Genese 2:1-25
2 Kape i gba usha man tar man hanma kwagh u a lu ken a ve cii* i kure je la.+
2 Sha iyange i sha utaankaruhar la nahan Aôndo kure tom na.* Nahan er a bee ityom i a lu eren la cii yô, a gba memen sha iyange i sha utaankaruhar la.+
3 Nahan Aôndo ver iyange i sha utaankaruhar la doo doo shi a tsegha i kpaa, sha ci u lu sha i Aôndo hii u memen zum u a er tom u gban akaa cii a bee la ye, hanma kwagh u wa ishima u eren cii.
4 Ngun ka yiase i usha man tar, sha shighe u i gba ve sha iyange i Yehova* Aôndo gba tar man sha je ne.+
5 Toho lu a mende sha tar ga, ma imendenegh kigenegh kpaa lu a hii u menden ga, gadia Yehova Aôndo lu a nôô ura sha tar ga, shi or u kahan inya kpa nan lu ga.
6 Kpa tulugh a due shin inya a kôndo a za hingir irkpii, a hide a haa a ndôhôr tar cii.
7 Tsô Yehova Aôndo er or sha vuulevu+ u hen inya maa fehe nan iôôn i uma ken ahenga,+ tsô or la hingir oruma.*+
8 Yehova Aôndo shi er sule ken Eden,+ vegher u sha ityoughkitaregh la; lu ker a ver or u a gba la ye.+
9 Nahan Yehova Aôndo er hanma kon u u doo u kenger man u u doo u yan cii u mende hen inya, kua kon u uma+ kpaa hen atô u sule la, man kon u nan or fan kwagh u dedoo man u bo kpaa.+
10 Ifi gema due ken Eden lu kuan sha u urun sule la, maa a za ta agbaa anyiin.
11 Iti i u hiihii la ér Pishon; ka un a ningir tar u Havila cii a kase ye, ape zanaria a lu la.
12 Zanaria u ken tar la doo. Tsur* man iwen i oniki kpa mba ker.
13 Iti i ifi u sha uhar la ér Gihon, ka un man a ningir tar u Kushi cii a we atô ye.
14 Iti i ifi u sha utar la ér Hidekel,*+ ka un a kuan a yemen vegher u sha ityough ki tar u Ashiria ye.+ Ifi u sha unyiin la di ka Uferati.+
15 Yehova Aôndo maa tôô or la ver ken sule u Eden ér a sôron u shi a nengen sha u.+
16 Yehova Aôndo shi wa or la tindi ne, a kaa ér: “Hanma kon u u lu ken sule ne cii yô, yaan er u soo cii.+
17 Kpa kon u nan or fan kwagh u dedoo man u bo la yô, mayange de ye u ga, gadia iyange i u ya u la yô, u kpe keng je.”+
18 Maa Yehova Aôndo kaa ér: “Doo u or la una za hemen u lun tswen ga. Nahan m ngu eren un orwasen u nana zua vea na kpian yô.”+
19 Lu sha inya Yehova Aôndo lu eren hanma inyamtoho kua hanma kwagh u uma u purugh sha aôndo ye. Tsô a gba van a mi hen or la sha er una nenge iti i una yila hanmô ve yô. Nahan kwagh u or la una yila hanma kwagh u uma cii yô, i hingir iti na je.+
20 Nahan or la ii uzendenya man akaauma a purugh sha aôndo kua hanma inyamtoho cii iti, kpa or yô gema lu a orwasen u zuan vea na kpian ga.
21 Tsô Yehova Aôndo er or la gba mnyam kpum kpum. Er lu yaven la a dugh hwan na môm, a hide a inyam a cir her.
22 Nahan Yehova Aôndo za gema hwan u a dugh ken or la maa kwase a mi, va a mi hen or la.+
23 Maa or la kaa ér:
“Hegen ne yô ka kuhe u ikyuhe yamMan inyam i inyam yam je ne.
A yila un ér Kwase,Sha ci u ka ken nomsoor* i dugh un ye.”+
24 Ka nahan man or nana undu ter u nan kua ngô u nan, nana var ken* kwase u nan, vea hingir iyol i môm ye.+
25 Ve uhar cii ve lu idyelegh,+ or la vea kwase na; nahan kpa kunya kôr ve ga.
Ngeren mba shin kpe
^ Zwa Heberu, “man akum a ve cii.”
^ Shin “kure kwagh u lu eren la.”
^ Ka ape i hii teren iti i Aôndo kpôô kpôô יהוה (YHWH), i i pav un kposo a mbaaôndo mbagen la je ne. Nenge Ngeren u Seer u A4 la.
^ Ka ishember i ken zwa Heberu i i yer ér nephesh la. Inja i i jighilii ér “kwaghuma u ôôn.” Nenge Ngeren u Pasen Asember, “Uma.”
^ Tsur ne ka iniôndo i kon i human doon, i nôngo u lun kwaghmôm a mire u i zuan a mi ken ikyon igen i kiriki i i vesen hen ajiir a tseen yô.
^ Shin “Tigeri.”
^ Shin “or.”
^ Shin “nana za hemen u lun vea.”
