Genese 21:1-34
21 Tsô Yehova umbur Sara er yange kaa nahan, Yehova er a Sara vough er yange tôndo zwa la.+
2 Nahan Sara wa iyav+ mar Aberaham wan u nomso ken iyolbeen na, sha shighe u Aôndo vande tôndon zwa a na la vough.+
3 Aberaham ii wan na u nomso u Sara mar la iti ér, Isaka.+
4 Aberaham tsôngo wan na Isaka shighe u va kuma ayange anigheni yô, vough er Aôndo kaa ér a er nahan.+
5 Aberaham lu anyom 100 shighe u i mar wan na Isaka la.
6 Maa Sara kaa ér: “Aôndo erem m ngu sen; hanma or u nan ongo kwagh ne cii nana se a mo imôngo.”*
7 Shi a kaa ér: “Ka an yange ma nan kaa a Aberaham ér, ‘Sara una mar wan’* sha wono? Kpa nenge ase yô m mar un wan ken iyolbeen na.”
8 Tsô wan la vese i de un ityumba, nahan Aberaham er zegeiniongo sha iyange i Isaka de atumba la.
9 Kpa Sara zer nengen er wan u Hagar,+ kwase Igipiti la mar Aberaham la, lu nahan Isaka tar yô.+
10 Nahan a kaa a Aberaham ér: “Zenda kpankwase ne kua wan na, gadia wan u kpankwase ne una ya dyako vea wan wam Isaka ga!”+
11 Kpa kwagh u ôr sha kwagh u wan u Aberaham ne doo Aberaham ga cii.+
12 Kpa Aôndo kaa a Aberaham ér: “Ishima i de vihin we sha kwagh u Sara a lu ôron we sha kwagh u wan la man kpankwase wou la ga. Ungwa imo na, sha ci u mba a yila ve ér ônov ou* la, vea due ken Isaka.+
13 Wan u kpankwase la kpaa,+ me er ikyurior ia due ken a na,+ sha ci u ngu wan wou.”*
14 Nahan Aberaham nder tugh tugh tôô beredi man isheghmnger* na Hagar. Maa a tôô akaa ne a ver un sha akende, a na un gbenda ér a yem vea wan la.+ Tsô Hagar yem gba za zenden wue wue ken taaikyôngo u Bersheba.+
15 Ken masejime yô, mngerem ma ken ishegh la va bee, maa a gema wan la a ver hen ihyuugh kigen.
16 Tsô a kar a za tema ica, kuma er ka i ker ivaan i za gba nahan, sha ci u a kaa ér: “M soo u nengen ku u wan ne ga.” Nahan a za tema ica, a gber kwelegh a gba vaan genger genger.
17 Tsô Aôndo ungwa mliam ma wan la,+ nahan ortyom u Aôndo yila Hagar sha kaa a na ér:+ “Hagar, ka nyi i er u we? De cie ga, gadia Aôndo ungwa mliam ma wan la hen ape a lu la.
18 Mough sha, za kôr wan la mough a na, kôr un sha uwegh ough, sha ci u ka u me gema un una hingir ikyurior i vesen.”+
19 Tsô Aôndo bugh un ashe, maa a nenge a ijôr i lun a mngerem shimi, nahan a za kese mngerem ken isheghmnger la poo, a na wan la ma.
20 Aôndo lu a wan la+ er lu vesen la. A lu ken taaikyôngo, a hingir or u keren avaan.
21 A tema ken taaikyôngo u Paran,+ ngô na za er kwase ken tar u Igipiti va na un.
22 Hen shighe la, Abimeleki vea Pikol, or u hemen ikyumutya na, kaa a Aberaham ér: “Aôndo ngu a we ken hanma kwagh u u lu eren cii.+
23 Yô, bum a mo heen sha ishigh ki Aôndo wer, mayange je u bumem shin ônov av shin tsombor wam kpaa ga, shi u tesem dooshima u mimi, mo kua mba hen tar u u tem her ne cii, er mo kpa m tese u nahan.”+
24 Nahan Aberaham kaa ér: “M bum sha kwagh ne.”
25 Nahan kpa, Aberaham gba ijir a Abimeleki sha kwagh u ijôr i mbatomov mba Abimeleki yange ve ngohol sha agee la.+
26 Abimeleki gema kaa ér: “M fa or u nan er kwagh ne ga; we kpa u ôrom kwagh sha mi ga, m ungwa ivurugh ga zan zan nyian u u lu va ôron mo ne.”
27 Tsô Aberaham kôr iyôngo man ibua na Abimeleki, nahan ve uhar cii ve ya ikyur.
28 Zum u Aberaham pav utulembaiyôngov utaankaruhar ken ilev nav ver kposo yô,
29 Abimeleki pine Aberaham ér: “Er nena ve u pav utulembaiyôngov mba utaankaruhar mban u ver kposo?”
30 A gema a kaa ér: “Ngohol utulembaiyôngov mba utaankaruhar mban sha uwegh agh, sha u ve lu shiada u tesen ér ka mo m tim ijôr ne ye.”
31 Ka nahan man a yila ijiir la ér Bersheba* ye,+ sha ci u lu her ve uhar cii ve bum ye.
32 Nahan ve ya ikyur+ hen Bersheba, maa Abimeleki mough vea Pikol, orhemen ikyumutya na, ve hide ve yem ken tar u Mbafiliti.+
33 Mba been yô, a môôr kon u tsamia hen Bersheba, maa a yila sha iti i Yehova,+ Aôndo u tsôron la, her.+
34 Aberaham tsa* ken tar u Mbafiliti shighe gôgônan.*+
