Genese 41:1-57
41 Anyom ahar jimin nga been yô, mnyam cie Farou+ er a tile hen kpe u Ifi u Nil nahan.
2 Maa ibua itiankarihiar i kehen shi doonashe va due shin ifi la, gba yan toho u hen kpe Nil.+
3 Ibua igen itiankarihiar i vihin ashe shi lun kande kande kpa shi due shin Nil, va tile ikyua a i kehen i i lu hen kpe u Nil la.
4 Tsô ibua i vihin ashe i lun kande kande la gba yan ibua i itiankarihiar i kehen shi doonashe la. Maa Farou nder.
5 Hiden yaven yô, mnyam magen shi gba cien un. Asagher a uiyia ataankarahar due sha dungwa môm, wa ker king king shi dooashe kpaa.+
6 Shi asagher agen ataankarahar a lun tsaasaa due, a ahumbe a sha ityoughkitaregh va ta sha a, uma a kera yô.
7 Tsô asagher a lun tsaasaa la, gba menan asagher a ataankarahar a a dooashe shi a wa ker king king la. Maa Farou nder, nahan a kav er i lu mnyam ma lu cien un yô.
8 Kpa sev mbu aven yô, ishima gba zan un iyol kpishi. Nahan a tindi i za va a mbaahiriv mba ken Igipiti man mbafankwagh mba ker cii. Tsô Farou ôr ve mnyam mara, kpa mô ve môm fatyô u pasen Farou inja i ma ga.
9 Tsô orvesen u toon kwaghman la lam a Farou kaa ér: “M ngu pasen asorabo a am nyian.
10 Ishima yange i vihi Farou a mbatomov nav. Nahan a za wuhem ken purusu u hen ya u orvesen u mbakuran la, mo vea orvesen u mbakaan beredi.+
11 Tsô hen tugh mbugen la, se uhar cii mnyam cie se. Hanmô wase cii mnyam ma nan lu a mpase u ma.+
12 Wanye Heberu ugen gema lu her vea vese, lu ortom u orvesen u mbakuran.+ Se mba er un ma yô,+ a pase hanmô wase inja i mnyam ma nan.
13 Man va kure sha mi er pase se nahan vough. I hide a mo sha tom wam, kpa orgen la yô i sende un.”+
14 Nahan Farou tindi ér i za va a Yosev,+ tsô i za dugh un ken purusu* la fese.+ A hondo ishigh kua ityough shi a musan akondo, maa a za hen Farou.
15 Tsô Farou kaa a Yosev ér: “Mnyam ciem, kpa or u pasen mo inja i ma nan ngu ga. Man m ungwa i ôr kwagh wou ér, ka u ungwa mnyam shi u pase inja i ma.”+
16 Tsô Yosev gema kaa a Farou ér: “Mo m ngu kwagh je ga! Ka Aôndo una ôr kwagh sha u i kpe Farou iyol ye.”+
17 Tsô Farou gba ôron Yosev ma kaan ér: “Mnyam ciem er m tile hen kpe u Ifi u Nil
18 maa ibua i kehen shi doonashe itiankarihiar due shin Nil gba yan toho u hen kpe u Nil nahan.+
19 Maa ibua igen itiankarihiar i vihin ashe tsung shi lun kande kande kpa va due. Ken tar u Igipiti cii, i gbe je m ngu a nenge a ibua i vihin ashe nahan ga.
20 Tsô ibua i lun kande kande la gba yan ibua itiankarihiar i kehen i i hii duen la.
21 Er i ya i kera nahan kpa, lu u or a fatyô u fan tsô ér i ya i ga, sha ci u i vihi ashe her di tsô er sha hiihii la nahan. Maa m nder.
22 “Tsô shi mnyam ciem, m nenge asagher a uiyia ataankarahar due sha dungwa môm, a wa king king shi a dooashe kpaa.+
23 Tsô asagher a uiyia agen ataankarahar a lun tsuasaa kpa va due, a ahumbe a sha ityoughkitaregh va ta sha a, uma shi lu tsaasaa yô.
24 Maa asagher a uiyia a lun tsaasaa la, gba menan asagher a uiyia a ataankarahar a doonashe la. Nahan m ôr mbaahiriv,+ kpa mô ve môm fatyô u pasen mo inja i ma ga.”+
25 Tsô Yosev kaa a Farou ér: “Mnyam ma Farou ma mhar man cii ma inja i môm tsô. Aôndo u mimi la ôr Farou kwagh u un soo u eren yô.+
26 Ibua i dedoo i itiankarihiar la ka anyom ataankarahar. Shi asagher a uiyia a dedoo a ataankarahar la kpaa, ka anyom ataankarahar. Mnyam man cii ma inja i môm tsô.
27 Ibua itiankarihiar i kanden shi vihin ashe i i va dugh ken masejime la, ka anyom ataankarahar, shi asagher a uiyia a ataankarahar a lun tsaasaa, a ahumbe a sha ityoughkitaregh a te sha mi a uma a kera la, a lu anyom ataankarahar a ijen.
28 Er m vande ôron Farou nahan, Aôndo u mimi la na ér Farou a nenge a kwagh u un soo u eren yô.
29 “Anyom nga van ataankarahar a kwaghyan una dumbur ken tar u Igipiti cii yô.
30 Kpa aa been yô, anyom ataankarahar a ijen aa dondo, nahan kwaghyan u dumbur la cii una hungur kera, ijen la ia vihi tar ne cii.+
31 Kwaghyan u yange dumbur ken tar ne la cii a kera umbur un ga, sha ci u ijen i ia gba la, gadia ia kôr tsung.
32 Mnyam man cie Farou kwa har, sha ci u Aôndo u mimi la wa shima u eren kwagh ne kpee je, man Aôndo u mimi la sôôn eren kwagh ne.
33 “Yô, Farou a̱ ker or u nan fe kwagh shi nan bugh ashe yô, a̱ ver nan sha tar u Igipiti.
34 Nahan Farou a er kwagh ne, a̱ ver mbavesen ken tar u Igipiti, shi a kohol môm ken utaan u kwaghyan u ken Igipiti, ken anyom ataankarahar a kwaghyan una dumbur la.+
35 Ve̱ kohol akaayan cii ken anyom a dedoo a a lu van ne, ve ombo ishamakaa sha iniezwa i Farou, i koso kwaghyan la ken hanma gar doo doo.+
36 Kwaghyan la a̱ va wase u koson ior mba ken tar ne, ken anyom ataankarahar a ijen ia va gba ken tar u Igipiti la, sha er ijen ia tim tar ne kera ga yô.”+
37 Mhen ne doo Farou kua mbatomov nav cii.
38 Nahan Farou kaa a mbatomov nav ér: “A fatyô u zuan a orgen u jijingi u Aôndo a lu ken a nan er or ne nahan kpa?”
39 Farou maa kaa a Yosev ér: “Er Aôndo a ne u fe akaa ne cii yô, or môm u fan kwagh shi bughun ashe er we nahan nan ngu ga.
40 Ka we je u lu ityough sha ya wam ye, ior av cii vea ungwan imo you sha hanma kwagh cii.+ Ka sha ian yam i tor la* tseegh me hemba u ye.”
41 Shi Farou kaa a Yosev ér: “Nenge, m ngu veren we sha tar u Igipiti cii.”+
42 Tsô Farou tsua iyôgh nagh ki ken uwe ki veren ikyav a mi, a gema a wa Yosev ken uwe, shi a hua un akondo a dedoo a taver ishe shi a har un ishiligh ku zanaria sha mon.
43 Heela tseegh ga, a ver un sha ikyekye na i icivirigh i sha uhar la, i gba zan un sha hemen yôôn ér, “Avrekh!”* Kape i ver un lu ityough sha tar u Igipiti cii la.
44 Farou shi kaa a Yosev ér: “Mo m ngu Farou, kpa aluer u na zwa ga yô, ken tar u Igipiti cii or a er kwagh môm ga.”*+
45 Tsô Farou na Yosev iti ér Safenati-panea, shi a na un Asenati+ wan u Potifera, pristi u On,* ér a lu kwase na. Tsô Yosev gba nengen sha* tar u Igipiti.+
46 Yosev lu anyom 30+ shighe u tile sha ishigh ki Farou, tor u Igipiti* la.
Tsô Yosev kar sha ishigh ki Farou sha, gba zenden ken tar u Igipiti cii.
47 Ken anyom a ataankarahar a iyiav dumbur la, inya i hen tar la gba umen iyiav kpishi.
48 Tsô a gba kohol akaayan a ken tar u Igipiti cii, ken anyom a ataankarahar la, lu ombon akaayan la ken agar. Hanma gar yô, a koso kwaghyan u a kohol ken ishule i hen ikyasen na la ker.
49 Yosev za hemen u ombon iyiav kpishi er ka waarawa u shin zegemnger nahan, zan zan yô i va de u ôron, sha ci u mbi ngee gande u ôron.
50 Cii man inyom i hiihii i ijen la i va nahan, i mar Yosev ônov mba nomso uhar,+ lu kwase na Asenati, wan u Potifera, pristi u On* mar un ônov mban ye.
51 Yosev ii wan na u iunda la iti ér Manase,*+ sha ci u a kaa ér, “Aôndo na m hungur a ican yam cii, kua ya u terem cii.”
52 A ii u sha uhar la iti ér Eferaim,*+ sha ci u a kaa ér, “Aôndo na m mar ônov ken tar u m ye ican ker ne.”+
53 Tsô anyom ataankarahar a kwaghyan dumbur ken tar u Igipiti la va bee,+
54 anyom ataankarahar a ijen la maa hii, vough er Yosev yange ôr nahan.+ Ijen gba ken ityar la cii, kpa kwaghyan* gema lu ken tar u Igipiti cii.+
55 Kpa ken masejime, zum u ijen va kôr hanma ijiir cii ken tar u Igipiti yô, ior gba vaan a Farou ér a na ve kwaghyan,+ maa Farou kaa a Mbaigipiti ér: “Za kohol nen Yosev, er nen hanma kwagh u a ôr ne cii.”+
56 Ijen la gba hanma ijiir sha tar cii.+ Tsô Yosev gba bughun iuna i i* lu hen atô ve la cii, teen Mbaigipiti kwaghyan,+ gadia ijen la kôr ken tar u Igipiti tsung.
57 Heela tseegh ga, ior mba sha tar cii gba van ken tar u Igipiti va yamen kwaghyan hen Yosev, sha ci u hanma ijiir sha tar cii ijen kôr tsung.+
Ngeren mba shin kpe
^ Zwa Heberu, “ijôr; ihyungwa.”
^ Shin “ikyônough ki torough.”
^ A shi nan kpa, ka ishember i yôôn ér i na or icivir.
^ Zwa Heberu, “or a kende uwegh shin nguhar ga.”
^ Ka gar u Heliopoli je la.
^ Shin “gba zenden ken.”
^ Shin “shighe u hii u eren Farou, tor u Igipiti tom.”
^ Ka gar u Heliopoli je la.
^ Inja na yô ér, “Un u A Ne Ér Kwagh a Hungur; U A Ne Ér I Hungur Kwagh La.”
^ Inja na yô ér, “Mar Kwa Har.”
^ Zwa Heberu, “beredi.”
^ Shin “ajiir a i ombo kwaghyan a a.”
