Genese 14:1-24
14 Tsô sha ayange la, Amrafel tor u Shinar,+ man Arioki tor u Elasar, man Kedor-laomer+ tor u Elam,+ kua Tidar tor u Goim,
2 va ta ityav sha Bera tor u Sodom+ man Birsha tor u Gomora+ man Shinabi tor u Adema man Semeber tor u Seboimi+ kua tor u Bela, ka Soar je la.
3 Ve cii ve va zua ityav shin Pev* u Shidim,+ ka Zegemnger u Bar je la.*+
4 Yange ve lu sha ikyev i Kedor-laomer anyom 12, kpa ken inyom i sha 13 la ve hemba ato.
5 Nahan ken inyom i sha 14 la, Kedor-laomer kua ator a a lu vea na la va hemba Mbarefaim ityav ken Asheteroti-karnaim kua Mbashushi ken Ham man Mbaemi+ ken Shave-kiriataim,
6 kua Mbahori+ hen uwo ve u Seir,+ sen va ar El-paran u a lu ken taaikyôngo la.
7 Maa ve hide ve va hen En-misepati, ka Kadeshi je la.+ Ve va hemba haregh u Mbaamaleki cii,+ kua Mbaamor+ mba ve tema ken Hasason-tamar la.+
8 Tsô tor u Sodom kua tor u Gomora man tor u Adema man tor u Seboimi man tor u Bela, ka Soar je la, ve za kase shin Pev* u Shidim,
9 sha u nôngon ityav a Kedor-laomer tor u Elam, man Tidar tor u Goim man Amrafel tor u Shinar kua Arioki tor u Elasar+—ator anyiin lu nôngon a ator ataan.
10 Pev* u Shidim la gema lu a ahungwa her kpishi a lun a inya i tiher, nahan tor u Sodom man u Gomora mba ngur yevese ér vea war yô, ve za gba shin a. Mbagen mba ve shi la ve yevese ve yem sha iwo.
11 Nahan mba ve lu hemban la ve kura akaa a ken Sodom man Gomora cica, kua kwaghyan ve cii ve yem a mi.+
12 Shi ve kôr Loti wan u anmgbian u Aberam u lu ken Sodom la kpaa,+ ve yem a na kua ikyav nav cii.
13 Tsô orgen osough* va ôr Aberam Orheberu la. Hen shighe ne, Aberam tema hen uzegembaikyonov mba Mamre, Oramor+ u lu anmgbian u Esekol man Aner la.+ Ior mban yange ve ya ikyar a Aberam.
14 Aberam ongo ér i kôr anmgbian na+ yô, a mough a ior nav mba fan ityav, mbatomov 318 mba i mar ve hen ya na yô, a zenda ve zan zan za ar hen Dan.+
15 Tugh mbu il yô, a pav ior nav ker, nahan un vea mbatomov nav ve ta ityav sha a ve, ve hemba ve. Shi a zenda ve zan zan za a ar hen Hoba u a lu Damaseku ken imbusutarimese la.
16 A ngohol ikyav mbira cii, shi a hide a anmgbian na Loti kua ikyav nav man kasev kua ior mbagenev kpaa.
17 Aberam hembe Kedor-laomer kua ator a a lu vea na la ityav ngur hiden yô, tor u Sodom due va kegh un gbenda shin Pev* u Shave, ka Pev u Tor je la.+
18 Mekisedeki+ tor u Salem,+ za va a beredi man wain; un lu pristi u Aôndo u Hemban Cii.+
19 Maa a ver un doo doo, a kaa ér:
“Aôndo u Hemban Cii a ver Aberam doo doo,Un u a gbe sha man tar la;
20 Shi i wuese Aôndo u Hemban Cii,U a ne Mbahyomov ou sha ikyev you la!”
Tsô Aberam na un môm-ken-pue u hanma kwagh cii.+
21 Tsô tor u Sodom kaa a Aberam ér: “Nam ior mbara, kpa ikyav yô yem a mi.”
22 Kpa Aberam kaa a tor u Sodom ér: “M kende uwegh sha, m bum hen Yehova Aôndo u Hemban Cii, u a gbe sha man tar la mer,
23 me ngohol kwagh môm hen a we ga, gwarmou shin kwange u akôvough kpaa ga, sha er u va kaa wer, ‘M na Aberam hingir ornyar’ ga yô.
24 Me ngohol kwagh môm u seer sha kwagh u agumaior ne a vande yan la ga. Kpa Aner man Esekol man Mamre+ mba ve ze vea mo ne yô, na ve kwar ve.”
