Genese 8:1-22
8 Nahan kpa Aôndo va umbur Noa man inyamtoho kua uzendenya mba ve lu ken tso a na la cii.+ Nahan Aôndo er ahumbe va ta sha tar, maa mngerem mara hii u panden.
2 Aan a mngerem ma sha kwavaôndo kua aan a sha hide kondo, maa ura de u nôôn.*+
3 Tsô mngerem mara gba hiden ijime sha tar. Ayange nga kar 150 yô, mngerem mara songor.*
4 Ken uwer u sha utaankaruhar ayange 17 la, tso la va hange sha iwo i Ararati.
5 Mngerem mara lu hiden ijime seer a seer zan zan uwer u sha pue. Ken uwer u sha pue iyange i hiihii la, ityouv mbi iwoov due.+
6 Ayange nga kar 40 yô, Noa bugh windou+ u yange wa sha tso la,
7 a pase ôô-ôô due ken won; lu purugh zan shi hiden zan zan mngerem kar uman sha tar.
8 Shighe kar yô shi a pase ikyungugh, sha er una fa mngerem ma a pande sha tar yô.
9 Kpa ikyungugh kira zua a ijiir i teman ga, sha ci u mngerem lu sha tar her hanma ijiir cii,+ nahan ki hide ki va hen a na hen tso la, tsô a naregh uwegh a kôr ki a nyôr a mi ken tso.
10 A tamber ayange ataankarahar maa shi a pase ikyungugh kira ki due ken tso.
11 Ki va hidi hen a na er aikighe nahan yô, a nenge ki lu a kwa u olev u ndor sha zwa! Maa Noa fa je ér mngerem mara pande sha tar.+
12 Shi a tamber ayange ataankarahar. Maa shi a pase ikyungugh kira, kpa ki kera hide hen a na ga.
13 Tsô ken inyom i 601,+ ken uwer u hiihii, sha iyange i hiihii la, mngerem uma sha tar, Noa maa bugh haav mbu tsoo vegher môm,* nahan a nenge er tareghnyaagh lu uman yô.
14 Ken uwer u sha uhar ayange a u 27 la, tar uma tseghe tseghe.
15 Aôndo maa kaa a Noa ér:
16 “Due ase ken tso, we vea kwase wou man ônov ou kua kasev mba ônov ou kpaa.+
17 Due a hanma kwagh u uma cii,+ akaa a purugh man inyam man akaa a kpelan a kpela inya kpaa, sha er vea mar kpishi, vea seer ngeen sha tar yô.”+
18 Tsô Noa due, un vea ônov nav+ man kwase na man kasev mba ônov nav.
19 Akaauma cii due ken tso la sha icombor ve, hanma kwagh u a kpelan a kpela inya man akaa a a purugh sha man hanma kwagh u uma u a zenden sha tar cii kpaa.+
20 Maa Noa ta atse a nan Yehova nagh,+ nahan a tsua annyamev mbagen ken inyam i lun wang, kua ken akaauma a purugh a lun wang cii,+ a na nagh a mi sha atse la.+
21 Tsô Yehova gba ungwan ihyuma i dedoo.* Nahan Yehova kaa ken ishima na ér: “Mayange me kera wa tar* ifyan+ sha ci u ieren i or ga, gadia mhen u ishima i or ka u bo hii iyev je.+ Shi mayange me kera tim hanma kwagh u uma er m er nahan ne ga.+
22 Hii hegen je, shighe u lôôn iyiav man shighe u sundan, shighe u hir man shighe u iceenyolough, inyom man fam, atetan man tugh, vea bunden mayange ga.”+
