Genese 19:1-38
19 Mbatyomov mba uhar mbara za nyôr ken Sodom aikighe, Loti gema tema hen hundagar u Sodom. Loti nengen a ve yô, a mough a za kegh ve gbenda, a ngurum a sua ityough inya.+
2 Maa a kaa ér: “M zamber ne uter av, nea lumun yô kar tsa nen hen ya u wanakiriki wen, sha er a ôô ne angahar yô. Kper tsô ne mough tugh tugh, ne mase yemen zende wen.” Kpa ve kaa ér: “Ei, se tsa hen tembe.”
3 Kpa er a sendegh a ve zan zan yô, ve kar ve yem vea na hen ya na. Maa a yôr ve iwer, a kaa ve beredi u i we kwa sha mi ga yô, ve ya.
4 Kpa er ve lu a yav ga je tsô, nomso mba ken gar u Sodom—hii sha mbayev zan zan due sha mbaganden—ikpelaior i toron asema, ve cii ve va kase ya la.
5 Maa ve gba yilan Loti kaan a na ér: “Ior mba ve ve hen a we aikighe ne la mba hana? Due a ve ken won va na se se yav a ve.”+
6 Tsô Loti due gema uwegh wuhe hunda, maa a za hen a ve.
7 A kaa a ve ér: “Anmgbianev av, m zamber ne, de eren nen iferkwagh nahan ga.
8 Nenge, m ngu a ônov av mba kasev uhar heen, mba i lu je ve lu a yav a or ga yô. Nea lumun yô, de m due a ve m va na ne, er nen kwagh u ne nenge i doo ne cii a ve. Kpa ior mban yô de eren nen ve ma kwagh ga, gadia ve va ka hen mure u* haav av je.”+
9 Tsô ve kaa ér: “Hide ken ijime!” Shi ve kaa ér: “Or ne va shir tswen heen man ngu cihin ôron se ijir! Ka u se er kwagh a we a vihi je a hemba ve.” Tsô ve gba tan sha* Loti karen yemen ér vea za vihi hunda.
10 Tsô ior mbara naregh uwegh kôr Loti nyôr a na ken iyou ape ve lu la, maa ve wuhe hunda.
11 Ve gema ve pir ior mba ve lu sha hunda youghough la ashe, hii sha mbakiriki zan zan nyôr sha mbavesen, nahan ve ker hunda je ve vôr.
12 Maa ior mbara kaa a Loti ér: “U ngu a orgen kpa heene? Ônov ou mba kemev man ônov ou mba nomso man ônov ou mba kasev, man ior mba u lu a ve ken gar ne cii, due a ve hen ijiir ne kera!
13 Gadia se mba timin ijiir ne, sha ci u mliam ma i vaa sha kwagh ve la ma ngee* sha ishigh ki Yehova+ je yô, Yehova tindi se ér se va tim gar ne.”
14 Nahan Loti due gba za lamen a ônov nav mba kemev mba ve lu sôôr ônov nav mba kasev la. A zer kaan a ve ér: “Mough nen! Due nen hen ijiir ne kera, sha ci u Yehova ngu timin gar ne!” Kpa ônov nav mba kemev mban nenge ér ngu eren ka asenge.+
15 Sev mbu ngur aven yô, mbatyomov mbara gba torough a Loti kaan ér: “Mough sha! Due a kwase wou man ônov ou mba kasev mba uhar mba ve lu heen vea we ne, sha er a tim u kera sha ibo i gar ne ga yô!”+
16 Ngur eren zôzô yô, ior mbara gba un sha uwe, un vea kwase na man ônov nav mba kasev mba uhar mbara, ve due a ve ve za ver ve ken wongar,+ sha ci u Yehova lu zungwen ve mhôônom.+
17 Mba duen a due a ve ken wongar je maa, ugen la kaa ér: “Yevese war uma wou! De gem ashe ijime ga,+ shi de til hen ijiir i môm hen agar a hen haregh ne ga!+ Yevese yem sha iwo, sha er u tim ga yô!”
18 Loti gema kaa a ve ér: “Aye Yehova, heela ga!
19 M zamber we, nenge ase yô, doo u a wanakiriki wou, u er a mo doo je gande,* u war uma wam.+ Kpa me fatyô u yevese yemen sha iwo ga, sha ci u cier mo iyol er alaghga kwagh a va za tserem me kpe nahan.+
20 Wea lumun yô, ma m yevese ma m yem hen gar u a lu ikyua ne; ka anijiir u cuku. M zamber, m yevese m yem her ga̱? Ka anijiir u cuku je. Sha er me war uma wam yô.”
21 Nahan a kaa a na ér: “Ka shami, me tese u ikyo i wan sha ingin kpaa,+ me kera tim gar u u ôr kwagh na la ga.+
22 Er fele! Yevese yem her, gadia me er kwagh môm ga zan zan u kar nyôron her!”+ Ka nahan ve a ii gar la iti ér Soar* ye.+
23 Shighe u Loti za nyôr ken Soar la nahan, iyange kôndo sha.*
24 Maa Yehova haa sulfur man usu sha Sodom man Gomora—lu sha, hen Yehova u due ye.+
25 Nahan a tim agar ne; a tim haregh la jimin cii, kua mba ve tema ken agar shon la, man ikyon i menden hen inya cii kpaa.+
26 Kpa kwase u Loti u lu van un ken ijime la, gema gba kenger ken ijime, maa a hingir icebar.*+
27 Aberaham gema mough pepe pepe, za hen ijiir i yange tile sha ishigh ki Yehova la.+
28 Kenger vegher u Sodom man Gomora kua ajiir a hen haregh la cii yô, a nenge a kwagh u kpilighyol. Mnyim lu duen ker tsuun,* kôndon er ka mnyim ma ken atse nahan!+
29 Nahan shighe u Aôndo lu timin agar a hen haregh ne kera la, a umbur Aberaham sha u duen a Loti ken agar a a tim la kera, agar a Loti yange tema ken a la.+
30 Shighe kar yô, Loti mough vea ônov nav mba kasev mba uhar mbara hen Soar, yem za lu sha iwo,+ sha ci u lu cian u lun hen Soar.+ A za lu ken bar vea ônov nav mba kasev mba uhar mbara.
31 Nahan u vesen la kaa a u kiriki la ér: “Ter wase bee iyol, man or ngu hen ijiir ne u nana tsa a vese er i eren sha tar cii nahan ga.
32 Yô va se na ter wase wain a ma, nahan se yav a na, se mar ônov se ver ter wase tse.”
33 Nahan hen tugh mbura, ve gba nan ter ve wain ér a ma; tsô u vesen la nyôr za yav a ter na, kpa ter na fa shighe u yav man shighe u mough sha ga.
34 Kpernan yô, u vesen la kaa a u kiriki la ér: “Nenge, nyen m yav a terem tugh. De se na un wain tugh mbun kpaa a ma. Nahan we u nyôr u za yav a na, nahan se mar ônov, se ver ter wase tse.”
35 Nahan, hen tugh mbura kpaa, ve zer nan ter ve wain ér a ma; tsô u kiriki la nyôr za yav a na, kpa ter na fa shighe u yav man shighe u mough sha ga.
36 Nahan ônov mba Loti mba kasev mba uhar mbara cii wa iyav a ter ve.
37 U vesen la mar wan u nomso, a ii un iti ér Moabi.+ Ka un a lu ter u mba ve lu Mbamoabi nyian la ye.+
38 U kiriki la kpa mar wan u nomso, a ii un iti ér Ben-ami. Ka un a lu ter u mba ve lu Mbaamon+ nyian la ye.
