Genese 20:1-18
-
I yima Sara sha ikyev i Abimeleki (1-18)
20 Tsô Aberaham mough twev heela+ yem ken tar u Negebi, za tema hen atô u Kadeshi+ man Shur.+ Shighe u Aberaham tema twev* ken Gerar la,+
2 a zer ôron kwagh u kwase na Sara ér: “Ka ingyôr yam.”+ Nahan Abimeleki, tor u Gerar, tindi i za va a Sara, maa a tôô un.+
3 Tsô Aôndo va hen Abimeleki tugh ken mnya va kaa a na ér: “U ngu kpen sha ci u kwase u u tee la,+ gadia a vôso nom, ka kwase u or je.”+
4 Kpa Abimeleki lu a za ikyua a na ga.* Nahan a kaa ér: “Yehova, ú tim ikyurior i i lu a ishô yôô?*
5 Ka or la a kaa a mo ér, ‘Ka ingyôr yam,’ shi ngun kpa a kaa a mo ér, ‘Ka tien wam’ ye gaa? M er kwagh ne a ishima i gbar gbar, shi ave a am kpa nga wang.”
6 Nahan Aôndo u mimi la kaa a na ken mnya ér: “M fa er u er kwagh ne a ishima i gbar gbar yô, sha nahan yô m yange u u eren mo kwaghbo. Ka nahan m de mer bende a na ga ye.
7 Yô, hide or la a kwase na, sha ci u un ka profeti je,+ nahan una zamber sha ci wou,+ u lu uma her. Kpa aluer u ngu hiden a na ga yô, fa wer u kpe kpee je, we kua mba ve lu mba ou cii.”
8 Tsô Abimeleki nder tugh tugh yila mbatomov nav cii ôr ve akaa ne cica, nahan cier ve iyol kpishi.
9 Abimeleki maa yila Aberaham kaa a na ér: “Ka nyi u er a vese nahana? Ka nyi isholibo m er u ve u soo wer mo vea tartor wam cii se ya ibo i vesen nahana? Kwagh u u er a mo ne doo ga.”
10 Abimeleki shi pine Aberaham ér: “Ka nyi jighilii yange i lu awashima wou ve u er imbakwagh ingin nahana?”+
11 Maa Aberaham kaa ér: “Lu sha ci u m kaa ken ishima yam mer, ‘M fa dedoo mba cie Aôndo hen ijiir ne ga, nahan vea wuam sha ci u kwase wam.’+
12 Shi bee kera yô, ka ingyôr yam kpôô kpôô. Ka wan u terem, kpa gema ka wan u ngôm ga, nahan a hingir kwase wam.+
13 Nahan shighe u Aôndo kaa a mo ér m̱ undu ya u terem,+ m̱ zenden ajiir wue wue la, m kaa a na mer: ‘Ka gbenda u u tese wer m doo u ishima sha mimi je ne: Hanma ijiir i se ze cii yô, ôr kwagh wam kaa wer, “Ka anngôm.”’”+
14 Tsô, Abimeleki kôr iyôngo man ibua man ikpan i nomso man i ukase na Aberaham, shi hide un a kwase na Sara.
15 Abimeleki shi kaa ér: “Nenge, tar wam ngun heen ne. Tema ape i doo u cii.”
16 A gema a kaa a Sara ér: “Nenge, m na anngôu agbenger a azurufa 1,000,+ ka kwagh u tesen ér u ngu a ishô* sha ishigh ki mba ve lu a we, kua sha ishigh ki hanma or cii, u kera ya kunya ga.”
17 Tsô Aberaham gba zamber Aôndo u mimi, nahan Aôndo bee Abimeleki kua kwase na man ikpan na i ukase angev, maa ve hide ve gba maren ônov;
18 gadia Yehova cir sagh u hanma kwase u hen ya u Abimeleki cii,* sha ci u Sara kwase u Aberaham.+
