Genese 34:1-31
34 Dina, wan u Yakob u kwase u Lea mar la,+ yange a due a za lu vea* mbayevkasev mba hen tar la.+
2 Zum u Shekem, wan u Hamor Orhivi,+ u lu ortar hen tar shon la nenge a na yô, a tôô un a za yav a na, a vihi un.
3 Nahan ishima na cii lu sha Dina wan u Yakob la, sha ci u gumkwase la doo un ishima tsung, nahan a lam a na kundu kundu sha zwanyohon.*
4 Tsô Shekem ôr kwagh a ter na Hamor+ kaa ér: “Vôso gumkwase ne nam, a hingir kwase wam.”
5 Zum u Yakob ungwa ér a vihi wan na Dina la, ônov nav lu a ilev ken toho. Nahan Yakob bugh zwa ga zan zan ve kar hiden.
6 Shighe kar yô, Hamor, ter u Shekem, due za u za lamen a Yakob.
7 Kpa ônov mba Yakob za ungwa kwagh ne, maa her ave ave je ve mough ken toho ve hide. Kwagh ne doo ve ga, shi ishima vihi ve ker kpishi, sha ci u a hee Iserael sha u yaven a wan u Yakob,+ man lu kwagh u i doo u a er ga yô.+
8 Hamor ôr kwagh a ve kaa ér: “Wan wen u kwase doo wan wam Shekem ishima tsung. Nea lumun yô, na un nen un a vôso,
9 nahan eren nen kwagh u kwase a vese. Ne naan se ônov enev mba kasev, ne kpaa ne vôson ônov asev mba kasev.+
10 Tema nen vea vese, tar ne cii ua lu u wen. Tema nen ker eren nen kpenga, tema nen hoghom hoghom.”
11 Maa Shekem kaa a ter u wankwase la kua anmgbianev nav ér: “Yô i shi doo ne a mo, me na ne hanma kwagh u ne soo cii.
12 Wam nen kem i taver ishe, kua iyua i me na la.+ M kegh iyol u nan hanma kwagh u ne ôr ér mo m na cii. Gba nan nen mo gumkwase la tsô, a hingir kwase wam.”
13 Ônov mba Yakob gema ôr kwagh a Shekem kua ter na Hamor sha ayom, sha ci u a vihi ingyôr ve Dina.
14 Ve kaa a ve ér: “Se fatyô u eren imbakwagh la ga, se fatyô u tôôn ingyôr yase nan or u nan tsôngo ga ze,*+ sha ci u ka kwagh u ihyeenegh hen a vese.
15 Kpa kwagh u ne er ve se lumun yô ka un ne: Ne hingir er se nahan, ne tsôngo nomso enev cii.+
16 Nahan se naan ne ônov asev mba kasev, se kpa se vôson ônov enev mba kasev, shi se tema vea ven se hingir nongoior môm.
17 Kpa aluer ne venda u ungwan imo yase tsôngon yô, se tôô wan wase se yem.”
18 Kwagh u ve ôr la doo Hamor+ kua Shekem, wan u Hamor.+
19 Gumor la kera vihi shighe u eren kwagh u ve ôr la ga,+ sha ci u wan u Yakob la doo un ishima tsung, shi lu gumor ne i hemban nan un icivir hen ya u ter na cii ye.
20 Nahan Hamor vea wan na Shekem ve yem sha hundagar, ve za ôr kwagh a ior mba hen gar ve,+ ve kaa ér:
21 “Ior mban soo u lun ken bem vea vese. Yô se de ve ve tema ken tar ne ve eren kpenga ker, sha ci u tar ne gbanger kuma u vea tema ker. Se vôson ônov vev mba kasev, se kpa se naan ve ônov asev mba kasev.+
22 Kpa kwagh u se er ve ior mbara vea lumun u teman vea vese shi hingir nongo môm a vese yô ka un ne: Saa se tsôngon nomso asev cii, er ve kpa ve tsôngon nahan.+
23 Nahan akaa a ve lu a mi kua inyaregh vev man ilev vev cii mbia hingir mbi yasev gaa? De se lumun nen a ve sha er vea tema a vese imôngo yô.”
24 Tsô ior mba ve duen hen hunda u gar u Hamor cii, kegh ato a na kua wan na Shekem, nahan nomso cii ve tsôngo, hanma or u nan duen hen hundagar la cii.
25 Nahan kpa, sha iyange i sha utar er lu nyoon ve her la je, ônov mba Yakob uhar, Shimion man Levi, anmgbianev mba Dina,+ ve tôô usanker vev ve za nyôr ken gar la or fa ga, ve wua hanma nomsoor cii.+
26 Ve wua Hamor kua wan na Shekem sha sanker, maa ve kua a Dina hen ya u Shekem, ve yem.
27 Ônov mba Yakob mbagen mbara di va hen ape i wua ior mbara la, maa ve ya ishar hen gar la, sha ci u ve vihi ingyôr ve.+
28 Ve kura ve iyôngo kua ivo man ibua man ujaki, kua hanma kwagh u lu ken gar man ken wongar cii.
29 Shi ve kura ikyav mbi ve lu a mi cii, ve kôr ônov vev kua kasev vev ve yem a mi, shi ve ya ishar sha hanma kwagh u lu ken ayou cii.
30 Tsô Yakob kaa a Shimion man Levi ér:+ “Ne haam ken zayol u vesen, ne na kwagh wam vihi* ior mba ken tar ne ishima, Mbakaanan man Mbaperishi cii. M vese iyenge ga, man ka keng vea kohol a va ta num sha a mo, vea timim, mo a ya wam.”
31 Kpa ve kaa ér: “Doo u or a er a ingyôr yase er ka agbaga* nahanaa?”
