Genese 3:1-24
3 Ken inyamtoho i Yehova Aôndo er la cii, iyô+ hemba lun sulaa.* Nahan i pine kwase la ér: “Mimi je Aôndo kaa ér ne de ye atam a ikyon i ken sule ne cii gaa?”+
2 Tsô kwase la gema kaa a iyô la ér: “Se fatyô u yan atam a ikyon i ken sule ne.+
3 Kpa atam a kon u hen atô u sule la yô, Aôndo kaa ér:+ ‘Mayange de ye nen a ga, de benden nen a ave tsô kpaa ga, sha er ne kpe ga yô.’”
4 Tsô iyô la kaa a kwase la ér: “Mayange ga, ne kpe je ga.+
5 Gadia Aôndo fa je ér iyange i ne ya a la ashe a en aa bugh, ne hingir er Aôndo nahan, ne gba fan kwagh u dedoo man kwagh u bo.”+
6 Tsô kwase la nenge er kon la doo u yan, shi u lu kwagh u saren shi u doo u kenger* kpaa yô. Tsô a zôr atam a u a gba yan.+ Shighe kar yô, a na nom na shighe u va lu vea na la, un kpaa a gba yan.+
7 Maa ve uhar cii ashe a ve bugh, maa ve kav er ve lu idyelegh yô. Nahan ve kor ikya i tur hingir ve kwagh u zeren shin iwenge.+
8 Shighe kar yô ve va ungwa imo i Yehova Aôndo er lu zenden ken sule sha shighe u ahumbe a kundun iyol ka a karen la,* maa or la vea kwase na ve cia ishigh ki Yehova Aôndo, ve za yer ken ikyon i ken sule la.
9 Tsô Yehova Aôndo gba yilan or la pinen un ér: “U ngu hana?”
10 Ken masejime yô a kaa ér: “M ongo imo you ken sule, kpa i cier mo iyol sha ci u m lu idyelegh, nahan m yer.”
11 Maa a pine un ér: “Ka an nan kaa a we ér u ngu idyeleghe?+ U ya kon u yange m kaa a we mer de ye ga la zee?”+
12 Or la gema kaa ér: “Ka kwase u yange u nam wer a lu vea mo ne, a nem atam a kon la ve m ye ye.”
13 Yehova Aôndo maa pine kwase la ér: “Ka nyi u er nee?” Kwase la gema kaa ér: “Ka iyô i tsughum ve m ye ye.”+
14 Yehova Aôndo maa kaa a iyô la ér:+ “Er u er kwagh ne yô, u lu a ifyan iyol ken uzendenya man ken inyamtoho cii. U kpelan iyav inya, shi u yaan inya ken ayange a uma wou cii.
15 Me ver ihyom+ hen atô wou+ vea kwase,+ man hen atô u wan* wou+ vea wan* na.+ Una cagh u ityough,+ we di u gber* un ikishinguhar.”+
16 A gema a kaa a kwase la ér: “Me seer we mnyoonom kpishi shighe u u we iyav yô; u maren ônov sha ican, shi a saren we u lun vea nomou, una hemen we.”
17 A gema a kaa a Adam* ér: “Er u ongo imo i kwase wou, u ye atam a kon u yange m kaa a we mer,+ ‘Mayange de ye ga’ la yô, ifyan i kôr inya sha ci u kwagh u u er ne.+ Ken ayange a uma wou cii ka sha ican u zuan a kwaghyan hen i u yaan ye.+
18 Ia mende u usaa man mbaasaa shi u yaan imendenev mbi ken toho.
19 Ka sha iusa i sha ishigh you man u yaan kwaghyan* ye, zan zan u kar hiden hen inya, sha ci u ka i i tee i er u a mi ye.+ Gadia u ngu vuulevu nahan u hide shi u hingir vuulevu.”+
20 Kwagh ne karen kera yô, Adam ii kwase na iti ér Ifa,* sha ci u lu u una hingir ngô u uumace cii.*+
21 Tsô Yehova Aôndo er akondo a elemeen* sha akôv a inyam na Adam vea kwase na ér ve hua.+
22 Maa Yehova Aôndo kaa ér: “Hegen or hingir er ka mô wase nahan sha u fan kwagh u dedoo man u bo.+ Nahan sha u a de zaan uwegh a zôron kon u uma la+ kpaa a yaan a tsôron* ga yô,—”
23 Yehova Aôndo maa zenda un ken sule u Eden la kera+ ér a za kahan inya i i tee i er un a mi la.+
24 Nahan a zenda or la, a gema a ver ucerubi+ vegher u sha ityoughkitaregh ki sule u Eden la, kua sanker u usu u lu jingir hanma shighe cii yô, sha u kuran gbenda u zan hen kon u uma la.
Ngeren mba shin kpe
^ Shin “hemba lun tsevaa; hemba bughun ashe; hemba lun tsev tsev; hemba wan ayom.”
^ Zwa Heberu, “u nyôr ken ishe.”
^ Ikyav tese ér lu aikighe daalaa nahan.
^ Shin “u cagh.”
^ Zwa Heberu, “vor.” Ishember i ken zwa Heberu la ia fatyô u lun ônov kpaa.
^ Zwa Heberu, “vor.” Ishember i ken zwa Heberu la ia fatyô u lun ônov kpaa.
^ Inja na yô ér, “Oruma; Orumace.”
^ Zwa Heberu, “beredi.”
^ Inja na yô ér, “U Uma.”
^ Shin “ngô u hanma or u nan lu uma cii.”
^ Shin “akondo a gban shin.”
^ Shin “a luun uma gbem sha won.”
