Genese 38:1-30
-
Yuda vea Tamar (1-30)
38 Hen shighe la, Yuda undu anmgbianev nav za tim tenti na ikyua a Oradulam, i yilan un ér Hira.
2 Nahan Yuda za nenge a wan u Orkaanan ugenegh her,+ iti na lu Shua. Maa a tôô un hingir kwase na, a tsa a na.
3 Maa a wa iyav, shighe kar yô a mar un wan u nomso, Yuda ii un iti ér Er.+
4 Shi a wa iyav mbugenegh a mar wan u nomso, a ii un iti ér Onan.
5 A shi a wa iyav a mar wan u nomso ugen, a ii un iti ér Shela. Yuda lu ken Akeshibi+ shighe u a mar un la.
6 Shighe kar yô, Yuda er kwase na waniunda na Er, iti i kwase la lu Tamar.+
7 Kpa inja i Er waniunda u Yuda la, doo Yehova ga, nahan Yehova wua un.
8 Nahan Yuda kaa a Onan ér: “Tôô kwase u anngôu tsa a na, mar ônov ver anngôu tse.”+
9 Kpa Onan fa je ér, a nenge ér ônov mbara ka mba nav ga.+ Nahan zum u una̱ tsa a kwase u anmgbian na yô, a nyande ken inya, sha er una mar anmgbian na ônov ga yô.+
10 Kwagh u er la lu kwaghbo sha ishigh ki Yehova, nahan un kpa a wua un.+
11 Tsô Yuda kaa a Tamar kwase u wan na la ér: “Za lu kwasecôghol hen ya u teru zan zan wan wam Shela a kar vesen,” gadia a ôr ken ishima na ér: ‘Alaghga un kpa una va kpe er anmgbianev nav nahan.’+ Tsô Tamar yem za tema hen ya u ter na.
12 Ayange nga karen yô, kwase u Yuda, wan u Shua la+ kpe. Yuda zungwe ku na, ayange a zungwen la nga been yô, a mough a za hen mba tôndon un iyôngo aive ken Timna,+ un vea huror na Hira, Oradulam la.+
13 Tsô i kaa a Tamar ér: “Nenge, ter u nomou ngu zan ken Timna u za tôndon iyôngo na aive.”
14 Maa a mough a er akondo a na a kwasecôghol la kera, a gema a cir ishigh shi a kamber ikyondo sha akende. A za tema hen hunda u gar u Enaim, u a lu sha gbenda u yemen ken Timna la, sha ci u a nenge er Shela vese kpa i gema un i na un ér una lu kwase na ga yô.+
15 Yuda za nengen a na yô, a tôô je ér ka gbagakwase, sha ci u a cir ishigh nagh.
16 Tsô a kaha a za hen a na hen kpegbenda, a kaa a na ér: “Wea lumun yô, de m yav a we,” sha ci u a fa er lu kwase u wan na ga.+ Kpa kwase la kaa ér: “Ka nyi u nam sha er u yav a mo?”
17 Tsô a gema a kaa ér: “Me tindi u a anivo ken ilev yav.” Kpa a pine un ér: “U hila nam kwagh* me lu a mi zan zan u kar tindin a mi ga̱?”
18 A pine un ér: “Ka nyi u soo wer m na u we?” A gema a kaa ér: “Nam iyôgh you ki ken uwe ki veren ikyav a mi+ kua kor u u we ki sha mi la man gbough ou ku u lu a mi ken uwe la.” Nahan a gema akaa la a na un maa a yav a na, tsô kwase la wa iyav a na.
19 Tsô a mough a yem a za sagh ikyondo i a kamber sha akende la, a hide a hua akondo a na a kwasecôghol la.
20 Tsô Yuda va tindi a anivo la sha ikyev i huror na Oradulam la,+ ér a za ngohol akaa a un na kwase shon la, kpa a zua a na ga.
21 A pine ior mba hen ijiir na la ér: “Agbaga u ken tempel, u a lu sha gbenda hen Enaim ne ngu hana?” Kpa ve kaa a na ér: “I gbe je agbaga u ken tempel ngu a lu hen ijiir ne ga.”
22 Ken masejime yô, a hide a yem hen Yuda a za kaa a na ér: “M zua a na ga, shi bee kera yô, ior mba hen ijiir la kaa ér: ‘I gbe je agbaga u ken tempel ngu a lu hen ijiir ne ga.’”
23 Nahan Yuda kaa ér: “Gba den tsô a yem a a, se va hee a hee ayol a ase. Gayô nenge ase, m tindi a anivo la, kpa u zua a na ga.”
24 Nahan kpa, iwer ngi karen er itiar nahan yô, i va kaa a Yuda ér: “Tamar, kwase u wan wou za er gbaga shi a wa iyav sha gbaga na u eren la kpaa.” Tsô Yuda kaa ér: “Due nen a na i za nande un.”+
25 Mba ngur duen a na yô, a tindi loho hen ter u nom na ér: “Ka or u akaa ne a lu a nan la nan wem iyav ye.” Shi a kaa ér: “Nenge tsembelee fa or u akaa ne a lu a nan yô, iyôgh ki ken uwe ki veren ikyav a mi kua kor u i we sha mi ne man gbough kun.”+
26 Yuda nengen akaa ne tsembelee yô, a kaa ér: “Kwase ne hembam perapera, sha ci u m na un mer a lu kwase u wan wam Shela ga.”+ Nahan a kera kimbir yaven a na ga.
27 Shighe va kom u una mar yô, lu ahina lu un ken uya ye.
28 Ngur maren yô, u môm due uwegh, maa kwase u kôron mar la gema fese tôô mou u nyian bong kange un sha uwe, a kaa ér: “U ngun hii duen.”
29 Kpa hidi a uwegh nagh ker nahan maa, anmgbian na kar due, tsô kwase la kaa ér: “Nenge u ande u dugh sha wono!” Nahan i ii un iti ér Pereshi.*+
30 Ken masejime yô anmgbian na kpa due, un u i kange un mou u nyian bong sha uwe la, nahan i ii un iti ér Sera.+
