Genese 42:1-38
42 Yakob ongo ér kwaghyan ngu ken Igipiti yô,+ a kaa a ônov nav ér: “Er nan ne gbe kenger ayol a en nahana?”
2 Shi a kaa ér: “M ungwa mer samuyia ngu ken Igipiti. Yô sen za yam va nen a mi, sha er se ya se lu uma se kpe ga yô.”+
3 Nahan anmgbianev mba Yosev pue+ mough sen shin Igipiti u za yamen samuyia.
4 Kpa Yakob tindi Benyamin,+ anmgbian u Yosev la a anngôôv nav imôngo ga, sha ci u a kaa ér: “Alaghga kwagh u vihin tsung una va za tser un.”+
5 Nahan ônov mba Iserael za va vea ior mbagen mba ve va u yamen kwaghyan la, sha ci u ijen la nyôr ken tar u Kaanan kpaa.+
6 Yosev lu a tahav hen tar la,+ shi lu un teen ior mba sha tar cii samuyia ye.+ Nahan anmgbianev mba Yosev va gure un inya, kuma ishiv inya.+
7 Yosev nengen a anmgbianev nav je maa a fa ve, kpa a er ér ve de fe un ga.+ Nahan a lam a ve sha tswam, a pine ve ér: “Ka han ne mough ne ve?” Ve gema ve kaa ér: “Ka ken tar u Kaanan se mough se ve u va yamen kwaghyan ye.”+
8 Nahan Yosev fa anmgbianev nav, kpa ve yô ve fa un ga.
9 Her ave ave je maa Yosev umbur mnyam ma yange ma cie un sha kwagh ve la,+ tsô a kaa a ve ér: “Ne mba mbamkerev! Ne va sha u ne va nenge ajiir a tar ne u yen la!”*
10 Maa ve kaa a na ér: “Ka nahan ga terem, ikpan you va ka u va yamen kwaghyan.
11 Se cii se mba ônov mba or môm. Se mba ior mba mimi. Se ikpan you se mba mbamkerev ga.”
12 Kpa a kaa a ve ér: “Ka mimi ga! Ne va sha u ne va nenge ajiir a tar ne u yen la!”
13 Ve gema ve kaa ér: “Se ikpan you se mba anmgbianev, se mba 12.+ Se mba ônov mba or môm,+ ken tar u Kaanan. U kiriki la ngu vea ter wase,+ ugen la yô kera ngu ga.”+
14 Kpa Yosev kaa a ve ér: “Ka vough er ashen m vande ôron nahan—‘Ne mba mbamkerev!’
15 Ka sha kwagh ne je a kar ne ye: Er Farou a lu uma ne,* ne mba zan mape môm ga zan zan saa anngô wen u kiriki la una kar van heen.+
16 Tindi nen or wen môm nana za va a anmgbian wen la, er ne mbagen cii ne lu uikyangen ne. Ka sha gbenda ne man a kar mkaanem enem, aluer ne mba ôron ka mimi kpa a fa ye. Kpa aluer ka nahan ga yô, er Farou a lu uma ne,* ne mba mbamkerev.”
17 Maa a wuhe ve cii ijiir i môm ayange atar.
18 Sha iyange i sha utar la, Yosev kaa a ve ér: “Er nen kwagh ne sha er ne lu uma yô, sha ci u m cie Aôndo.
19 Nea lu ior mba mimi yô, anngô wen môm nana lu heen ken iyou i i wuhu ne ker ne, kpa ne mbagen cii yô tôô nen samuyia yem nen, sha er ne za nôngo a ijen sha uya enev yô.+
20 Nahan za va nen a anngô wen u kiriki la hen a mo, sha er a fa ér mkaanem enem ka ma mimi, shi ne kpe ga yô.” Maa ve lumun u eren nahan.
21 Tsô ve gba kaan ker ayol a ve ér: “Mimi je se mba yan mtsaha ne ka sha ci u anngô wase,+ sha ci u yange se nenge a ican na zum u lu zamber se ér se zungwe un mhôônom la, kpa se ungwa ga. Ka nahan ve ican ne i ve sha a vese ye.”
22 Ruben gema kaa a ve ér: “Yange m venda a ven mer, ‘De eren nen wan la kwaghbo ga’ gaa? Kpa ne ungwa ga.+ Hegen kan Aôndo a lu pinen awambe a na hen a vese ne.”+
23 Kpa ve fa ér Yosev ngu ungwan kwagh u ve lu ôron la ga, sha ci u ortafinta lu hen atô ve.*
24 Maa a kar hen ape ve lu la sha, a gba za vaan.+ Hidi shi va lamen a ve yô, a kôr Shimion+ a kange un sha ashe a ve.+
25 Yosev maa na zwa ér i haa hanmô ve samuyia hen ibya poo, shi i hide a inyaregh ki nan i wa nan ken ibya i nan, shi i na ve akaa a yan sha gbenda. Maa i er a ve nahan.
26 Tsô ve kange ujaki vev samuyia, ve mough ve gba yemen.
27 Zum u môm ken a ve za sagh ibya na sha er una na jaki na kwaghyan hen ijiir i tsan yô, a nenge a inyaregh nagh sha zwaibyaa na.
28 Maa a kaa a anmgbianev nav ér: “I hide a inyaregh yagh i wam her, kin ken ibya yam heen ne!” Tsô asema ta ve kwe, ve gba gbidyen akarkase iyol, ve gema ve gba kaan a ayol a ve ér: “Ka nyi kwagh Aôndo a er a vese nee?”
29 Mba va nyer hen ter ve Yakob ken tar u Kaanan yô, ve ôr un akaa a a za er ve la cii, ve kaa ér:
30 “Or u a lu ter u tar shon la lam a vese sha tswam,+ shi a kaa ér se za ka u za nengen tar la mker.
31 Kpa se kaa a na ser, ‘Se mba ior mba mimi. Se mba mbamkerev ga.+
32 Se cii se mba ônov mba ter wase, se mba 12.+ U môm kera ngu ga,+ u kiriki la ngu vea ter wase hegen ken tar u Kaanan.’+
33 Kpa or u a lu ter u tar shon la kaa a vese ér, ‘Ka sha kwagh ne man nea lu ior mba mimi kpa me fa ye: Undu nen anngô wen môm vea mo.+ Gema tôô nen kwaghyan yem nen, sha er ne za nôngo a ijen sha uya enev yô.+
34 Za va nen a anngô wen u kiriki la hen a mo, sha er me fa mer ne mba mbamkerev ga, kpa ne mba ior mba mimi yô. Tsô me hide a anngô wen me na ne, shi ne za hemen u yamen kwagh ken tar ne.’”
35 Mba ngur geman sam u ken aba ve la haan yô, ve nenge a ikpanyar i hanmô ve ken ibya i nan her. Ve kua ter ve cii mba nengen a akpa a inyar a ve ne yô, mciem gba ve iyol.
36 Nahan ter ve Yakob gba kaan a ve ér: “Ne timim ônov a bee ka nyi?+ Yosev ngu ga,+ Shimion kpa kera ngu ga,+ shi ne soo u tôôn Benyamin kpa yemen a mi! Ka mo jighilii akaa ne cii a ve sha a mo ye!”
37 Kpa Ruben gema kaa a ter na ér: “Aluer m hide a na hen a we ga yô, wua ônov av mba nomso mba uhar mban.+ Wa un sha ikyev yam, nahan me hide a na hen a we.”+
38 Kpa a gema a kaa ér: “Wan wam ngu senen a ven imôngo ga, sha ci u anmgbian na vande kpen, ka un tseegh a mase shin ye.+ Aluer kwagh u vihin za tser un sha gbenda er ne lu yemen la yô, ne na ivu yam ia sen shin Uwar*+ a ijungwen.”+
