Genese 31:1-55
31 Shighe kar yô, a ungwa ônov mba Laban ve lu kaan ér: “Yakob ngohol hanma kwagh u ter wase cii, ka sha akaa a ter wase a hingir yôughyôugh nahan ye.”+
2 Shi Yakob una kenger ishigh ki Laban yô, a nenge a kera lu a na er yange vanden lun la nahan ga.+
3 Ken masejime yô, Yehova kaa a Yakob ér: “Hide yem ken tar u uter ou man hen anmgbianev ou,+ me za hemen u lun a we.”
4 Nahan Yakob tindi i za yila Rahel man Lea, ve va ken toho ape iyôngo na lu la,
5 maa a kaa a ve ér:
“M nenge yô, ter wen kera ngu a mo er yange a lu la ga,+ kpa Aôndo u terem ngu a mo.+
6 Ne ayol a en kpa ne fa dedoo er m er ter wen tom sha agee a am cii yô.+
7 Man ter wen nôngo ér una bumem,* shi a musan mo injar kwa pue; kpa Aôndo na un ian i bulan mo ga.
8 Ka una kaa ér, ‘Mba lun iyol amian amian la ve lu injar you’ yô, maa ilev cii mbi gba maren mba lun iyol amian amian; kpa shi una kaa ér, ‘Mba ve nger iyol mbara ve lu injar you’ yô, ilev cii mbi gba maren mba ngeren iyol.+
9 Kape Aôndo a zer ngohol ter wen ilev nan mo je la.
10 Kwagen la ilev lu keren noov, nahan m kenden ashe sha m nengen ken mnya yô, ikpev i i lu unden ungôôv la cii, lu i lun anger anger man i lun amian amian kua i lun acan acan.+
11 Maa ortyom u Aôndo u mimi la yilam ken mnya ér, ‘Yakob!’ M gema m kaa mer, ‘Mo ne.’
12 Maa a kaa ér, ‘Gema ashe kenger ase, nenge er ikpev i i lu unden ungôôv la cii, i lu i lun anger anger man i lun amian amian man i lun acan acan yô, gadia m nenge hanma kwagh u Laban a lu eren a we cii.+
13 Mo m ngu Aôndo u mimi u Betel,+ ape yange u haa mkurem sha iwen, u er iceghzwa a mo la.+ Yô, mough ase sha due ken tar ne kera, hide yem ken tar u i mar u ker la.’”+
14 Nahan Rahel man Lea ve kaa a na ér: “Shi se shi a ma kwagh u yan dyako sha mi hen ya u ter wasee?
15 A kera nenge ér se mba mbavannya gaa? Gadia a tee se, a ya inyaregh ki i ne sha a vese la kpaa cii.+
16 Inyaregh ki Aôndo a ngohol hen ter wase la cii, ka ki yasegh kua ki ônov asev.+ Nahan yô, er hanma kwagh u Aôndo a kaa ér we u er cii.”+
17 Tsô Yakob mough kôr ônov nav man kasev nav penda ve sha urakumi,+
18 maa a gba yemen a ikyumuile na kua akaainjaa a na a a lu a mi cii,+ ilev nav mbi a zua a mi ken Padan-aram la, lu yemen hen Isaka ter na, ken tar u Kaanan.+
19 Hen shighe la Laban yem u za tôndon iyôngo na aive, nahan Rahel ii ter na+ uterafim.*+
20 Heela tseegh ga, Yakob er Laban Oraram la ayom, sha ci u a kaa a na ér un ngu yemen ga.
21 A yevese a yem a za per Ifi la,*+ un kua hanma kwagh u lu a mi cii. Maa a ver ishigh yemen haregh u iwoogh u Gileadi.+
22 Sha iyange i sha utar la yô, i za kaa Laban ér Yakob yevese yem.
23 Maa a mough vea anmgbianev nav, a zenda un ijime kuma zende u ayange ataankarahar, a za kohol un hen haregh u iwoogh u Gileadi.
24 Tsô Aôndo ande hen Laban, Oraram la+ ken mnya tugh,+ kaa a na ér: “Wa ikyo sha kwagh u u za ôr a Yakob la, a lu u dedoo shin u bo kpaa.”*+
25 Laban va kohol Yakob, shighe ne Yakob tim tenti na hen uwo, Laban vea anmgbianev nav di haa afo hen haregh u iwoogh u Gileadi.
26 Laban pine Yakob ér: “Ka nyi u er nahana? Er nan u erem ayom, u tôô ônov av mba kasev u yemen a mi er ka ior mba i za kôr ve ken utya sha sanker nahana?
27 Er nan u erem ayom, u gbe toho u ôrom ga? Luun er u ôrom yô, ma m ne u gbenda saan saan a atsam a wan man angenga u kuhwan kua adiguve.
28 Kpa u nam ian i susen ônov av mba nomso man mba kasev* zwa ga. U er kwagh sha ibume.
29 M ngu a tahav mbu bulan we, kpa Aôndo u teru nyen lam a mo tugh kaa ér, ‘Wa ikyo sha kwagh u u za ôr a Yakob la, a lu u dedoo shin u bo kpaa.’+
30 Yemen yô u yem je ve, sha ci u sar u u hiden yemen hen ya u teru, kpa er nan u iim mbaaôndo?”+
31 Yakob gema kaa a Laban ér: “Lu sha ci u cier mo iyol, gadia m ôr ken ishima mer, ‘Alaghga u va ngohol ônov ou hen a mo sha agee.’
32 Or u u zough a mbaaôndo ou hen a nan cii yô nana kera lu uma ga. Ker ikyav yav sha ishigh ki anmgbianev asev, tôô kwagh u a lu u wou la.” Kpa Yakob gema fa er Rahel ii mbaaôndo mbara ga.
33 Tsô Laban nyôr ken tenti u Yakob kua ken tenti u Lea man ken tenti u ikpan i ukase i ihiar la,+ kpa zua a ve ga. Maa a due ken tenti u Lea a nyôr ken tenti u Rahel.
34 Rahel gema tôô uterafim mbara wa shin ikyese i sha shidi* u ukase u sha rakumi la, tema sha mi. Nahan Laban ker ken tenti cii kpa zua a ve ga.
35 Maa a kaa a ter na ér: “Ishima i de vihin we ga terem, sha ci u me fatyô u moughon tilen sha ishigh you ga, gadia gbaaôndo u ukase ngu a mo.”+ Nahan a ker vighe vighe, kpa a zua a uterafim mbara ga.+
36 Nahan ishima vihi Yakob, a gba zôhôn a Laban, Yakob kaa a Laban ér: “Ibo yam ka nyi, man ka nyi isholibo m er ve u lu zendan mo sha kume nahana?
37 Hegen u u ker ikyav yav cii ne, ka nyi i hen ya wou u zough a mi? Ver i heen sha ishigh ki anmgbianev av man anmgbianev ou, ve kure se kwagh ne.
38 Ken anyom 20 a m lu vea we ne cii, iyôngo you shin ivo you dugh iyav ga,+ shi mayange m ya anomaiyôngo a ken ilev you ga.
39 Yange m va u a ilegh ki inyamkyume i ande ki ga.+ Mo iyol yam m kimbi kwagh u a saa la. A lu atetan i ii ilegh kira shin a lu tugh kpaa, u kaa wer mo m kimbi.
40 Oo u shi tan mo atetan, tugh di i lu wuhe, shi mnyam ma karem sha ashe kera.+
41 Ka anyom 20 je m tse hen ya wou ne. M er u tom anyom 14 sha ci u ônov ou mba kasev uhar, anyom 6 di sha ci u ilev you, man u musan mo injar kwa pue.+
42 Luun er Aôndo u terem,+ Aôndo u Aberaham man Un u Isaka a cie la*+ lu a mo ga yô, hegen ma u nem gbenda ave gbilin. Aôndo nenge ican yam man tom u sha ican u m er sha ave a am la, ka nahan man nyen ta u icin tugh ye.”+
43 Tsô Laban kaa a Yakob ér: “Ônkasev mban ka ônov av, mbayev mbara kpa ka mba av, ilev kpa ka mbi yav, hanma kwagh u u nengen a mi heen cii ka u wam kua u ônov av mba kasev mban. Nahan ka nyi me er sha u bulan ve shin bulan mbayev mba ve mar nee?
44 Yô, va se ya ikyur, mo vea we, ia lu shiada hen atô wase.”
45 Tsô Yakob tôô iwen tim ér i hingir iwen i umbur.+
46 Maa Yakob kaa a anmgbianev nav ér: “Kura nen awen!” Nahan ve kura awen ve ta tihi. Mba been yô, ve ya kwagh her hen tihiawen la.
47 Maa Laban gba yilan a ér Yegar-sahaduta,* kpa Yakob yila a ér Galedi.*
48 Laban maa kaa ér: “Tihiawen ne ka shiada hen atô wam vea we nyian.” Ka nahan man i yila i ér Galedi+
49 man Iyou i Kura ye, sha ci u a kaa ér: “Yehova a̱ yar kura hen atô wam vea we shighe u se kera lu nengen ishigh a ishigh ga yô.
50 Aluer u za nzughul mo a ônov, shi u za hii u eren kasev mbagenev va seer sha ônov av yô, shin er or nan lu vea vese ga nahan kpa, umbur wer Aôndo una lu shiada hen atô wam vea we.”
51 Laban shi kaa a Yakob ér: “Nenge tihiawen ne, kua iwen i umbur i m tim hen atô wam vea we ne.
52 Tihiawen ne ka shiada, shi iwen i umbur ne kpa ka kwagh u eren shiada+ ér, mayange me per tihiawen ne sha u va bulan we ga, shi we kpa u per tihiawen ne kua iwen i umbur ne sha u va bulan mo ga.
53 Aôndo u Aberaham+ man Aôndo u Nahor, Aôndo u ter ve a̱ ôr ijir hen atô wase.” Tsô Yakob bum Un shon u Isaka a cian la.*+
54 Mba been yô, Yakob na nagh hen uwo la, shi a lôhô anmgbianev nav ér ve va ya kwagh. Nahan ve ya kwagh shi ve tsa hen uwo la.
55 Kpa Laban va mough tugh tugh suse ônov mba ônov nav+ man ônov nav mba kasev* zwa shi a ver ve doo doo,+ maa Laban hide yem ken ya na.+
Ngeren mba shin kpe
^ Shin “una nyighem.”
^ Shin “mbaaôndo mba hen ya; akombo.”
^ Ka Ifi u Uferati je la.
^ Zwa Heberu, “Kura iyol you, de er ma kwagh a Yakob ga, a lu u dedoo shin u bo kpaa ga.”
^ Shin “ônov av man ônov mba ônov av.”
^ Ka kwagh u pendan zendenya sha igyundu teman sha mi.
^ Zwa Heberu, “mciem ma Isaka.”
^ Ka ishember i ken zwa Aram. Inja i i ér, “Tihi u Shiada.”
^ Ka ishember i ken zwa Heberu. Inja i i ér, “Tihi u Shiada.”
^ Zwa Heberu, “mciem ma ter na Isaka.”
^ Shin “ônov nav kua ônov mba ônov nav.”
