenda a yem ken Padan-aram, hen Laban wan u Betuel, Oraram,+ anmgbian u Rebeka,+ ngô u Yakob man Isou.
6 Isou nenge er Isaka ver Yakob doo doo, shi a na un gbenda ér a yem ken Padan-aram a za er kwase ker, man er shighe u lu veren un doo doo la a wa un kwagh ér, “De eren kwase ken ônkasev mba Kaanan ga,”+
7 kua er Yakob ungwa imo i ter na man ngô na maa mough yem Padan-aram yô.+
8 Isou maa kav er ônkasev mba Kaanan mbara ve doo ter na Isaka ishima ga yô.+
9 Nahan Isou za hen Ishemael za vôso Mahalata, wan u Ishemael wan u Aberaham, ingyôr i Nebayoti, va seer sha kasev mba vande lun a mi la.+
10 Tsô Yakob mough hen Bersheba gba yemen vegher u Haran la.+
11 Maa a va ar hen ijiir igen, a gba wan iyol i tsan her sha ci u iyange mire. Nahan a tôô iwen igen hen ijiir la a ver sha er una yav a ver ityough sha mi yô, maa a yav her.+
12 Tsô mnyam cie un, yô nenge! gogo* mough shin tar yem za tuur sha aôndo; mbatyomov mba Aôndo lu unden shi senen sha mi.+
13 Man nenge! Yehova lu sha ityough nagh, a kaa a na ér:
“Mo m ngu Yehova Aôndo u teru Aberaham man Aôndo u Isaka.+ Me na u tar u u yav her ne, we kua ônov ou.*+
14 Ônov ou vea* hingir er vuulevu u hen inya nahan.+ U samber u yem shin ityôtar man sha ityoughkitaregh man ken imbusutarimese kua ken imbusutariyan, man ka sha ikyev you man sha ikyev i ônov ou* icombor i sha tar cii ia zua a iveren ye.+
15 M ngu a we, me kura u hanma ijiir i u ze cii, shi me hide a we hen tar ne.+ Me undu u ga zan zan me kar kuren kwagh u m tende zwa u eren a we la.”+
16 Maa Yakob nder, a kaa ér: “Mimi je Yehova ngu hen ijiir ne man m fa ga.”
17 Nahan cier un iyol, maa shi a kaa ér: “Ijiir ne kpilighyol tsôô! Ka keng a lu ya u Aôndo,+ man ka hunda u yemen sha je ne.”+
18 Nahan Yakob mough tugh tugh tôô iwen i a penda ityough sha mi la, tim i, i lu iwen i umbur, maa a haa mkurem sha mi.+
19 Nahan a ii ijiir la iti ér Betel,* kpa kera yô i vanden yilan gar la ér Lushi.+
20 Yakob maa er iceghzwa kaa ér: “Aluer Aôndo za hemen u lun a mo shi a kuram ken zende wam, a nam kwagh u me ya shi a nam akondo a huan
21 shi m hide hen ya u terem bem bem yô, me fa mer mimi je Yehova ka Aôndo wam.*
22 Shi iwen i m tim mer i lu iwen i umbur ne ia hingir ya u Aôndo,+ shi me na u môm-ken-pue u hanma kwagh u u nem cii keng je, a bunde ga.”
