Genese 40:1-23
40 Ken masejime u akaa ne yô, orvesen u mbatoon tor u Igipiti kwaghman+ kua orvesen u mbakaan beredi, ve er ter ve tor u Igipiti kwaghbo.
2 Tsô ishima vihi Farou a mbatomov nav mba vesen mba uhar mbara, orvesen u mbatoon tor kwaghman kua orvesen u mbakaan beredi.+
3 Nahan a za wuhe ve ken purusu u hen ya u orvesen u mbakuran,+ hen ijiir i Yosev kpa i wuhe un la.+
4 Maa orvesen u mbakuran la na Yosev ér a lu vea ve shi a nengen sha a ve.+ Ve lu ken purusu her anyangem kar.
5 Hen tugh mbugen la, mnyam cie or u toon tor kwaghman kua or u kaan beredi u tor u Igipiti la cii, ve mba ve lu ken purusu la. Man mnyam ma hanmô ve lu a mpase u ma.
6 Kpernan pepe Yosev va nengen a ve yô, ve cii ve lu zunguluu.
7 Tsô a pine mbatomov mba Farou mba i wuhe ve a na imôngo hen ya u orvesen na la ér: “Er nan ne lu sha ishi nyian gbuu nahana?”
8 Tsô ve kaa a na ér: “Se cii mnyam cie se, kpa se mba a or u pasen se ma ga.” Yosev gema kaa a ve ér: “Ka Aôndo a pasen akaa gaa?+ Nea lumun yô, ôrom nen ma.”
9 Nahan orvesen u mbatoon kwaghman la ôr Yosev mnyam nam, a kaa a na ér: “Ken mnyam ma ma ciem la, itine i wain lum sha ishi.
10 Itine i wain la lu a agbaa atar, nga nguren hômon yô a kpar a ume atam, maa atam la via je.
11 Kôôpu u* Farou gema lum ken uwe, nahan m zôr atam a wain la, m kam m haa shin kôôpu u* Farou la. M been yô, m gema kôôpu* la m na Farou.”
12 Maa Yosev kaa a na ér: “Ka mpase u ma je ne: Agbaa atar la ka ayange atar.
13 Ayange atar aa karen yô, Farou una due a we,* una hide a we sha ian you,+ u hide u gba kôron kôôpu u* Farou nan un er yange u vanden eren shighe u u toon un kwaghman la nahan.+
14 Nahan kpa, shighe u akaa a va za a we a doo yô, umbur mo. Wea lumun yô er a mo i doo, ôr Farou kwagh wam, sha er me due hen ijiir ne kera yô.
15 Jighilii yô, yange i iim a ii* ken tar u Mbaheberu,+ shi m er kwagh môm heen u a wuhem ken purusu ga.”*+
16 Zum u orvesen u mbakaan beredi la nenge er mpase u Yosev a pase mnyam mara la i lu u dedoo yô, a kaa a na ér: “Mo kpa mnyam ciem, m tôô akese a beredi u pupuu atar sha ityo,
17 akaayan a kaan a Farou atô kposo kposo lu shin ikyese i masen sha la, inyon gema lu va yan akaa ne shin ikyese la sha ityough yagh.”
18 Maa Yosev kaa ér, “Ka mpase u ma je ne: Akese atar la ka ayange atar.
19 Ayange a karen atar yô, Farou una gber u ityough* shi una hambe u sha kon, nahan inyon ia va ya inyam you.”+
20 Tsô sha iyange i sha utar la, lu iyangemar i Farou,+ nahan a er mbatomov nav cii iniongo, maa a due a* orvesen u mbatoon kwaghman kua orvesen u mbakaan beredi la, a va a ve sha ishigh ki mbatomov nav.
21 A hide a orvesen u mbatoon kwaghman la sha tom na u toon kwaghman, a za hemen u toon Farou kwaghman.
22 Kpa a gema a sende orvesen u mbakaan beredi la, vough er Yosev vande pasen ve nahan.+
23 Nahan kpa, orvesen u mbatoon kwaghman la umbur Yosev ga; a zer hungur un.+
Ngeren mba shin kpe
^ Shin “iyongo i.”
^ Shin “iyongo i.”
^ Shin “iyongo.”
^ Zwa Heberu, “una kende a ityough you sha.”
^ Shin “iyongo i.”
^ Shin “i kôrom sha agee.”
^ Zwa Heberu, “a kendem shin ijôr ne ga; a kendem shin ihyungwa ne ga.”
^ Zwa Heberu, “una tôô ityough you sha a we kera.”
^ Zwa Heberu, “maa a kende a ityough ki.”
